बढ्दै हत्याका घटना

दाङ । पछिल्लो समय देशैभर हत्याका घटना बढ्दै गएका छन् । अधिकांश घटना आर्थिक, पारिवारिक समस्या र अवैध यौन सम्बन्धका कारण देखिएको छ । सामान्य वादविवादमा उत्पन्न आवेगले पनि पछिल्लो समय हत्याको घटना बढ्दै गएको प्रहरी तथ्यांकले देखाएको छ । यस्तै, डिप्रेसन र मादक पदार्थ सेवनका कारण पनि हत्याका घटना भएको देखिएको छ । समूहले गरेको हत्या घटनामा अर्कोमाथि हाबी हुने प्रवृत्ति र तत्कालको आवेग रहेको पाइएको प्रहरीले जनाएको छ । प्रहरीको उपत्यका अपराध अनुसन्धान कार्यालयका एसपी रवीन्द्र रेग्मीले तत्कालको रिस र आवेगलाई मानिसले नियन्त्रण गर्न नसक्दा हत्याका घटना हुने गरेको देखिएको बताउनुभयो । उहाँका अनुसार पछिल्लो समय उपत्यकामा जघन्य प्रकृतिको अपराध कर्तव्य ज्यानका घटना महिनापिच्छे हुने गरेको छ । उपत्यकामा मात्र सात महिनाको अवधिमा २० वटा कर्तव्य ज्यानको घटना घटेको उहाँले सुनाउनुभयो ।

उपत्यकामा माघ महिनामा मात्रै नौ जनाको हत्या भएको थियो । त्यस्तै, पुसमा दुईजना र मंसिरमा एकजनाको हत्या भएको थियो । त्यस्तै, असोज र कात्तिकमा समान दुई/दुई र साउन र भदौमा समान चार/चार जनाको हत्या भएको देखिएको छ । संघीय राजधानी भएका कारण देशभरका नागरिकको बसोवास काठमाडौं केन्द्रित हुने हुँदा देशको अपराधको घटनामध्ये अधिकांश काठमाडौं हुने गरेको प्रहरीको भनाइ छ ।
पछिल्लो पाँच वर्षमा देशभर झण्डै तीन हजार जनाको हत्या भएको छ । नेपाल प्रहरीको तथ्यांकअनुसार सबैभन्दा धेरै आर्थिक वर्ष २०७५/०७६ मा भएको देखिन्छ । तथ्यांकअनुसार सो वर्ष देशभर ६५९ जनाको हत्या भएको प्रहरीको तथ्यांक छ । यस्तै, आर्थिक वर्ष ०७६/७७ मा ५५५ जनाको हत्या भएको थियो । यसैगरी, आर्थिक वर्ष ०७७/७८ मा ५२१ जनाको हत्या भएको थियो । वर्ष २०७८/७९ मा ५९० वटा व्यक्ति हत्याका घटना भएका थिए । त्यसमा सबैभन्दा बढी धारिलो हतियार प्रहार गरेर भएको छ । काठमाडौंमा मात्रै ५० वटा घटना भएको प्रहरी प्रधान कार्यालयले जनाएको छ । आर्थिक वर्ष २०७९/८० मा ५०१ जनाको हत्या भएको छ । जसमा ३८ वटा घटना काठमाडौं उपत्यकामा भएका थिए । कुल ९८२ वटा व्यक्ति हत्या प्रयासका घटना भएको प्रहरीले जनाएको छ । आर्थिक वर्ष ०७९/८० मा देशभर हत्यासम्बन्धी ५०१ मुद्दा दर्ता भएका छन् ।

हत्या घटनामा दाङ पनि अगाडि
गत हप्ता जिल्ला प्रहरी कार्यालय दाङमा कार्यरत ३२ वर्षीय प्रहरी जवान पिमलाल नेपालीले २२ वर्षीया श्रीमती टीका विक र अढाई वर्षीय छोरा सुशान्त नेपालीको हत्या गरे । रोल्पा रुन्टिगढीका पिमलाल श्रीमती टीका र छोरा सुशान्तसँग घोराहीको मुख्य बजारस्थित एक होटेलमा बास बसेका बेला उनले हत्या गरेका हुन् । प्रहरीका अनुसार पिमलालले श्रीमती टीका र छोराको घाँटी सलले कसेर हत्या गरेको देखिएको छ । प्रहरी जवान पिमलाल प्रहरीको नियन्त्रणमा छन् । हत्या गरेर उनी आफैँ प्रहरीकोमा पुगेका थिए ।

यस्तै, घोराहीको व्यस्त बजारमै महिला प्रहरी जवान धनमाया थापा मगरलाई बिहीबार साँझ ड्युटीमा रहेकै बेला श्रीमान यामबहादुर झाँक्री मगरले गोली हानी हत्या गरेका छन् । उहाँको दामोदर चोकमा हत्या भएको थियो । कर्णाली प्रहरी तालिम केन्द्रमा सहायक प्रहरी हवल्दार पदमा कार्यरत झाँक्री मगरले तीन राउण्ड गोली हानी श्रीमतीको हत्या गरेको प्रहरीले जनाएको छ । जिल्ला प्रहरी कार्यालय दाङका अनुसार भे१२प ११५० नम्बरको मोटरसाइकलमा आएका यामबहादुरले धनमाया भएकै स्थानमा मोटरसाइकल रोकी गोली प्रहार गरेर हत्या गरेका हुन् । मृतक महिला प्रहरीको छाती र कोखामा गोली लागेको थियो । घोराहीबाट भागेका यमबहादुरलाई लमही नगरपालिका-६ अर्जुनखोलाबाट प्रहरीले पक्राउ गरेर नियन्त्रणमा लिएको जिल्ला प्रहरी कार्यालयले जनाएको छ । प्रहरीले उनको साथबाट पेस्तोलसहित गोली बरामद गरेको छ । घटनाका बारेमा अहिले प्रहरीले अनुसन्धान गरिरहेको छ । दाङमा भएका हत्याका घटनामध्ये यी त दुई प्रतिनिधि घटना मात्र हुन् ।

बारम्बारको हत्या घटनाले जिल्लाको शान्ति सुरक्षामा प्रश्न चिहृन खडा भएको स्थानीयले गुनासो गर्न थालेका छन् । नगरभित्र शान्ति–सुरक्षाको उचित व्यवस्था नभएको गुनासो उनीहरूले गर्न थालेका हुन् । मुख्य बजार क्षेत्रमा हुने गरेका यस्ता घटनाले चोरी डकैती, लुटपाटले समेत बढवा पाउने भन्दै चुस्त व्यवस्थापनको अभावमा यस्ता घटना हुने नगरवासीको भनाइ छ ।

आर्थिक वर्ष ०७७/०७८ मा दाङमा १९ जनाको हत्या भएको छ । चालु आर्थिक वर्षको हालसम्म पनि यहाँ आठ जनाको हत्या भइसकेको छ । जसमा धारिलो हतियारको प्रयोग, गोली प्रहार र कुटपिट रहेका छन् । यस्तै, आर्थिक वर्ष ०७९/०८० मा नौ र आर्थिक वर्ष ०७८/७९ मा १७ जनाको हत्या भएको छ । तथ्यांकलाई हेर्दा दाङमा हत्याका घटनामा कमी आउन सकेको छैन । जिल्ला प्रहरी कार्यालय दाङका प्रवक्ता तथा डिएसपी जनकबहादुर मल्लका अनुसार पछिल्लो समयमा नियोजित रूपमा हुने हत्याका घटना बढिरहेको छ । आवेगको रिस, मानसिक रूपमा विचलन, चोरी सिकारी तथा झुक्किएर हत्या हुने गरेको छ । यस्तै, मायाजालमा पारेर पछि सम्पत्ति माग्ने र नदिएपछि हत्या गर्ने प्रवृत्ति पनि बढेको उहाँले सुनाउनुभयो । त्यस्तै, खुल्ला सिमानाका कारण अवैध रूपमा भित्रने भरुवा बन्दुकका कारण पनि दाङमा हत्याका घटना बढेका छन् । यता, विज्ञहरू भने समाजमा हत्याका घटना नियन्त्रणका लागि जनचेतना बढाउनुपर्ने बताउँछन् । गम्भीर अपराधमा संलग्नहरूलाई पनि माफी दिने गरिएकाले पनि यस्ता घटना बढ्ने गरेको उनीहरूको भनाइ छ ।

आर्थिक र पारिवारिक समस्याको साथै नैराश्यताका कारण उत्पन्न आवेगले पनि पछिल्लो समय हत्याका घटना बढ्दै गएको मनोविश्लेषकहरू बताउँछन् । परिवार, आफन्त, नातेदारबाटै ज्यान गएका घटना बाहिर आइरहेका छन् । बाबुले छोरा मारेको, श्रीमान्ले श्रीमती मारेको, नातिले बाजे मारेको जस्ता समाचार दिनहुँ आउने गरेका छन् । यसले समाज कता जाँदै छ ? भन्ने गम्भीर प्रश्न उठेको छ ।