काठमाडौं । मौद्रिक नीतिको पहिलो त्रैमासिक समीक्षाको पूर्वसन्ध्यामा नेपाल राष्ट्र बैंकका गभर्नर महाप्रसाद अधिकारी र अर्थमन्त्री डा. प्रकाशशरण महतबीच बिहीबार ‘वान टु वान’ भेटवार्ता भएको छ । राष्ट्र बैंक चालु आर्थिक वर्ष २०८०/०८१ को मौद्रिक नीतिको पहिलो त्रैमासिक समीक्षाको तयारीमा रहेको छ । दुवैबीच वान टु वान भेटवार्ता भएको अर्थमन्त्रीको सचिवालयले जनाएको छ । सो अवसरमा अर्थमन्त्री महतले वित्त नीति र मौद्रिक नीतिको समन्वय गरेर समीक्षा गर्न गभर्नरलाई आग्रह गरेको बताइएको छ ।
मौद्रिक नीति प्रभावकारी बनाउने, अप्ठ्यारामा परेको निजी क्षेत्रलाई सहजीकरण गर्ने र अर्थतन्त्र चलायमान बनाउने गरी मौद्रिक नीतिको समीक्षा गर्न गभर्नर अधिकारीसँग छलफल भएको अर्थमन्त्रीको सचिवालय स्रोतले जनाएको छ । अर्थमन्त्री डा. महतले अर्थतन्त्र चलायमान बनाउन र निजी क्षेत्रको मनोबल बढाउन ब्याजदर घटाउने गरी व्यवस्था गर्न गभर्नरसमक्ष आग्रह गर्नुभएको बताइएको छ ।
यसैबीच राष्ट्र बैंकले एकैपटक झण्डै चार दर्जन कर्मचारी सरुवा गरेको छ । राष्ट्र बैंकले पाँचजना कार्यकारी निर्देशकसहित ४६ जना कर्मचारी सरुवा गरेको सहायक सूचना अधिकारी डा. भागवत आचार्यले जानकारी दिनुभयो । आचार्यका अनुसार गभर्नर अधिकारीले बुधबार कार्यकारी निर्देशक, उपनिर्देशक र सहायक निर्देशकको सरुवा गर्नुभएको हो । गैरबैंक वित्तीय संस्था पर्यवेक्षण विभाग प्रमुख प्रदीपराज पौड्याललाई मुद्रा विभागमा सरुवा गरिएको छ भने सूचना प्रविधि विभागका कार्यकारी निर्देशक रामबहादुर मानन्धरलाई गैर-बैंक वित्तीय संस्था पर्यवेक्षण विभागको जिम्मेवारी दिइएको छ । मुद्रा व्यवस्थापन विभाग प्रमुख नरेश शाक्यलाई सूचना प्रविधि विभागमा सरुवा गरिएको छ ।
बैंकिङ विभाग सम्हाल्ने गरी कार्यकारी निर्देशक विश्रुत थापालाई जिम्मेवारी दिइएको छ । थापा वित्तीय संस्था पर्यवेक्षण विभाग प्रमुख हुनुहुन्थ्यो । बैंकिङ विभाग प्रमुख दयाराम शर्मालाई भने वित्तीय संस्था सुपरीवेक्षणमा सरुवा गरिएको आचार्यले जानकारी दिनुभएको छ ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच