मेरो कार्यकाल एक वर्ष १० महिना १५ दिन बाँकी छ : प्रधानमन्त्री ओली

काठमाडौं । प्रधानमन्त्री केपी शर्मा ओलीले आफ्नो प्रधानमन्त्रीको कार्यकाल एक वर्ष १० महिना १५ दिन मात्रै बाँकी रहेको बताउनुभएको छ । क्याप्टेन रामेश्वर थापाको ‘इन्टु द फायर’को पुस्तक विमोचन कार्यक्रममा बोल्दै उहाँले आफू समयभन्दा पहिले नै प्रधानमन्त्री पदबाट राजीनामा दिने बताउनुभएको हो । ‘मलाई मन नपराउनेहरूलाई खुसीको खबर भनिदिन चाहन्छु । अब मेरो प्रधानमन्त्रीको कार्यकाल एक वर्ष १० महिना १५ दिन बाँकी छ । त्योभन्दा पनि हप्ता दिन अघि नै छोड्छु भनेको छु । बढी होइन कि समयमै हस्तान्तरण गरौँ भन्ने छ,’ उहाँले भन्नुभयो । राजनीतिलाई घृणा गर्ने कुरा, राज्य व्यवस्थालाई घृणा गर्ने कुरा सामाजिक अपराधिक कार्य मात्रै भएको उहाँको भनाइ छ ।

‘मैले १७ हजार मान्छे मारेको हो र खुट्टा कमाउने ?’
प्रधानमन्त्री ओलीले आफूले १७ हजार मान्छे नमारेको भन्दै खुट्टा नकमाउने बताउनुभएको छ । नेकपा माओवादी केन्द्रका अध्यक्ष पुष्पकमल दाहालले नेपाल पनि बंगलादेश र श्रीलंकाजस्तै हुने अभिव्यक्ति दिएपछि प्रधानमन्त्री ओलीले चर्को स्वरमा बोल्दैमा आफूले खुट्टा नकमाउने बताउनुभएको हो । ‘हिजोतिर हो कि प्रचण्डजीले बंगलादेश र श्रीलंकाबाट सिक भन्दै थिए । मैले १७ हजार मान्छे मारेको हो र खुट्टा कमाउने ?,’ प्रधानमन्त्री ओलीले भन्नुभयोे । उहाँले चर्को स्वरमा बोल्ने प्रचण्ड आफैँले बंगलादेश र श्रीलंकाबाट सिक्नुपर्ने बताउनुभयो । उहाँले नेपालको आफ्नै पहिचान र संस्कृति रहेको भन्दै बंगलादेशमा जे भयो त्यही भइनहाल्ने बताउनुभयो । ‘बंगलादेशमा जे भयो नेपालमा त्यही नेपालमा हुँदैन । नेपाल कुनै देशको फोटोकपी मेसिन होइन । नेपालको आफ्नै संस्कृति र पहिचान छ,’ उहाँले भन्नुभयो ।

उहाँले लोकतन्त्र आफूहरूले लडेर ल्याएको र संविधान पनि आफूहरूकै पहलमा बनेको बताउनुभयो । ‘लोकतन्त्र हामीले लडेर ल्याएका हौँ । अहिलेको संविधान हामीले लेखेका हौँ । यो प्रणाली हामीले ल्याएका हौँ । जनताको अधिकार सुनिश्चित गर्न यसलाई अझ प्रभावकारी बनाउँदै लैजान्छौँ,’ ओलीले भन्नुभयो । उहाँले लोकतन्त्रविरुद्ध आवाज उठाउनेहरू नै अहिले ठूलो कुरा गरिरहेको आरोप लगाउनुभयो । त्यस्तै, प्रधानमन्त्री ओलीले आफू ६ दशकदेखि देश बनाउने अभियानमा लागेको र देशको सम्पत्तिमा लोभ नगरेको धारणा राख्नुभयो । ‘मैले आर्जन गरेको बाहेक अरू सम्पत्तिमा लोभ गरेको छैन । न म भ्रष्टाचार गर्छु, न गर्न दिन्छु,’ उहाँले भन्नुभयो ।

ओली र मलाई नजिक ल्याउने काममा क्याप्टेन थापाको योगदान छ : सभापति देउवा
नेपाली कांग्रेसका सभापति एवं पूर्वप्रधानमन्त्री शेरबहादुर देउवाले वर्तमान सत्ता गठबन्धन बनाउन क्याप्टेन रामेश्वर थापाको ठूलो योगदान रहेको बताउनुभएको छ । शनिबार क्याप्टेन थापाद्वारा लिखित पुस्तकको विमोचन कार्यक्रमलाई सम्बोधन गर्दै उहाँले यस्तो बताउनुभएको हो । कार्यक्रममा बोल्दै सभापति देउवाले क्याप्टेन रामेश्वर थापाले आफू र प्रधानमन्त्री ओलीलाई नजिक ल्याउने काम गरेको बताउनुभयो । क्याप्टेन थापा सबैलाई सहयोग गर्ने व्यक्ति भएको भन्दै प्रशंसा गर्नुभयो । उहाँले भन्नुभयो, ‘उहाँले पहिल्यैदेखि मलाई व्यक्तिगत रूपमा पनि धेरै ठूलो मद्दत गर्नुभएको छ । पार्टीलाई पनि । यसकारण रामेश्वर थापाजीलाई केपी शर्मा ओलीको पार्टीको नजिकको भने तापनि उहाँ सबैको समर्थक, सबैलाई सहयोग गर्ने व्यक्ति हो । मैले त्यसै रूपमा लिएको छु । यो कुरा लुकेर लुक्ने कुरा छैन । ओलीजी र मेरो बीचमा नजिक ल्याउने काममा, यो गठबन्धन बनाउने काममा पनि उहाँको धेरै ठूलो योगदान छ । धेरै ठूलो मद्दत गर्नुभएको छ । यसकारण म हाम्रो पार्टीको तर्फबाट हार्दिक-हार्दिक धन्यवाद दिन चाहन्छु ।’

क्याप्टेन थापाको ‘इन्टु द फायर’ विमोचित
क्याप्टेन रामेश्वर थापाको अंग्रेजी पुस्तक ‘इन्टु द फायर’ विमोचन भएको छ । द्वन्द्वकालमा नेपाली सेनाको एमआई-१७ हेलिकप्टरका प्रथम इन्स्ट्रक्टर क्याप्टेन रामेश्वर थापाको युद्धस्थलका उद्धार भोगाइ एवं अनुभूतिमा आधारित अंग्रेजी पुस्तक ‘इन्टु द फायर’ काठमाडौं हल्चोकमा एक समारोहबीच विमोचन भएको हो । प्रधानमन्त्री केपी शर्मा ओलीले पुस्तकको विमोचन गर्नुभएको हो । विमोचन समारोहमा नेपाली कांग्रेसका सभापति शेरबहादुर देउवा र र ॐ आदि बाल गुरु पनि सहभागी हुनुहुन्थ्यो ।