![विमानस्थल र कारागारको सुरक्षाको जिम्मा सेनालाई](https://ehimalayatimes.com/wp-content/uploads/2022/11/nepali-sena.jpg)
त्रिभुवन अन्तर्राष्ट्रिय विमानस्थल भन्सार कार्यालयले वैदेशिक रोजगारीबाट फर्किने कामदारलाई दोस्रो व्यक्तिको सामान बोकेर नआउन आग्रह गरेको छ । विदेशबाट फर्कने नेपालीहरूलाई मोबाइल, टिभी, घडी, सुनजस्ता सामान अरूको बोकेर आउने गरेका कारण त्यो काम नगर्न कार्यालयले सम्बन्धित पक्षलाई आग्रह गरेको जनाएको छ ।
नेपालको विमानस्थलसम्म पु¥याइदिन भन्दै मोबाइल, टिभी, घडी र सुनलगायत अन्य इलेक्ट्रोनिक सामान पठाउने क्रम बढेको भन्दै कार्यालयले अरूको सामान बोकेर आएको सूचना पाए सामान जफत गर्नेसमेत जानकारी दिएको छ । वैदेशिक रोजगारीबाट फर्किने नेपाली कामदारलाई विमानस्थलमा अपरिचित व्यक्तिहरूले विभिन्न प्रलोभनमा पारी इलेक्ट्रोनिक सामान, सुन र अन्य सामग्री बोकेर पठाउने गरेको कार्यालयका प्रवक्ता अम्बिकाप्रसाद खनालले बताउनुभयो ।
पछिल्लो समय विदेशबाट नेपाल फर्कनेहरूले साथमा ल्याउन पाउने गरी कानुनले तोकेभन्दा बढी सामानहरू ल्याउने क्रम बढेको छ । जसकारण पनि भन्सार अथवा कर छली भइरहेको उहाँले जानकारी दिनुभयो । ‘विदेशबाट फर्किंदा झिटीगुण्टा निर्देशिकामा तोकिएअनुसार नै सामान लिएर आउनुपर्ने हुन्छ । यदि खर्चको प्रलोभनमा अरूको सामान बोकेर आएको भए कानुनअनुसार सामान जफत र कारबाही पनि हुन्छ ।’ उहाँले भन्नुभयो, ‘कतिपय व्यक्तिहरूले टिभी, घडीजस्ता चिजमा सुन लुकाएर पठाउने गर्दा विदेशमा काम गरेर फर्किएकाहरू कानुनी झमेलामा समेत परेका छन् । कानुनले तोकेभन्दा बढी सामान ल्याउनेहरूलाई सोधपुछ गर्दा नचिनेको र कतिपयले भने साथीभाइको सामानसमेत बोकेर आउँदा भन्सार कार्यालयमा झमेला हुने गरेको छ ।’
सुन, मोबाइल, ल्यापटप, घडी लगायतका सामान ल्याउँदा विमानस्थलको भन्सार कार्यालयको यात्रु जाँच पास शाखामा रहेको स्वघोषणा कक्षमा स्वयं घोषणा गर्नुपर्छ । यदि यी सामान अरूको भए तत्काल कार्यालयले जफत र कानुनअनुसार कारबाही अगाडि बढाउने उहाँको भनाइ छ ।
केही दिनअघि मात्र विमानस्थलको आगमन कक्षमा टिभीभित्र लुकाई सुन ल्याएका एकजना विमानस्थलमा सुरक्षा जाँचको क्रममा पक्राउ परेका छन् । त्यसैले विमानस्थल भन्सार कार्यालयले कानुनले तोकेभन्दा बढी समान नल्याउन आग्रह गरिरहेको छ । यस्तो सामानको सुरक्षा जाँचको प्रक्रिया झन्झटिलो हुने र समय पनि लामो लाग्ने भएकालाई यात्रुलाई असुविधा नहोस् भनेर यस्तो अनुरोध गरिएको कार्यालयले जनाएको छ । आफूसँग भएका सामानको स्वघोषणा गरेर भन्सार प्रक्रियामा अघि बढ्दा भन्सार प्रशासन तथा सुरक्षा निकायको झमेलामा नपर्नेसमेत कार्यालयले जनाएको छ ।
विमानस्थल भन्सार कार्यालयले विदेशबाट आउँदा सकेसम्म इमरजेन्सी लाइन, पावर ब्यांक, आइरन, हेयर ड्रायर, मिक्स्चर, पानी तान्ने मेसिन लगायतका सामान नल्याउन आग्रह गरेको छ । दशैँ आउन एकसाता बाँकी हुँदा बाहिर वैदेशिक रोजगारीबाट फर्किने कामदारको घुइँचो छ । अहिले दैनिक चार हजार जनासम्म वैदेशिक रोजगारीबाट फर्किने गरेका छन् । विदेशबाट आउनेले निश्चित परिणाममा ल्याएको सामानमा सरकारले भन्सार छुट दिने गरेको छ । तर, तोकिएभन्दा बढी सामान ल्याएमा भने भन्सार तिर्नुपर्ने हुन्छ । ‘झिटीगुण्टा आदेश’अनुसार मात्र सामान ल्याउन त्रिभुवन अन्तर्राष्ट्रिय विमानस्थल र गौतमबुद्ध अन्तर्राष्ट्रिय विमानस्थल अन्तर्गतको अध्यागमन विभागले जनाएको छ । वैदेशिक रोजगारीमा गएका, अध्ययन र विदेशमै विभिन्न पेसा गरी बस्दै आएका नेपाली दशैँ मनाउन फर्किन थालेका छन् । विदेशबाट फर्किंदा परिवार, आफन्त र साथीभाइलाई उपहार लिएर आउने गर्छन् । जसका कारण पनि अरूको सामान धेरै बोकेर आउने गरेका छन् । दशैँ, तिहार जस्ता ठूला चाडपर्व नजिकिएसँगै नेपालका दुईवटा अन्तर्राष्ट्रिय विमानस्थलमा विदेशबाट फर्किने नेपालीहरूको भिडभाड बढ्न थालेको छ ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच