काठमाडौं । नेपाल सुपर लिगमा धनगढी एफसीको अपराजित यात्रामा पूर्णविराम लागेको छ । दशरथ रंगशालामा बुधबार बेलुका भएको खेलमा अन्जन विष्ट र समिराज ठोकरको गोलको मद्दतले झापाले २-० को जित निकालेको हो ।
पहिलो हाफमा खेल गोलरहित बराबरीमा सकिएको थियो । झापाले खेलको १५ सेकेन्ड मै गोल गर्ने मौका पाएको थियो । प्रशान्त लक्समले दिएको पासमा स्ट्राइकर जोर्गे सान्चेजले वान अन वानको अवसर पोस्टभन्दा बाहिर गर्यो ।
लगत्तै धनगढीका लागि अहमद हिजाजीले पाउनुभएको सुन्दर मौका खेल फाल्नुभयो । आशिष चौधरीको प्रहार नियन्त्रणमा लिएर झापाका दुई डिफेन्डर बिट गर्दै उहाँले गर्नुभएको प्रहार पोस्टको माथिबाट बाहिरियो ।
आठौं मिनेटमा धनगढीका अभिषेक गुरुङले बक्स बाहिरबाट गरेको प्रहारलाई विपक्षी गोलरक्षक कुपिचले समात्नुभयो । २२औं मिनेटमा कमल श्रेष्ठको फ्रिकिक पनि कुपिचले पन्च गरिदिनुभयो ।
५३औं मिनेटमा झापाका कप्तान अन्जन विष्टले गोल गर्दै आफ्नो टोलीलाई अग्रता दिलाउनुभयो । छिरिङ लामाको क्रसमा सुन्दर हेडर गोल गर्दै म्यान अफ द म्याच अन्जनले झापालाई अग्रता दिलानुभयो ।
७०औं मिनेटमा धनगढी बराबरी गर्नको नजिक पुग्यो । अभिषेक गुरुङको क्रसमा फोडे फोफानाको हेडरलाई कुपिचले जोगाउनुभयो । ७७औं मिनेटमा भने झापाले खेलमा अग्रता दोब्बर बनायो । प्रदीप लामाको कटब्याकमा सान्चेजले बललाई पोस्टको दिशा देखाउनुभएको थियो । तर गोल लाइनबाट समिराज ठोकरले बललाई लाइन कटाएपछि उहाँको नाममा गोल रह्यो ।
७९औं मिनेटमा झापा १० जनामा सिमित हुन पुग्यो । दोस्रो हाफमा मैदान प्रवेश गरेका धिरज थजालीले साइमन लिम्बुमाथि गरेको फाउलका कारण रेफ्रीले उहाँलाई सिधैँ रातो कार्ड दिनुभयो । त्यसपछि धनगढीले पाएका केही अवसरहरु सदुपयोग गर्न नसक्दा हार ब्यहोर्यो।
हार पछि धनगढी प्लेअफमा आफ्नो स्थान पक्का गर्न असफल भएको छ । धनगढीले प्लेअफमा आफ्नो स्थान बनाउनका लागि शीर्ष स्थानमा रहेको पोखरा थन्डर्स विरुद्धको अन्तिम खेल कुर्नुपर्ने भएको छ । झापाले भने प्लेअफ सम्भावना कायम नै राखेको छ । झापाको अन्तिम खेल एफसी चितवन विरुद्ध रहेको छ ।
दोस्रो स्थानमा यथावत धनगढीको ७ खेलमा १२ अंक रहेको छ । झापा भने ७ खेलमा १० अंक सहित चौथो स्थानमा उक्लिएको छ । एनएसएलमा लिग तालिकाको शीर्ष २ टोलीले सिधै फाइनलमा छनोट हुने क्वालिफायर खेल खेल्नेछन् । क्वालिफायरमा पराजित हुने टोलीले भने लिगको तेस्रो र चौथो स्थान प्राप्त गर्ने टोलीको विजेतासँग अर्को क्वालिफायर खेल्न पाउनेछ ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच