बर्दघाटमा सुत्केरी बिदामा सट्टा शिक्षक राखेर पठनपाठन नियमित गरिने

हिमालय टाइम्स

९ आश्विन २०८१, बुधबार २०:३५

Read Time = 3 mins

प्रदेश समाचार

लुम्बिनी प्रदेश

A A- A+

नवलपरासी। पश्चिम् नवलपरासीको बर्दघाट नगरपालिकाले सामुदायिक विद्यालयहरुमा शिक्षिका सुत्केरी बिदा बसेको अवस्थामा सट्टा शिक्षक राखेर पठनपाठन गरिने भएको छ ।

शिक्षिकाहरुले सुत्केरी बिदा ९८ दिन पाउने गर्दछन् सो अवधि सम्मका लागि नयाँ शिक्षक नियुक्त गरी सट्टा भर्ना गर्ने नीति ल्याएको हो।

शिक्षक नियुक्तिका गर्न नीति तथा कार्यक्रम मार्फत पारिश्रमिकका लागि आर्थिक बर्ष ०८१/८२ को बजेटमै सुनिश्चितता गरिएको नगरपालिकाले जनाएको छ । बर्दघाटका कतिपय बिधालयहरुमा महिला शिक्षक सुत्केरी हुँदा नियमित अध्यापन रोकिने र कतिपय अवस्थामा बिषयगत शिक्षक नहुने अवस्था समेत रहने हुनाले पठनपाठनमा असहज हुने र अन्य शिक्षकहरुलाई भार पर्ने भएकाले यो कार्यक्रमलाई समेटिएको नगरप्रमुख शम्भुलाल श्रेष्ठले बताउनुभयो । 'झण्डै तीन महिनाका लागि विद्यालयले शिक्षक नियुक्ति गर्न सक्नेछन,अध्यापन नियमित हुँदा पठनपाठनमा समस्या नहुने र केही समयका लागि भएपनी शैक्षिक बेरोजगारहरु समेत आवद्द हुन सक्ने हुँदा यसले दोहोरो फाईदा पुग्ने बिश्वास लिएका छौं' नगरप्रमुख श्रेष्ठले भन्नुभयो ।

सम्बन्धित तहको सट्टा शिक्षक राख्दा बिद्यालयहरुले दैनिक ज्यालादारीमा शिक्षक नियुक्ति गर्न सक्ने शिक्षा शाखा प्रमुख लोकराज पन्थिले बताउनु भयो । सुत्केरी बिदामा बसेका शिक्षिका र कर्मचारीको सट्टामा काम गर्ने सट्टा शिक्षकलाई नगरपालिकाको कोषबाट तलब व्यवस्था गरीएको छ।

बर्दघाट नगरपालिकाले चालू आर्थिक बर्षमा सबै भन्दा बढी बजेट शिक्षामा बिनियोजन गरेको छ । चालू शैक्षिक सत्रलाई शैक्षिक सुधार बर्षको रुपमा अघि बढाईने नगरपालिकाले जनाएको छ ।

यो खबर पढेर तपाईलाई कस्तो महसुस भयो ?