सरकारद्वारा नागरिक एप निर्देशिका खारेज

काठमाडौं । मन्त्रिपरिषद् बैठकले नागरिक एप (सञ्चालन तथा व्यवस्थापन) निर्देशिका २०७८ खारेज गरेको छ । सञ्चार तथा सूचना प्रविधिमन्त्री एवं सरकारका प्रवक्ता पृथ्वीसुब्बा गुरुङले सोमबार बसेको मन्त्रिपरिषद् बैठकले विभिन्न १३ वटा निर्णयहरू गरेको बताउँदै सो जानकारी गराउनुभएको हो । बैठकले चैत २८ र २९ गते काठमाडौंमा हुने नेपाल भारत भन्सार महानिर्देशकस्तरीय वार्ताका लागि भन्सार विभागका महानिर्देशकको संयोजकत्वमा वार्ता टोली गठन गर्ने र वार्ता गर्न अख्तियारी प्रदान गर्ने, २०८२ वैशाख २६ र २७ गते भुटानको थिम्पुमा आयोजना हुने १८औँ साउथ एसिया पावर सेक्रेटेरिज राउण्ड टेबल (आरएसआरटी) कार्यक्रममा सहभागी हुन ऊर्जा, जलस्रोत तथा सिँचाइ मन्त्रालयका सचिव (ऊर्जा) लाई स्वीकृति प्रदान गर्ने निर्णय गरेको छ ।

यस्तै, मन्त्रिपरिषद् बैठकले ऊर्जा, जलस्रोत तथा सिँचाइ मन्त्रालयअन्तर्गत कार्यरत सहसचिव (प्रा.) राजेन्द्रप्रसाद शर्माको राजीनामा स्वीकृत गर्ने, गृह मन्त्रालय तथा मातहतका निकायहरूको संगठन तथा व्यवस्थापन सर्वेक्षण गर्न पूर्वस्वीकृति प्रदान गर्ने, नेपाली सेनाअन्तर्गत एक जनालाई महासेनानीबाट सहायक रथी दर्जामा बढुवा गर्ने, एक जनालाई सहायक रथीबाट उपरथी दर्जामा बढुवा गर्ने र एकजना उपरथीको वैदेशिक भ्रमण स्वीकृत गर्ने पनि निर्णय गरेको छ ।

यस्तै, रातो मच्छिन्द्रनाथको रथयात्रा (भोटो देखाउने जात्रा) र मिननाथ रथयात्राको लागि ६६५.९७ क्यू. फिट काठ गुठी संस्थानलाई उपलब्ध गराउने र उक्त वन पैदावारको हुन आउने राजस्व रोयल्टी मिनाहा गर्ने निर्णय पनि बैठकले गरेको छ ।

२०८२ जेठ ४ गतेदेखि ७ गतेसम्म बेलायतको लण्डनमा हुने एजुकेसन वल्र्ड फोरम २०२५ मा शिक्षा, विज्ञान तथा प्रविधिमन्त्री माननीय विद्या भट्टराईलाई सहभागी हुन स्वीकृति दिने, भागेश्वर गाउँपालिका, डडेल्धुराको केन्द्र वडा नं. ४ बगरकोटबाट परिवर्तन गरी वडा नं. ४ टप्वा कायम गर्ने र सोको सूचना नेपाल राजपत्रमा प्रकाशन गर्ने, २०८२ जेठ १५ गतेदेखि १७ गतेसम्म जापानको राजधानी टोकियोमा आयोजना हुने एपिटी (एसिया प्यासिफिक टेलिकम्युनिटी मिनिष्ट्रल मिटिङ) एपिटी-एमएम मा सहभागी हुन सञ्चार तथा सूचना प्रविधि मन्त्री पृथ्वी सुब्बा गुरुङलाई स्वीकृति दिने निर्णय पनि मन्त्रिपरिषद् बैठकले गरेको छ । मन्त्रिपरिषद्ले विभिन्न १३ वटा निर्णय गरेको छ ।
त्यस्तै, वरिष्ठ पत्रकार एवं लेखक भैरव रिसालको निधनप्रति शोक व्यक्त गर्दै मन्त्रिपरिषद्ले श्रद्धाञ्जलि व्यक्त गरेको छ । ‘वरिष्ठ पत्रकार तथा लेखक भैरव रिसालको संवत् २०८१ साल चैत २४ गते आइतबारको दिन ९७ वर्षको उमेरमा असामयिक निधन भएकोमा नेपाल सरकार गहिरो शोक प्रकट गर्दै भावपूर्ण श्रद्धाञ्जलि व्यक्त गर्दछ । यस दुःखद घडीमा शोकसन्तप्त परिवारजनप्रति नेपाल सरकार हार्दिक समवेदना व्यक्त गर्दछ’, मन्त्रिपरिषद्ले भनेको छ ।

भगबण्डा नमिलेर गभर्नर नियुक्तिमा ढिला भएको होइन : प्रवक्ता गुरुङ
सञ्चार तथा सूचना प्रविधिमन्त्री एवं सरकारका प्रवक्ता पृथ्वीसुब्बा गुरुङले नेपाल राष्ट्र बैंकले चाँडै नयाँ गभर्नर पाउने बताउनुभएको छ । मंगलबार मन्त्रिपरिषद् बैठकका निर्णय सुनाउने क्रममा सञ्चारकर्मीहरूको जिज्ञासाको जवाफ दिँदै मन्त्री गुरुङले छिटोभन्दा छिटो राष्ट्र बैंकले गभर्नर पाउने बताउनुभयो । मन्त्री गुरुङले गभर्नरको नियुक्तिका लागि सिफारिश गर्ने कमिटी उपप्रधानमन्त्री एवं अर्थमन्त्री विष्णु पौडेलको संयोजकत्वमा गठन भएको र कमिटीले काम पनि गरिरहेको बताउनुभयो । उहाँले गभर्नरको नियुक्तिमा दुईवटा पार्टीको बीचमा भागबण्डा नमिलेर ढिलो भएको भन्ने कुरा सत्य नभएको जिकिर गर्नुभयो । ‘गभर्नरको नियुक्तिमा दुईवटा पार्टीको बीचमा भागबण्डा नमिलेर ढिलो भएको भन्ने कुरा सत्य होइन,’ उहाँले भन्नुभयो । मन्त्री गुरुङले डेपुटी गभर्नर नीलम ढुंगानालाई सरकारले कार्यवाहक गभर्नर तोकिसकेकाले काम नरोकिने बताउनुभयो । उहाँले नेपाललाई ‘ग्रे लिस्ट’बाट माथि उठाउने कुरा गभर्नरको हातमा मात्रै नरहेको र सरकारले ‘ग्रे लिस्ट’बाट माथि उठ्नका लागि काम गरिरहेको सुनाउनुभयो ।