स्टण्टबाजीले चल्दैन : प्रधानमन्त्री

झापा । प्रधानमन्त्री एवं नेकपा एमालेका अध्यक्ष केपी शर्मा ओलीले धाक धक्कु लगाउने र स्टण्टबाजीले देश नचल्ने बताउनुभएको छ । झापाको बेलडाँगी खानेपानी आयोजना उद्घाटन समारोहलाई सोमबार सम्बोधन गर्दै ओलीले यस्तो बताउनुभएको हो । देशलाई स्थिरता र विकासको बाटोमा लैजान कांग्रेस-एमाले मिल्नुपर्ने अवस्था आएकाले ठूला दल मिल्नुपरेको उहाँको जिकिर थियो । ओलीले सिङ नपलाएका बाच्छाले समेत एमालेलाई घ्याच्च-घ्याच्च हान्ने अवस्था आएपछि प्रमुख दुई दल मिलेर सरकार बनाउनुपरेको बताउनुभयो ।

उहाँले भन्नुभयो, ‘हामी नै सरकारमा किन आउनुपर्‍यो ? किन कांग्रेस र एमाले मिल्नुपर्‍यो ? दुईवटा पार्टी नमिल्दा, अस्वस्थ गतिविधि भए । सरकारले काम नगर्ने धाक धक्कु लगाउने चल्यो, बाच्छाहरूले पनि हान्ने अवस्था आयो, हान्दा केही भइहाल्ने त होइन । सिङ नपलाएका मुडुला बाच्छाले हानेर केही हुने त थिएन,’ ओलीले भन्नुभयो, ‘देश बनाउने कुनै तरिका सोच देखिएन, अस्थिरता, अन्योल र स्टण्टबाजीबाट देश बन्दैनथ्यो ।’ ओलीले सिङ नपलाएको बाच्छा भनेर नयाँ दलप्रति संकेत गर्नुभएको हो । ओलीले आइतबार झापामै आयोजित कार्यक्रममा सरकार सञ्चालन गर्नु सहकारी ठगेजस्तो नभएको भन्दै कटाक्ष गर्नुभएको थियो ।

उहाँले अबको १८ महिनामा देशलाई विकासको बाटोमा लैजाने उल्लेख गर्दै भन्नुभयो, । ‘देश बनाउन स्थिरता र स्थायित्व चाहिन्छ, सुद्धृढ सरकार बनाएका छौँ, यसले काम अगाडि बढाउँछु । सहमतिअनुसार अबको १८/१९ महिना मैले देश विकासको बाटोलाई अगाडि बढाउँछु, अस्तव्यस्त भएको थियो त्यसलाई सम्हाल्छु ।’ आफू झापा आउँदा भएको विरोधप्रति लक्षित गर्दै ओलीले भन्नुभयो, ‘यहाँ भएको विकास देखेर कतिपयलाई भतभत पोलेको छ ।’

‘निर्माणका अधुरो कामलाई गति’
प्रधानमन्त्री ओलीले प्रमुख दलको नेतृत्वमा सरकार बनेकाले विकास निर्माणका अधुरो कामलाई गति दिने बताउनुभएको छ । उहाँले सन् २०३० सम्ममा सबै नेपालीलाई गुणस्तरीय खानेपानी उपलब्ध गराउने लक्ष्य लिइएको र देशभर बिजुली, कृषि, सञ्चार, उद्योग र सरसफाइ आदिका अभियान सञ्चालन गर्ने बताउनुभयो । उहाँले जनताले घरमै धारो खोलेर पानी खान पाउँदा आफूलाई आनन्द लाग्ने बताउँदै देशलाई अस्थिर हुन नदिने बताउनुभयो । ‘देश बनाउन हामी सबै एकताबद्ध हुनुपर्छ । हामीले बाँदरले जस्तो आफ्नो घर पनि नबनाउने र अरूको घर पनि भत्काउने गरेमा देश बन्दैन ।’ प्रधानमन्त्री ओलीले भन्नुभयो, ‘हामी विभिन्न पार्टीका हुन सक्छौँ तर विकास निर्माणका काममा एक हुनुपर्छ । तपाईंहरूको प्रतिनिधि म फेरि प्रधानमन्त्री भएको छु, म देशका लागि थप केही गर्छु, तपाईंहरूको पनि नाम विश्वमा राख्छु यसमा ढुक्क हुन म आग्रह गर्छु ।’ प्रधानमन्त्री ओलीले आइतबार देशकै अग्लो १८ तले दमक व्यापारिक कम्प्लेक्सको उद्घाटन गर्नुभएको थियो ।

महारानी झोडामा जग्गाधनी दर्ता प्रमाण पुर्जा वितरण शुभारम्भ
प्रधानमन्त्री ओलीले झापाको गौरादह नगरपालिका-४ र ५ अन्तर्गतको जग्गाधनी दर्ता प्रमाण पुर्जा वितरण कार्यको सोमबार शुभारम्भ गर्नुभएको छ । साबिक महारानी झोडा गाविसका चार हजार घरधुरीका करिब आठ हजार कित्ता जग्गाको नापी प्रमाणित नभएका कारण लामो समयदेखि समस्या झेलिरहेका स्थानीयवासीले नेपाल सरकारको पछिल्लो निर्णयसँगै जग्गा प्राप्त गर्न लागेका हुन् । वर्तमान सरकारले गठन आदेशबाट समिति बनाई समाधानको पहल गरेपछि जग्गाधनी प्रमाण पुर्जा वितरण कार्य सम्भव भएको हो ।

सो अवसरमा प्रधानमन्त्री ओलीले व्यवस्था परिवर्तनपछि जनताको अवस्थामा परिवर्तन भएन भन्नेहरूका लागि जवाफ मिल्नेगरी अहिलेको संयुक्त सरकारले काम गरिरहेको बताउँदै जनताको हरेक समस्याको समाधान गर्ने प्रतिबद्धता व्यक्त गर्नुभयो । मुलुकमा अस्थिरता मच्चाउने र देशको समस्या समाधान भएको देख्न नसक्नेहरूले सरकार ढल्न लाग्यो भनेर हल्ला फैलाए पनि त्यो कदापि सम्भव नहुने उल्लेख गर्नुभयो ।