काठमाडौं । नेपाल उद्योग परिसंघ (सिएनआई) संयुक्त राष्ट्रसंघ पुँजी विकास कोष (युएनसिडिएफ) को लगानी तथा व्यापार अभिवृद्धिमा सहयोग गर्न ‘अगोरा’ प्लेटफर्ममा आबद्ध भएको छ । अगोरा विकासशील, उदीयमान र सीमावर्ती बजारका उद्यमी, लगानीकर्ता र विज्ञसँग जोड्ने वेब प्लेटफर्म परियोजना हो । शुक्रबार सिएनआई अध्यक्ष राजेशकुमार अग्रवाल र युएनसिडिएफका उपकार्यकारी सचिव जेभियर मिचोनले अगोरा प्लेटफर्म सञ्चालन तथा आबद्धतासम्बन्धी सम्झौता आदानप्रदान गर्नुभएको हो ।
आबद्धतासँगै सिएनआईले नेपाली उद्योगका लागि लगानी प्रवद्र्धनलाई बढावा दिन अगोरा प्लेटफर्र्म अघि बढाउनेछ । उत्पादन तथा सेवामूलक उद्योगको प्रतिनिधिमूलक संस्था सिएनआईले अगोराको घरेलु परियोजनाको निरीक्षण गर्नेछ । साथै नेपालका उद्यमी एवं व्यवसायीलाई उद्यमशीलता विकासका लागि आवश्यक पर्ने वित्तीयसहित विशेषज्ञता दिनेछ ।
अगोराले देशको औद्योगिक र संस्थागत क्षेत्रमा रोजगारीका अवसर सिर्जना गर्दै स्वदेशी एवं विदेशी लगानी प्रवद्र्धन गर्ने सिएनआईको दृष्टिकोणलाई सहयोग गर्ने बताइएको छ ।
सिएनआई अध्यक्ष अग्रवालले युएनसिडिएफसँगको सहकार्यबाट नेपालमा लगानीको परिदृश्य रूपान्तरण गर्न अगोरा प्लेटफर्म महत्वपूर्ण हुने विश्वास व्यक्त गर्नुभएको छ । संयुक्त राष्ट्र संघको पुँजी विकास कोषले अघि सारेको अगोरामा नेपाली वस्तु आबद्ध गराउने अन्तर्राष्ट्रिय बजारमा पहुँच पुर्याउन महत्वपूर्ण हुने उहाँको भनाइ छ । सिएनआईले मेक इन नेपाल स्वदेशी अभियानमार्फत् नेपाली वस्तु प्रवद्र्धनमा जोड दिँदै आएको भन्दै अग्रवालले अगोरा प्लेटफर्ममार्फत् अन्तर्राष्ट्रिय बजारमा पहुँच पुग्नेमात्रै नभई अन्तर्राष्ट्रिय व्यावसायिक सञ्जालमा पुग्न प्रभावकारी माध्यम बन्ने बताउनुभयो । साथै उहाँले अगोराले सूचना प्रसारणमा भएको कमी पूरा गरी व्यवसाय, उद्यमी र समुदायलाई पुँजी निर्माणमा समेत योगदान गर्ने विश्वास व्यक्त गर्नुभयो ।
युएनसिडिएफका उपकार्यकारी सचिव मिचोनले सिएनआईसँगको अर्थपूर्ण सहकार्य र साझेदारीले नेपाली वस्तुको अन्तर्राष्ट्रिय बजारमा पहुँच विस्तार गर्न निकै सहयोग हुने बताउनुभयो । विदेशी लगानीकर्तालाई ‘किन नेपाल’ बाट ‘किन नेपालमा नगर्ने’ भन्ने मानसिकतामा परिवर्तन ल्याउन मद्दत गर्न सक्नेसमेत उहाँले बताउनुभयो ।
समान विचारधाराका साझेदारसँगको सहकार्यमा युएनसिडिएफले सन् २०२३ को अन्त्यसम्ममा करिब २० देश पुग्ने लक्ष्यसाथ अगोरालाई विश्वव्यापी सार्वजनिक हितका रूपमा अघि बढाएको छ । लगानीकर्ताले उदीयमान बजार अवसर खोजी रहन्छन्, अत्याधुनिक एल्गोरिदम र आर्टिफिसियल इन्टेलिजेन्स प्रयोग गरेर उद्यमी एवं लगानीकर्ताबीचको सम्बन्ध प्रगाढ बनाउन अगोराले उनीहरूको हकहित सुनिश्चित गर्न मद्दत गर्ने उहाँको भनाइ थियो ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच