काठमाडौं । नेपाल राष्ट्र बैंकले चालु आर्थिक वर्ष २०८०/०८१ को मौद्रिक नीतिको पहिलो समीक्षा शुक्रबार सार्वजनिक गर्ने भएको छ । बुधबार अर्थसमिति बैठकमा गभर्नर महाप्रसाद अधिकारीले मौद्रिक नीति समीक्षा शुक्रबार आउने जानकारी गराउनुभएको हो । अर्थसचिव बाहिर भएर ढिलाइ भएको उहाँको भनाइ थियो ।
साथै गभर्नर अधिकारीले मुलुकको अर्थतन्त्र शिथिल हुनुका मुख्य तीन कारण रहेको औंल्याउनुभएको छ । निर्माण क्षेत्रमा माग कम हुँदा त्यस्ता उद्योगहरूको उत्पादन ३५ देखि ४० प्रतिशतमा सीमित भएकाले पनि अर्थतन्त्रमा शिथिलता देखिएको उहाँले बताउनुभयो । त्यसैगरी दुर्गा प्रसाईंलगायतको आन्दोलनले पनि सामाजिक तनाव उत्पन्न गरेको र बैंकहरूले समेत कर्जा लगानी गर्न डराउनु परेकाले पनि समस्या आएको गभर्नर अधिकारीले बताउनुभयो ।
त्यसैगरी सहकारी क्षेत्रमा समस्या आएका कारण पनि साना तथा मझौला व्यवसायको क्षेत्रमा ठूलो प्रभाव देखिएको उहाँले दाबी गर्नुभयो । गभर्नर अधिकारीका अनुसार सरकारले सहकारीलाई तीनखम्बे अर्थनीतिभित्र राख्दा धेरै सर्वसाधारणले त्यसलाई पत्याए तर आवश्यक नियमन नहुँदा समस्यामा प¥यो । जसका कारण पनि साना तथा मझौला क्षेत्रमा पुँजी स्रोतका रूपमा रहेका सहकारीमा समस्या आउँदा ठूलो प्रभाव देखियो । त्यस्तै गभर्नर अधिकारीले राष्ट्र बैंकबाट अनुमतिप्राप्त लघुवित्त कम्पनीबाट समेत ३३ लाख सर्वसाधारणले कर्जा पाइरहेकाले बैंकिङ पहुँच नपुगेको भन्न नमिल्ने जिकिर गर्नुभयो । हाल व्यवसाय सञ्चालनको प्रकृति फेरिएको तर सोहीअनुसार व्यवसायीले रणनीति बनाउन नसक्दा पनि सटर र भाडाका पसलमा राखिएका व्यवसाय समस्यामा परेको पनि उहाँको तर्क थियो ।
बैंकद्वारा शान्ति सुरक्षा माग
दुर्गा प्रसाईंका कार्यकर्ताको अराजक गतिविधिका कारण बैंकका कर्मचारी आतंकित भएको भन्दै नेपाल इन्भेष्टमेन्ट मेगा बैंकले शान्ति सुरक्षाको प्रत्याभूतिका लागि राष्ट्र बैंकलाई पत्राचार गरेको छ । मंगलबार प्रसाईंको गृहजिल्ला झापाको बिर्तामोडमा उनका कार्यकर्ताले नेपाल इन्भेष्टमेन्ट मेगा बैंकका कर्मचारीलाई घरैबाट उठाएर प्रहरी चौकी पुर्याएका थिए ।
परियोजना असफल हुँदा पनि स्वीकृति भएको ऋण बैंकले नदिएको भन्दै प्रसाईंका कार्यकर्तासमेत रहेका ऋणी राजेश बाँस्कोटाको नेतृत्वमा गएको समूहले बिर्तामोड शाखाका सह-प्रबन्धक दिपेश पनेरुको घरमा पुगेर अपहरणको शैलीमा उठाएर प्रहरीकहाँ पुर्याएका हुन् । प्रसाईंका कार्यकर्ताको अराजक र अभद्र व्यवहारका कारण बैंकका कर्मचारीले असुरक्षित महसुस गरेको भन्दै इन्भेष्टमेन्ट मेगा बैंकले शान्ति सुरक्षाको माग गर्दै पत्र पठाएको राष्ट्र बैंकका प्रवक्ता डा. गुणाकर भट्टले पुष्टि गर्नुभएको छ ।
उक्त बैंकका अनुसार बैंकको झापाको बिर्तामोडमा रहेको शाखाले बाँस्कोटाको फर्मलाई पाँच करोड ऋण स्वीकृत भएकोमा तीन करोड २७ रुपैयाँ दिइसकेको छ । बाँस्कोटाले बैंकमा बुझाएको योजनाअनुसार व्यवसाय गर्न सकेका छैनन् । जसकारण कर्जाको सीमा स्वीकृत भए पनि व्यवसायले पाँच करोड ऋण धान्न सक्ने अवस्था नभएको बैंकका कर्मचारीहरूको भनाइ छ ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच