नेम्वाङको नाममा प्रतिष्ठान बन्छ, कसैलाई कब्जा गर्न दिइन्न : ओली

काठमाडौं । प्रधानमन्त्री एवं नेकपा एमालेका अध्यक्ष केपी शर्मा ओलीले संविधानसभा अध्यक्ष स्व. सुवासचन्द्र नेम्वाङको नाममा केन्द्रीय प्रतिष्ठान निर्माण गर्ने घोषणा गर्नुभएको छ । नेम्वाङको प्रथम स्मृति दिवसका अवसरमा बुधबार एमाले पार्टी केन्द्रीय कार्यालयमा सम्बोधन गर्दै अध्यक्ष ओलीले उक्त घोषणा गर्नुभएको हो । उहाँले नेम्वाङका स्मृति ताजा राख्न र उहाँका आदर्शलाई पछ्याएर केन्द्रीय प्रतिष्ठान निर्माण गर्ने बताउनुभयो ।

अध्यक्ष ओलीले प्रतिष्ठानको बारेमा सम्पूर्ण निर्णय भने शुक्रबार बस्ने पार्टीको सचिवालय बैठकले गर्ने स्पष्ट पार्नुभयो । प्रतिष्ठान बनायो छोड्यो गर्ने नभई नेताहरूका नामका प्रतिष्ठान नेताहरूको आदर्श, विचार, हिँडेको बाटो, व्यवहार, आचरण, गतिशील इच्छा, आकंक्षा र प्रवृत्तिअनुरूप हुनुपर्ने उहाँको भनाइ थियो ।

‘पुष्पलाल प्रतिष्ठान एमालेले बनाएको हो, माधवले हैन’
पुष्पलाल प्रतिष्ठान पार्टीले बनाए पनि अहिले पूर्व-प्रधानमन्त्री माधवकुमार नेपालले निजी सम्पत्तिझैँ कब्जा जमाएको उहाँको आरोप थियो । अध्यक्ष ओलीले पुष्पलालले पार्टी नछोडेको भन्दै नेपालले पार्टी छोडेपछि एमालेले नै पुष्पलाल प्रतिष्ठानको संरक्षणको जिम्मेवारी पाउनुपर्ने बताउनुभयो । ‘नेताका नाममा प्रतिष्ठान हुने, तर त्यो प्रतिष्ठान देशका लागि नहुने । अनि कसैले त्यसलाई कब्जा गरेर बस्ने ? पुष्पलाल प्रतिष्ठान पार्टीले बनाएको हो, खेलो फड्को गर्दै माधव नेपालजस्ता मान्छेहरू अध्यक्ष भए,’ उहाँले भन्नुभयो, ‘पार्टीलाई त्यो प्रतिष्ठान सरक्क छोड्नुपर्ने ठाउँमा निजी प्रपर्टी जस्तो पुष्पलाल प्रतिष्ठान बोकेर लिएर जाने ?’

अध्यक्ष ओलीले नेताहरूको नाममा प्रतिष्ठान, विद्यालयहरू खोलेर दुरुपयोग गरिएको भन्दै यस्ता कुरालाई समयक्रममा आन्दोलन, जनता, देशको हित र पक्षमा उभ्याउनुपर्ने जिकिर गर्नुभयो । उहाँले प्रतिष्ठानहरू कसैलाई कब्जा गर्न नदिइने बताउनुभयो । मदन भण्डारी स्कुलका नाममा पनि दुरुपयोग गरेको उहाँले आरोप लगाउनुभयो । ‘अर्को एकजनाले मदन भण्डारी अन्तर्राष्ट्रिय स्कुल भनेर खोल्या छ । अनि मदन भण्डारीका विचारभन्दा फरक कुराहरू सिकाउने गरेर त्यसको दुरुपयोग गरेको छ,’ उहाँले भन्नुभयो, ‘यस्ता कुरालाई समयक्रममा हामीले आन्दोलनको हितमा, जनता, देशको पक्षमा उभ्याउनुपर्छ । कसैलाई कब्जा गरेर बस्न दिनुहुँदैन ।’

‘संविधान जारी हुनुमा नेम्वाङको भूमिका महत्वपूर्ण’
अध्यक्ष ओलीले संविधान जारी गर्न संविधान सभाका अध्यक्ष नेम्वाङको भूमिका महत्वपूर्ण रहेको बताउनुभयो । दोस्रो संविधानसभा असफल हुन नदिन र संविधान जारी गर्नमा नेम्वाङको अत्यन्त महत्वपूर्ण र सकारात्मक भूमिका रहेको स्पष्ट गर्दै अध्यक्ष ओलीले भन्नुभयो, ‘नेम्वाङले पदीय रूपमा मात्र नभई वैचारिक रूपमा पनि संविधान सभाको अध्यक्षता गरेको कुरा सधैँ देशले सम्झिरहने छ । नेम्वाङ योग्य कानुनविद्, संविधानविद्का साथै लोकतन्त्रको साँचो अनुयायी हुनुहुन्थ्यो । उहाँको निधनबाट परिवार र हाम्रो पार्टीलाई असाधारण क्षति पुगेको छ नै, देशले जनपक्षीय र देशभक्त व्यक्तित्व गुमाएको छ ।’

अध्यक्ष ओलीले नेम्वाङले देखाएको आदर्श र उद्देश्य साकार पार्ने प्रण गर्दै उहाँप्रति श्रद्धाञ्जलि व्यक्त गर्नुभएको थियो । सो अवसरमा नेम्वाङको तस्बिरमा एमाले नेताहरूसहित परिवारजनले माल्यार्पण गरेका थिए । एमालेका तत्कालीन केन्द्रीय उपाध्यक्ष नेम्वाङको गत वर्ष २६ भदौमा निधन भएको थियो ।