सयदिने अभियानले आमपार्टी पंक्तिमा थप उत्साह ल्याएको छ : शंकरप्रसाद डाँगी, सभापति, नेपाली कांग्रेस दाङ

नेपाली कांग्रेस दाङले यही आज(शुक्रबार) तेस्रो जिल्ला सम्मेलन गर्दैछ । वडा सम्मेलनदेखि पालिका सम्मेलन र क्षेत्र प्रदेश सम्मेलनपछि जिल्ला सम्मेलनको अन्तिम तयारी पूरा भइसकेको दाङ कांग्रेसले जनाएको छ । घोराहीको बहुद्देश्यीय सभाहलमा सम्पन्न हुने तेस्रो जिल्ला सम्मेलनको उद्घाटनमा नेपाली कांग्रेसका महामन्त्री विश्वप्रकाश शर्मालगायत केन्द्रीय सदस्यहरू सहभागी हुने कार्यक्रम छ । आसन्न जिल्ला सम्मेलनको तयारी र दाङ कांग्रेसले थालेका अभियानका सन्दर्भमा नेपाली कांग्रेस दाङका सभापति शंकरप्रसाद डाँगीसँग दाङ संवाददाता विवेक खड्काले गर्नुभएको कुराकानी :-

दाङ कांग्रेसको तेस्रो जिल्ला सम्मेलनको तयारी कहाँ पुग्यो ?
हामीले जिल्लाका एक सयवटै वडामा वडा सम्मेलन, दशवटै पालिकामा पालिका सम्मेलन, ६ वटै प्रदेश निर्वाचन क्षेत्रमा प्रदेश सम्मेलन सम्पन्न गरेसँगै जिल्ला सम्मेलन गर्दैछौं । जिल्ला सम्मेलनको उद्घाटन गर्न पार्टी महामन्त्री विश्वप्रकाश शर्मालगायतका नेता आउँदै हुनुहुन्छ । सम्मेलनमा दाङ कांग्रेसले यो वर्ष सम्पन्न गरेका हरेक गतिविधिका विषयमा वार्षिक सांगठनिक प्रतिवेदन तथा आर्थिक प्रतिवेदनसमेत प्रस्तुत गरिनेछ ।

जिल्ला सम्मेलनसम्म आइपुग्दा जिल्ला नेतृत्वले के-कस्ता अभियान जिल्लामा सञ्चालन गर्नुभयो ?
हामी जिल्ला सम्मेलनसम्म आइपुग्दा यही वर्ष हामीले नेपाली कांग्रेसको केन्द्रीय समितिको निर्देशनअनुसार केन्द्रीय सदस्यको उपस्थितिमा सयदिने अभियानलाई जिल्लाका निर्वाचन क्षेत्र, प्रदेश निर्वाचन क्षेत्र, पालिका तथा वडासम्मै सम्मेलनका काम सम्पन्न ग¥यौं । यसमा जिल्ला नेतृत्वले हरेक क्षेत्रमा अभिभावकीय नेतृत्व प्रदान गरेको पनि स्मरण गराउन चाहन्छु । साथै संगठन सुदृढीकरणको अभियानसँगै क्रियाशील सदस्यता नवीकरणका कामहरू पनि मोटामोटी सम्पन्न भएका छन् । केही वडामा क्रियाशील सदस्यताका विषयमा देखिएका विवादहरू मिलाइसकेका छौं । केही वडामा भएका एक-दुई समस्यालाई अब पार्टी जिल्ला नेतृत्व र सम्बन्धित वडा प्रतिनिधि बसेर मिलाउने अन्तिम तयारीमा पनि छौं ।

अहिले जिल्लामा पार्टी नेतृत्व र जनप्रतिनिधिबीचको अन्तरसम्बन्ध कस्तो बनाउनुभएको छ ?
पार्टी नेतृत्वले गाइडलाइन बनाउने हो । काम गर्ने भनेको त जनप्रतिनिधिहरूले हो । हामीले यो विषयमा पटक–पटक जनप्रतिनिधिसँग बसेर बहस चलाउने गरेका पनि छौं । जनप्रतिनिधिहरूलाई काम गर्न कहीँ कतै असहजता भए त्यसको व्यवस्थापनमा पनि जिल्ला पार्टी पंक्ति हरतवरले लागिरहेको छ । वडा तहदेखि संघीय सांसदसम्मै हामीले यो विषयमा बहस गर्ने गरेका छौं । जनप्रतिनिधि र पार्टीका सम्बन्धमा जिल्लामा केही समस्या छैन । सहकार्य भइरहेको छ तर सीमित स्रोत साधनमा पनि कसरी जनताका अपेक्षालाई सम्बोधन गर्न सकिन्छ भनेर जनप्रतिनिधिहरूलाई आवश्यक परामर्श दिने काम भने भइरहेको छ ।

सयदिने अभियान पनि सम्पन्न गरिसक्नुभयो, यसको ‘फिडब्याक’ कस्तो पाउनुभयो ?
सयदिने अभियानले अहिले आमपार्टी पंक्तिमा थप उत्साह ल्याएको छ । थप उत्साह ल्याएको हामीले अनुभूति गरेका छौं । कांग्रेस सरकारमा रहँदा र नरहँदा पनि केन्द्रीय राजनीतिमा गरेका अभियानका विषयमा सयदिने अभियानमा आमकांग्रेसजनले जानकारी पनि पाउनुभएको छ । अझ भन्ने हो भने कांग्रेसले आफूले गरेका काम जनतालाई भन्न नसक्दा केही समस्या सिर्जना भएको पनि हो । पार्टीले गरेका नवीनतम काम जनतालाई भन्न पनि सयदिने अभियान हो । यसलाई हामीले वैशाख महिनामा एक पटक बृहत् समीक्षा गर्ने पनि योजना बनाएका छौं ।

तेस्रो सम्मेलनको पूर्वसन्ध्यामा आमकांग्रेसजनलाई के भन्नुहुन्छ ?
हामी जिल्लाको तेस्रो सम्मेलनको पूर्वसन्ध्यामा छौं । बिहीबार घोराहीको बहुद्देश्यीय सभाहलमा नेपाली कांग्रेसका महामन्त्री विश्वप्रकाश शर्मा आउँदै हुनुहुन्छ । यसमा सक्रिय सहभागिताका लागि आम जिल्ला नेतृत्व, क्षेत्रीय सभापति, प्रदेश सभापति, नेपाली कांग्रेसका विभिन्न भ्रातृ संस्था, शुभेच्छुक संघसंस्थाका प्रतिनिधि तथा पदाधिकारीलगायत आमकांग्रेसजनलाई चुल्है निम्तो दिन चाहन्छु ।