सिद्धबाबा सुरुङमार्ग निर्माण कार्यले गति लिँदै

पाल्पा । राष्ट्रिय गौरवको आयोजनाका रूपमा हेरिएको निर्माणाधीन सिद्धबाबा सुरुङमार्ग निर्माण कार्यले गति लिएको छ । सिद्धार्थ राजमार्गअन्तर्गत बुटवल–तानसेन सडक खण्डको सिद्धबाबा क्षेत्रमा सुरुङमार्ग निर्माणको जिम्मा पाएको निर्माण कम्पनी चाइना स्टेट कन्स्ट्रक्सन इञ्जिनियरिङ कर्पोरेसनले पछिल्लो केही समययता धमाधम काम गर्न थालेपछि निर्माण कार्यले गति लएको हो ।

पटक–पटक राजमार्गमा आवागमन बन्द गरेर काम गरे पनि लामो समय हुँदासमेत कामले गति लिन नसकेपछि ठिक दुई महिनाअघि हिमालय टाइम्सले ‘सिद्धबाबा सुरुङमार्ग:निर्माण कार्य सुस्त, सडक बन्द गर्दा यात्रुलाई सास्ती’ शीर्षकमा समाचार प्रकाशन गरेको थियो । सो समाचार प्रकाशन भएको केही समयपछि संघीय सरकारको ध्यानाकर्षण भएको थियो ।

भौतिक पूर्वाधार तथा यातायातमन्त्री प्रकाश ज्वालाले समेत निर्माण कार्यको स्थलगत निरीक्षण गरी सुरुङमार्गको काम सुस्त भएको भन्दै कामलाई तीव्रता दिन निर्देशन दिनुभएको थियो । चौतर्फी दबाबपछि निर्माण व्यवसायीले अहिले कामलाई तीव्रता दिएको हो । केही दिनयता अन्य काम सकेर मुख्य सुरुङको टनेल खन्ने काम भइरहेको छ । मंगलबारसम्मको भौतिक प्रगति हेर्दा १० दशमलव ४५ प्रतिशत रहेको सिद्धबाबा सुरुङमार्ग आयोजनाकी इञ्जिनियर सविता ज्ञवालीले बताउनुभयो । उहाँका अनुसार कामले अहिले तीव्रता पाएको छ ।

आयोजनाको काम गत वर्षदेखि सुरु भए पनि वर्षातका बेला पहिरो झरेर ‘टनेल’ निर्माण क्षेत्रमा ठूलो क्षति पु-याएको थियो । सुरुका दिनमा कतिपय क्षेत्रमा पर्ने रूखहरू काट्ने अनुमति नपाए पनि अहिले सबै रूख काटेपछि कामले गति लिएको इञ्जिनियर ज्ञवालीले बताउनुभयो । सुरुङको दुवै तर्फबाट निर्माण भइरहेको छ । ‘अहिले दुवै तर्फबाट कामले तीव्रता पाएको छ,’ इञ्जिनियर ज्ञवालीले भन्नुभयो ‘मन्दिरतर्फबाट साउथ पोर्टको काम भइरहेको छ । अहिले झण्डै १०० मजदुरले काम गरिराखेका छन् ।’ आउँदो वर्षायाममा टनेलभित्र छिरेर काम गर्न सक्नेगरी कामले गति लिएको आयोजनाले जनाएको छ ।

बुटवलको तल्लो सिद्धबाबादेखि पाल्पाको दोभान चौकीसम्मको करिब तीन किलोमिटर सडक क्षेत्र पहिरोका कारण जोखिमयुक्त भएकाले यहाँ सुरुङमार्ग बनाउन लागिएको हो । अति नै जोखिमयुक्त यो सडकखण्डमा दुर्घटना भइराख्ने भएकाले कतिपयले यसलाई ‘मृत्युमार्ग’ पनि भन्ने गरेका छन् । यस क्षेत्रमा पहिरो तथा सडक दुर्घटनामा परी सयौँले ज्यान गुमाइसकेका छन् । यस सडकखण्डमा दैनिक सरदर दुई हजार पाँच सय गाडी चल्ने गर्दछन् । ठूलो क्षति व्यहोर्नु परेको र त्रासदीमा यात्रा गर्नुपर्ने बाध्यतामा रहेका स्थानीयहरू सुरुङमार्गको कामले गति लिन थालेपछि भने वर्षौंदेखि सुरुङ बन्ने सपना पूरा हुनेमा ढुक्क भएका छन् ।

तानसेनकी शान्ता ढकालले सुरुङमार्ग निर्माणको कामले ढिलै भए पनि गति लिन थालेको कुराले खुसी तुल्याएको बताउनुभयो । बुटवलका प्रेम रिजाल दैनिकजसो पाल्पा–बुटवल ओहोरदोहोर गर्नुहुन्छ । उहाँको यात्रा हिउँद होस् वा वर्षायाम जहिलेसुकै त्रासमय हुन्छ । जतिसुकै बेला ढुंगा खस्ने, पहिरो जाने समस्या बेहोरेको वर्षौं भइसक्यो । सुरुङमार्गको काम धमाधम हुन थालेपछि भने अब बन्ने पक्का जस्तै भएकाले खुसी लागेको रिजालको भनाइ छ ।

सिद्धबाबा क्षेत्रमा पछिल्लो १० वर्षमा ४२१ यात्रुले ज्यान गुमाइसकेको जिल्ला ट्राफिक प्रहरी कार्यालय पाल्पाको तथ्यांकमा छ । सिद्धबाबा क्षेत्रमा माथिबाट खस्ने ढुंगा तथा पहिरोका कारण हरेक वर्ष आठ÷१० जना नागरिकले ज्यान गुमाउनु परेकाले सरकारले सुरुङमार्ग बनाउने योजना अघि सारेको थियो । यो सडक खण्ड हुँदै पाल्पा, स्याङ्जा, गुल्मी, पोखरा, बागलुङ, पर्वत, म्याग्दी, मुस्ताङ र अर्घाखाँचीसम्म पुग्ने गरिन्छ ।

चाइना स्टेट कन्स्ट्रक्सन इञ्जिनियरिङ कर्पोरेसनले सुरुङमार्ग निर्माणका लागि सात अर्ब ३४ करोड २१ लाख रुपैयाँमा २०७८ फागुन १ मा ठेक्का पाएको हो । गत साउन पहिलो साता झरेको पहिरोले सुरुङमार्गको ‘टनेल पोर्टल’ नै पुरिएपछि तीन महिना बढी समय रोकिएको सुरुङमार्ग निर्माणको काम दशैँपछि मात्रै सुरु गरिएको हो । सुरुङमार्ग निर्माणका लागि पटक–पटक सडक बन्द गरेर काम हुँदै आएको छ । यही माघको पहिलो सातादेखि मात्र सुरुङमार्गको मुख्य सुरुङ खन्न सुरु भएको हो । निर्माण कार्यको सन् २०२२ मार्च ९ मा ठेक्का सम्झौता भएर २२ मार्च २०२७ मा सक्नुपर्ने सम्झौता रहेको छ ।

याे पनि हेर्नुहोस्

विपक्षी सांसदबाट संसद् अवरुद्ध