काठमाडौं । एसिसी प्रिमियर कप एकदिवसीय अन्तर्राष्ट्रिय क्रिकेट प्रतियोगितामा संयुक्त अरब इमिरेट्स (युएई)ले सिंगापुरलाई पराजित गरेको छ । कीर्तिपुरस्थित त्रिभुवन विश्वविद्यालयको क्रिकेट मैदानमा आइतबार भएको समूह ‘बी’ अन्तर्गतको खेलमा युएईले सिंगापुरलाई दुई सय एक रनको फराकिलो अन्तरले पराजित गर्दै विजयी भएको हो । यस जितसँगै युएईले चार अंक जोडेको छ ।
युएईले दिएको ४७२ रनको विजयी लक्ष्य पछ्याएको सिंगापुर निर्धारित ५० ओभरमा नौ विकेट गुमाएर २७० रनमा समेटियो । सिंगापुरका लागि मनप्रित सिंहले सर्वाधिक ६६ रनको योगदान दिनुभयो । त्यस्तै, थिलिप उमीदुराईले ५२ रन जोड्नुभयो भने सुरेन्द्र, चन्द्रमोहन र कप्तान अरित्र दत्तले समान ३८/३८ रन बनाउनुभयो । युएईका लागि सचित शर्मा, कात्तिक मैयप्पन र आयन अफजल खानले समान दुई/दुई विकेट लिनुभयो ।
त्यसअघि टस जितेर पहिला ब्याटिङ रोजेको युएईले निर्धारित ५० ओभरमा सबै विकेट गुमाउँदै ४७१ रनको योगफल बनाएको थियो । युएईका लागि युवा ब्याटर वृत्य अरविन्दले सर्वाधिक १७४ रनको योगदान दिनुभयो । १३३ बल खेल्नुभएका उहाँले १७ चौका र सात छक्काको मद्दतमा १७४ रन जोड्नुभएको हो ।
त्यसैगरी युएईका कप्तान मोहम्मद वासिमले १६० रन जोड्नुभयो । उहाँले ८२ बलमा नौ चौका र १६ छक्काको मद्दतमा १६० रन बनाउनुभयो । आयन अफजल खानले ७४ रन बनाउनुभयो । उहाँले ५० बलमा नौ चौका र तीन छक्कासहित ७४ रन बनाउनुभएको हो ।
यस्तै, युवा ओपनर आर्यन लाक्रा सात बलमा दुई चौकासहित १२ रनमा आउट हुनुभयो । आसिफ खान ११ तथा रोहन मुस्तफा तीन रनमा आउट हुनुभयो । बलिङतर्फ सिंगापुरका आदित्य भार्गवले चार विकेट लिनुभयो भने रमेश कलिमुथुले तीन विकेट हात पार्नुभयो । त्यस्तै, विनोथ भास्करनले दुई विकेट लिँदा मनप्रित सिंहले एक विकेट लिनुभयो ।
प्रतियोगिताअन्तर्गत नेपालले सोमबार (आज) मूलपानी क्रिकेट मैदानमा साउदी अरेबियासँग खेल्नेछ ।
Like
Love
Happy
Surprised
Sad
Excited
Angry
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच