वासु स्मृति परिषद्बाट मुखिया, वैद्य र पहाडी सम्मानित

हिमालय टाइम्स

१५ चैत्र २०८१, शुक्रबार ०९:५९

Read Time = 4 mins

सिफारिस

लोकतन्त्रको विकल्प निरंकुशता हुनैसक्दैन : गृहमन्त्री लेखक

प्रिन्ट संस्करण

संगीत

A A- A+

काठमाडौं । वासु स्मृति परिषद्ले वरिष्ठ नाटककार मनबहादुर मुखिया, कविहरू विमल वैद्य र सन्ध्या पहाडीलाई सम्मानित र पुरस्कृत गरेको छ । नेपाली साहित्यका प्रसिद्ध साहित्यकार वासु शशीको ८९औं जन्मजयन्तीको अवसर पारेर आयोजना गरिएको कार्यक्रममा प्रमुख अतिथि चलचित्र निर्देशक एवं वरिष्ठ साहित्यकार यादव खरेलले वरिष्ठ नाटककार मनबहादुर मुखियालाई ‘वासु शशी साहित्य सम्मान २०८१’ बाट सम्मानित गर्नुभएको हो ।

यसैगरी उहाँले चालिस दशकका कवि विमल वैद्यलाई ‘वासु शशी साहित्य पुरस्कार २०८१’ बाट नगद २५ हजारसहित पुरस्कृत गर्नुभयो । त्यस्तै पचास दशककी कवि सन्ध्या पहाडीलाई ‘कृष्ण–सरस्वती साहित्य पुरस्कार २०८१’ बाट नगद २५ हजारसहित खरेलले पुरस्कृत गर्नुभयो । वासु स्मृति परिषद्की उपाध्यक्ष वरिष्ठ साहित्यकार हीरण्यकुमारी पाठकको सभापतित्वमा आयोजित सो कार्यक्रममा परिषद्का सदस्य सचिव प्रद्युम्न जोशीले स्वागत मन्तव्य व्यक्त गर्नु भएको थियो । कार्यक्रममा चलचित्र निर्देशक एवं सर्जक प्रकाश सायमीले सम्मानित र पुरस्कृत सर्जकहरूबारे आफ्नो मन्तव्य राख्नु भएको थियो ।

कार्यक्रममा सम्मानित र पुरस्कृतहरू मुखिया, वैद्य र पहाडीले पनि आ–आफ्नो मन्तव्य राख्नुभएको थियो । कार्यक्रमको सहजीकरण परिषद्का सदस्य यादव भट्टराईले गर्नु भएको थियो । वासु स्मृति परिषदका अध्यक्ष गणेश रसिक हाल गम्भीर बिरामीका कारण कार्यक्रममा अनुपस्थित रहनु भएको थियो । कार्यक्रममा कृष्ण–सरस्वती साहित्य पुरस्कारकी संरक्षक श्रीमती सरस्वती जोशी, परिषद्का सल्लाहकार राधेश्याम लेकालीलगायत साहित्यकारहरूको बाक्लो उपस्थिति रहेको थियो ।

वासु शशी साहित्य पुरस्कारबाट यसअघि कवि एवं साहित्यकारहरू विनोद अश्रुमाली, मञ्जु काँचुली, बद्री पलिखे, गणेश रसिक, हेम हमाल, विश्वविमोहन श्रेष्ठ, अशेष मल्ल, हरि अधिकारी, कृष्णभूषण बल, काजी रोशन, डा.विष्णुविभू घिमिरे, नरेन्द्रबहादुर श्रेष्ठ, डा.विमल कोइराला, तीर्थ श्रेष्ठ, कणाद महर्षि, उषा शेरचन, गोविन्द गिरी प्रेरणा, शैलेन्दुप्रकाश नेपाल, इन्दिरा प्रसाईं, राधेश्याम लेकाली, मोमिला जोशी, श्यामल र प्रतिसरा सायमी पुरस्कृत भइसक्नु भएको छ ।

यसैगरी वासु शशी स्मृति सम्मानबाट वरिष्ठ साहित्यकारहरू तीर्थराज वन्त, डा.मोहन हिमांशु थापा, तुलसी दिवस, भैरवनाथ रिमाल ‘कदम’, प्रदीप रिमाल, यादव खरेल, गीता केशरी, शिव रेग्मी, परशु प्रधान, कालीप्रसाद रिजाल, कृष्ण जोशी, रमा शर्मा, श्रीधर खनाल, ज्ञान उदास, भागिरथी श्रेष्ठ, कल्पना प्रधान, श्रेष्ठ प्रिया पत्थर, कर्ण शाक्य, हीरण्य भोजपुरे र किरण खरेल सम्मानित भइसक्नु भएको छ ।

यो खबर पढेर तपाईलाई कस्तो महसुस भयो ?