काठमाडौं । पत्रकार दीर्घराज उपाध्यायद्वारा लिखित पुस्तक ‘द्वन्द्व पत्रकारिताको एक दशक’ विमोचन भएको छ । शुक्रबार काठमाडौंमा एक कार्यक्रमकाबीच पूर्वप्रधानमन्त्री एवं नेपाली कांग्रेसका सभापति शेरबहादुर देउवा लगायतले पुस्तकको विमोचन गर्नुभएको हो । पुस्तक विमोचन गर्दै सभापति देउवाले द्वन्द्वकालमा पत्रकारिता क्षेत्रले भोगेका समस्या र देखेका घटनाक्रमलाई पुस्तकमा मिहिनेतसाथ समावेश गरिएको बताउनुभयो । कार्यक्रममा उहाँले सबै दलले आवश्यक ठानेमा संविधान संशोधन हुन सक्ने प्रस्ट पार्नुभयो ।
उहाँले कतिपय कुराहरू संशोधन गर्नुपर्ने र आवश्यक परेको समयमा संविधान संशोधन हुने अवस्था रहेको बताउनु भयो । उहाँले सबैले आवश्यक ठानेको खण्डमा संशोधन हुने स्पष्ट पार्नुभयो । सभापति देउवाले अहिलेको संविधान समावेशी रहेको उल्लेख गर्दै समानुपातिकतालाई अझै राम्रो गर्नेगरी संशोधन गर्ने बताउनु भयो । उहाँले निर्वाचनबाट जितेर आउन नसक्नेहरू पनि रहेकाले उनीहरूको समावेशिताका लागि पनि समानुपातिकतालाई अझै राम्रो अध्ययन गरी संशोधन गर्ने बताउनु भयो । संविधानका आधारभुत कुराहरू संशोधन गर्न नमिले पनि अन्य कुरामा अझ राम्रो गर्नेगरी संशोधन गर्ने बताउनु भयो । संविधानमा भएका कमी, कमजोरीलाई सच्याइने र प्रजातन्त्र र मानव अधिकार पहिलो प्राथमिकता भएको बताउनु भयो । अरु देशको तुलनामा अझ बढी प्रगतिशिल लोकतान्त्रिक समाज स्थापित गर्नुपर्ने बताउनु भयो ।
देउवाले संक्रमणकालीन न्याय सम्बन्धी कानून बनेसँगै देशमा द्वन्द्व र काटमारको अन्त्य हुने विश्वास पनि व्यक्त गर्नुभएको छ । उहाँले संक्रमणकालीन न्याय सम्बन्धी कानून संसदबाट सर्वसम्मत पारित भइ राष्ट्रपति रामचन्द्र पौडेलबाट प्रमाणित भइसकेकोप्रति खुशी व्यक्त गर्नुभयो । उहाँले अब पुरानो द्वन्द्व, काटमारको अन्त्य हुने विश्वास व्यक्त गर्नुभयो ।
कार्यक्रममा नेकपा एमालेका सचिव लेखराज भट्टले माओवादी युद्धकालका केही घटना सम्झिँदा अहिले पनि मन दुख्ने गरेको बताउनुभयो । सोही कार्यक्रमलाई सम्बोधन गर्दै पूर्वमाओवादी नेतासमेत रहनुभएका भट्टले युद्वको क्रममा कतिपय चिताउँदै नचिताएको घटनाहरू भएको स्मरण गर्नुभयो । उहाँले भन्नुभयो, ‘अहिले हामी शान्ति प्रक्रियामा आएर यहाँसम्म आइसकेका छौं । हिजो मात्रै टीआरसी विधेयक प्रमाणीकरण भएको छ तर, अझै हामीले न्याय दिन सकेका छैनौं । पीडित परिवारलाई सम्झिँदा कहिलेकाहिँ चसक्क दुख्छ, जुन चिजको लागि लडाइँ लडियो, त्यहाँ अन्याय भएको देख्दा मन दुख्छ ।’ उहाँले युद्धको क्रममा माओवादीले पूर्वप्रधानमन्त्री देउवालाई लक्षित गरेर प्रहार नगरेको समेत बताउनुभयो । उहाँले भन्नुभयो, ‘उहाँमाथि आक्रमण थिएन, पुलिसको गाडी आयो भनेपछि हानेका थियौं । तर, पछि उहाँको गाडी प¥यो भनेपछि आत्मालोचना गर्दै गल्ती भएको छ, भनेर विज्ञप्ति पनि आएको थियो त्यसबेला । कहिलेकाहिँ सूचनाहरू सही आउँदैन ।’ उहाँले टीआरसी विधेयक टुंगोमा पुर्याउन भूमिका खेलेकोप्रति प्रधानमन्त्री ओली, देउवा र माओवादी अध्यक्ष प्रचण्डप्रति आभार व्यक्त गर्नुभयो ।
लेखक उपाध्यायले द्वन्द्वको एक दशकमा सुदूरपश्चिम क्षेत्रको पत्रकारिता र त्यस समयमा घटेका विभिन्न घटनाक्रमलाई पुस्तकमा समावेश गर्नुभएको छ ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच