काठमाडौं । सहकारी ठगी प्रकरणबारे छानविन गर्न गठन गर्ने भनिएको संसदीय छानविन समितिको कार्यादेश टुंग्याउने जिम्मा प्रमुख राजनीतिक दलका शीर्ष नेताहरूलाई दिइएको छ । सिंहदरबारमा शनिबार बसेको कानुनमन्त्री पदम गिरी नेतृत्वको संसदीय छानविन समितिको कार्यादेश बनाउन गठित कार्यदलले कार्यादेश टुंगो लगाउने जिम्मा शीर्ष नेताहरूलाई दिने निर्णय गरेको हो । सहकारीको रकम अपचलनबारे संसदीय छानविन समिति गठन गर्ने विषयमा सत्तारूढ दल र प्रमुख प्रतिपक्षी दल नेपाली कांग्रेस बीचको छलफल सकारात्मक भएको कार्यदलका सदस्यहरूले बताएका छन् । संसदीय छानविन समितिको कार्यादेश (टिओआर) टुंगो लगाउन गठित कार्यदलका संयोजक कानुनमन्त्री पदम गिरीका अनुसार कार्यदलले कार्यादेशबारे लगभग टुंगो लागेको छ । यसलाई शीर्ष नेताको बैठकले अन्तिम रूप दिने उहाँको भनाइ छ ।
कार्यदलमा उपप्रधान तथा गृहमन्त्री रवि लामिछानेको नाम उल्लेख नगरी समिति गठन गर्ने लगभग सहमति जुटेको जानकारी दिँदै कानुनमन्त्री गिरीले भन्नुभयो, ‘जुन सहकारीबाट नियमविपरीत रकम लगिएको छ, तर रकम लगिएको भनिएको कम्पनीको नाम पनि उल्लेख गर्ने, ती सहकारी संस्थाहरूको पनि नाम उल्लेख गरौँ । त्यसैले केन्द्रविन्दुमा राखेर छानविन गर्न सकिन्छ भन्ने निष्कर्षमा पुगेको पाउँछु, तर त्यसमा पनि कांग्रेसले कुनै पदाधिकारी र व्यक्तिहरू लक्षित गरेर आउनुपर्छ भन्नुभएको छ ।’ सत्तापक्षले कम्पनी भनिसकेपछि व्यक्ति वा पदाधिकारी भनेर जान आवश्यक नभएको जिकिर गर्दै मन्त्री गिरीले भन्नुभयो, ‘हामी अहिले नजिक नजिक पुगिसकेका छौँ । कम्पनी राखिसकेपछि छानविनको क्रममा व्यक्तिको नाम आइहाल्छ । कम्पनी र सहकारीको नाम उल्लेख गर्ने, तर त्योभन्दा बाहिर गएर व्यक्ति तोकेर जान राम्रो हुँदैन भनेर छलफल भयो । त्यसमा सहमतिनजिक पुगेका छौँ । अब नेताहरूसँग बसेपछि यो कुरा टुंगो लाग्छ ।’
कांग्रेसले गृहमन्त्री लामिछाने सूर्यदर्शन बचत तथा ऋण सहकारी पोखरा, सुप्रिम बचत तथा ऋण सहकारी बुटवल, स्वर्णलक्ष्मी बचत तथा ऋण सहकारी काठमाडौं, सहारा बचत तथा ऋण सहकारी चितवन, हाम्रो नयाँ कृषि सहकारी काठमाडौं, समानता बचत तथा ऋण सहकारी नेपालगञ्ज, सानो पाइला बचत तथा ऋण सहकारी वीरगञ्ज लगायतको रकम ठगीमा संलग्न रहेको दाबी गर्दै आएको छ । कार्यदलको बैठकमा छलफलका विषय प्रधानमन्त्रीसहित दलका शीर्षलाई शनिबार नै ब्रिफिङ गरिएको छ । कानुन, न्याय तथा संसदीय मामिलामन्त्री पदम गिरीले संयोजन गर्ने कार्यदलमा नेपाली कांग्रेसबाट जीवन परियार र ज्ञानेन्द्रबहादुर कार्की, नेकपा एमालेबाट महेश बर्तौला, नेकपा माओवादी केन्द्रबाट हितराज पाण्डे र राष्ट्रिय स्वतन्त्र पार्टीबाट शिशिर खनाल सदस्य हुनुहुन्छ ।
शुक्रबार साँझ प्रधानमन्त्री निवास बालुबाटामा बसेको प्रमुख दलका शीर्ष नेताहरूको बैठकमा सहकारीको रकम अपचलनमा उपप्रधान एवं गृहमन्त्री रवि लामिछानेको नाम राख्नुपर्ने अडानमा नेपाली कांग्रेस लचक बनेको थियो । बैठकपछि नेपाली कांग्रेसका प्रमुख सचेतक रमेश लेखकले छलफल सकारात्मक भएको बताउनुभएको थियो ।
नीति तथा कार्यक्रम आज पारित गर्ने सरकारको तयारी
सरकारले प्रतिनिधि सभाको आज बस्ने बैठकबाट आगामी आर्थिक वर्षको सरकारको नीति तथा कार्यक्रम पारित गर्ने तयारी गरेको छ । आज (आइतबार) बिहान ११ बजे बस्ने बैठकका लागि संघीय संसद्का महासचिव पद्मप्रसाद पाण्डेले १४ वटा कार्यसूची सार्वजनिक गर्नुभएको छ । आइतबार नै छलफल थालनी गरेर उठेको प्रश्नमा जवाफ दिएर सरकारको नीति तथा कार्यक्रम पारित गर्ने सरकारले तयारी गरेको हो । शुक्रबार पनि सरकारको नीति तथा कार्यक्रम पारित गर्ने सरकारको तयारी थियो । तर, प्रमुख प्रतिपक्ष दल नेपाली कांग्रेससँगको वार्ता सकारात्मक नभएपछि बैठक आजको लागि सारिएको थियो । प्रधानमन्त्री पुष्पकमल दाहाल ‘प्रचण्ड’ले मंगलबार बसेको प्रतिनिधि सभाको बैठकमा विपक्षीको नाराबाजी र वेल घेराउबीच जेठ २ गते संघीय संसद्को संयुक्त बैठकमा राष्ट्रपति रामचन्द्र पौडेलले प्रस्तुत गर्नुभएको आगामी आर्थिक वर्षको सरकारको नीति तथा कार्यक्रम पेस गर्नुभएको थियो ।
कांग्रेसले आज काठमाडौंमा विरोध प्रदर्शन गर्दै
प्रमुख प्रतिपक्ष दल नेपाली कांग्रेसले आज काठमाडौंमा बृहत् प्रदर्शन गर्दै छ । सहकारी ठगी प्रकरणमा उपप्रधान तथा गृहमन्त्री रवि लामिछाने संलग्न रहेको भन्दै संसदीय छानविन समितिको माग गर्दै सदन चर्काइरहेको कांग्रेस आजबाट सडकमा निस्कन लागेको हो । केन्द्रीय समिति र संसदीय दलको संयुक्त बैठकको निर्णयअनुसार सरकारको ज्यादती र सहकारी ठगीविरुद्ध काठमाडौंमा प्रदर्शनको तयारी भइरहेको कांग्रेस प्रचार विभाग प्रमुख मीनबहादुर विश्वकर्माले जानकारी दिनुभयो । कांग्रेसका भ्रातृ संगठनहरू नेविसंघ, तरुण दल, महिला संघलगायत यसअघि नै सडकमा आइसकेका छन् । काठमाडौंको भृकुटीमण्डपमा दिउँसो २ बजे हुने आन्दोलनको तयारी पूरा भइसकेको नेता विश्वकर्माले जानकारी दिनुभयो । कांग्रेसले आजको प्रदर्शनलाई सरकारको अलोकतान्त्रिक र असंवैधानिक रवैया र सहकारी ठगीविरुद्ध भनेको छ । प्रचार विभाग प्रमुख विश्वकर्माले भन्नुभयो, ‘आइतबारको प्रदर्शनको कार्यक्रम काठमाडौं, भक्तपुर र ललितपुर जिल्ला समितिले आयोजना गर्ने हो । केन्द्रले समर्थन गर्ने र सहभागी हुने हो । त्यसका लागि प्रचारप्रसारको काम भएको छ । जिल्ला समितिले गर्ने भएपछि केन्द्रले धेरै तयारी गर्नुपरेन ।’
कांग्रेसले किन खुलासभा र सडक प्रदर्शन गर्नुप¥यो भनेर जनतालाई बुझाउन तीन जिल्लाका १५ वटा निर्वाचन क्षेत्रमा केन्द्रीय प्रतिनिधि पठाएको थियो । कांग्रेसले काठमाडौं- १ मा अब्दुल सतार, २ मा सीता थपलिया (उर्मिला), ३ मा रंगमती शाही, ४ मा कुन्दन काफ्ले, ५ मा नैनसिंह महर, ६ मा गुरु बराल, ७ मा आङ्गेलु शेर्पा, ८ मा उमेशजंग रायमाझी, ९ मा डा. डिला संग्रौला र १० मा सरिता प्रसाईंलाई प्रतिनिधि बनाएर पठाएको छ । यस्तै, ललितपुर- १ मा उमाकान्त चौधरी, २ मा देवेन्द्रराज कँडेल र ३ मा अर्जुन जोशीलाई पठाइएको छ । भक्तपुर- १ मा इन्द्र बानियाँ र २ मा गणेश लामालाई पठाइएको छ । प्रदर्शनको तयारी र उद्देश्यबारे प्रचार विभाग प्रमुख विश्वकर्माले भन्नुभयो, ‘सरकारलाई सचेत र ध्यानाकर्षण गराउन हामीले प्रदर्शन गर्न लागेका हौँ । संसद्मा सभामुखले पनि एकतर्फी चलाउन थालेका छन् । संसद्मा बोल्न नदिएपछि हामी सडकबाट बोल्छौँ भनेर आन्दोलन गर्न लागेका हौँ । सदनमा भएको पक्षपातपूर्ण व्यवहारको पनि आन्दोलनमा कुरा उठाउँछौँ ।’ सरकार संसदीय छानविन समितिको टिओआरमा सहमत भए पनि नभए पनि पूर्वनिर्धारित कार्यक्रम स्थगित हुने स्पष्ट पार्दै विश्वकर्माले भन्नुभयो, ‘हामीले सहकारी ठगीको विषय मात्रै उठाएका छैनौँ । प्रेसमाथिको आक्रमणको कुरा भयो । भ्रष्टाचारको मुद्दामा आफ्नालाई जोगाउने र विपक्षीलाई तह लगाउने काम गरिहनुभएको छ । सबै बेथिति र विसंगतिविरुद्ध नै प्रदर्शन हो । सहकारी ठगीमा त रवि मात्रै होइन धेरै छन्, रवि मन्त्री भएका कारणले छानविनको माग गरेका छौँ, तर समग्र बेथितिको काम त सत्तापक्षले गर्दै आएको छ । यसको खबरदारी सभा हो, रोकिँदैन ।’
कांग्रेसले विभिन्न सहकारीबाट करिब पाँच खर्ब अपचलन भएको र मुलुकभरका केही दर्जन ठूला सहकारी संस्थाले मात्रै सर्वसाधारण बचतकर्ताको दुई खर्ब रुपैयाँभन्दा बढी अपचलन गरेको तथ्यहरू सार्वजनिक भएको भन्दै यो विषयलाई उठाइरहेको छ । सामान्य श्रम गरेर आफ्नो सम्पूर्ण आर्जन सहकारीमा जम्मा गरेका सर्वसाधारण नागरिकको रकम निश्चित व्यक्ति र संस्थाले गैरकानुनी रूपमा गरेको दुरुपयोग अत्यन्त ठूलो ठगी र अपराध भएको कांग्रेसको निष्कर्ष छ । कांग्रेसले लाखौँ नेपाली नागरिकले सहकारीमा बचत गरेको खर्बौं रकम हिनामिना, दुरुपयोग, अपचलन र ठगी भएका विषयमा निरन्तर सदनमा आवाज उठाइरहेको, बचतकर्ताको रकम फिर्ता र सुरक्षाको सुनिश्चितताको माग गर्दै आएको छ । बचतकर्ताको रकम फिर्ता र सुरक्षाको सुनिश्चितता तथा अपचलनमा संलग्नलाई सजाय नहुँदासम्म कांग्रेसले यो विषय नछाड्ने अडान लिँदै आएको छ ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच