रुपन्देही । बुटवल र पाल्पा जोड्ने गरी बनेको लुम्बिनी केबलकारले प्रणय दिवस (भ्यालेन्टाइन डे) लाई लक्षित गर्दै टिकटदरमा ५० प्रतिशत छुट दिने घोषणा गरेको छ । कम्पनीले माघ २४ गतेदेखि फागुन २ गतेसम्म केबलकारको दुर्ईतर्फी टिकटदर पाँच सय रुपैयाँमात्र कायम गर्ने घोषणा गरेको हो ।
केबलकारका अपरेसन म्यानेजर दिल्लीनारायण कायस्थ सैंजूले प्रणय दिवसलाई लक्षित गरेर भ्यालेन्टाइन अफर ल्याइएको बताउनुभयो । नेपालीसँगै भारतीय नागरिकलाई पनि टिकटदरमा ५० प्रतिशत छुट गरिएको उहाँले जानकारी दिनुभयो । कम्पनीले यसअघि ल्याएको ‘मर्निङ अफर’ र दशैँ–तिहार लक्षित चाडपर्व अफरले आन्तरिक र बाहृय पर्यटकलाई आकर्षित गरेकाले भ्यालेन्टाइन अफरले विशेषगरी युवा पुस्तालाई आकर्षित गर्ने कम्पनीको विश्वास रहेको सैंजूले बताउनुभयो ।
केबलकारको टिकटदर एक हजार कायम गरिए पनि सञ्चालनमा आएसँगै नेपालीका लागि सात सय ५० रुपैयाँं रहेको छ । बुटवलको गोलपार्क बमघाटमा बटम स्टेसन र पाल्पाको तिनाउ गाउँपालिका वसन्तपुरमा टप स्टेसन रहेको २.६ किलोमिटर दूरीको केबलकार गत जेठ १५ गतेदेखि व्यावसायिकरूपमा सञ्चालनमा आएको हो । आठ महिनामा करिब दुर्ई लाखले केबलकारको यात्रा गरी पाल्पाको वसन्तपुर पुगेका कम्पनीले जनाएको छ ।
डेढ दशकअघि प्रक्रिया अघि बढे पनि लगानी अभावलगायत विभिन्न कारण काम अघि बढ्न नसकेकोमा कुल पाँच अर्ब लागतको आयोजना आइएमई ग्रुपले नेतृत्व लिएपछि १४ महिनामै निर्माण सम्पन्न भएको थियो ।
कम्पनीले प्रत्येक टिकटदरको एक–एक प्रतिशत रकम बुटवल उपमहानगरपालिका र तिनाउ गाउँपालिकालाई स्थानीय करबापत दिँदै आएको छ । टिकटदरमा बुटवलको वडा नम्बर ३ र तिनाउ गाउँपालिकाको वडा नम्बर ३ का बासिन्दा, अपांगतासहित फरक क्षमता भएका नागरिक र तीनदेखि चार फिट उचाइ भएकालाई ५० प्रतिशत छुट, विद्यार्थी र ७० वर्षदेखि ८० वर्षसम्मका ज्येष्ठ नागरिकलाई ४० प्रतिशत तथा तीन फिटभन्दा कम उचाइका बच्चा र ८० वर्षमाथिका ज्येष्ठ नागरिकलाई निःशुल्क गरिएको छ ।
२५ गोण्डोला रहेको केबलकारले दैनिक छ हजार यात्रुलाई ओसारपसार गर्न सक्छ । केबलकारको टप स्टेसनमा रेष्टुरेण्ट, जीप लाइन, सेल्फी जोन सञ्चालनमा आइसकेका छन् भने स्काई साइक्लिङ, विद्युतीय पिङ, बाल उद्यान निर्माणको चरणमा छन् । त्यस्तै, दुई वर्षभित्र एक सय ५० कोठा, एक हजारजना क्षमताको बैंक्वेट हल र क्यासिनोसहित साढे तीन अर्ब लागतमा पाँचतारे होटेल बनाउने योजना छ ।
करिब एक सयजनालाई रोजगारी दिएको कम्पनीले पाँचतारे होटल सञ्चालनमा आउँदा थप पाँच सय बढीलाई रोजगारी दिन सक्ने जनाएको छ । आइएमई ग्रुपले सञ्चालनमा ल्याएको यो तेस्रो केबलकार हो ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच