पोखरा । पोखरामा शनिबार टाइगर कप राष्ट्रिय तथा अन्तर्राष्ट्रिय क्लब च्याम्पियनसिप भलिबलको फाइनलमा सशस्त्र प्रहरीको एपिएफ क्लबसँग पराजित भएपछि चन्द्रागिरि न्युडायमण्ड क्लबका प्रशिक्षक कुमार राईको प्रतिक्रिया थियो, ‘अर्को वर्ष दर्शकले चाहेजस्तो खेल प्रदर्शन गर्ने गरी, उपाधि जित्ने गरी आउनेछौँ ।’
फाइनलमा कडा टक्कर दिए पनि न्युडायमण्डले विभागीय टोली एपिएफलाई हराउन सकेन । एपिएफले उपाधिमा हृयाट्रिक गर्दा न्युडायमण्ड भने उपविजेतामा सीमित हुन पुग्यो । न्युडायमण्डको उपाधि चुम्ने सपना यस वर्ष पूरा नभए पनि प्रशिक्षक राई निराश भने हुनुहुन्न । खेलाडीको प्रदर्शन र त्यसमा पनि नयाँ खेलाडीको खेलले उहाँमा आत्मविश्वास ठूलो छ । सिनियर केही खेलाडीको चोट र नयाँ खेलाडीले आशा गरेअनुसार प्रदर्शन गर्न नसक्दा पराजय भोग्नुपरे पनि राईमा उपाधि जित्ने हुटहुटी भने झनै बढेको छ । क्लबमा झनै उत्साह थपेको छ ।
पछिल्लो समयदेखि न्युडायमण्ड स्पोटर््स क्लबको नामका अगाडि चन्द्रागिरि थपिएको छ । चन्द्रागिरि त्यही नगरपालिका हो, जहाँ न्युडायमण्ड महिला भलिबल टिम रहेको छ । आफ्नै ठाउँमा रहेको भलिबल खेल विकासमा दुई दशकदेखि निरन्तर क्रियाशील क्लबलाई स्थानीय सरकारले अभिभावकत्व लिएपछि न्युडायमण्ड क्लबमा उत्साह छाएको हो । नगरपालिकाबाट राम्रो साथ पाएपछि यसबाट टिम व्यवस्थापकदेखि खेलाडी खेलमा अझै राम्रो गर्दै उपाधिको सपना देख्न थालेका छन् । ‘हामी अर्को वर्ष अझै बढी तयारीसहित राम्रा खेलाडी लिएर उपाधि जित्नेगरी पोखरा आउनेछौँ । दर्शकले चाहेजस्तो खेल प्रस्तुत गर्नेछौँ, हामीलाई नगरपालिकाबाट समेत साथ मिलेको छ, हामी उत्साहित नै छौँ,’ प्रशिक्षक राईले भन्नुभयो । टाइगर कपको फाइनलमा आफ्नो टोली पुगेको खबरपछि खेलाडीमा उत्साह भर्न चन्द्रागिरि नगरपालिकाको टोली शुक्रबार पोखरा आयो । पोखरा रंगशालामा चन्द्रागिरिका नगरप्रमुख घनश्याम गिरी, उपप्रमुख वसन्ती श्रेष्ठ, नगरपालिकाका प्रवक्ता कृष्णप्रसाद खत्री, वडा १५ का वडाध्यक्ष घनश्याम लुईंटेलसहित अन्य वडाध्यक्षले खेलाडीलाई उत्साहित बनाइरहनुभयो ।
स्थानीय सरकारले राष्ट्रिय खेल भलिबल र त्यसमा पनि महिला भलिबलको विकासका लागि गरेको प्रयास प्रशंसनीय छ । यसले खेलकुदको विकासमा सहयोग पुगेको छ भने खेलाडीमा समेत आत्मविश्वास बढाएको प्रशिक्षक राईले बताउनुभयो । चन्द्रागिरि नगरपालिकाले गत महिनादेखि न्युडायमण्डलाई प्रायोजन सुरुवात गरेको हो । विगतमा पनि खेल सामग्री, मेडिकल उपकरण, प्रशिक्षणलगायतमा सहयोग गर्दै आएको थियो ।
तर, यस वर्षदेखि न्युडायमण्ड महिला भलिबल क्लबलाई नगरपालिकाले आफ्नो ‘अफिसियल क्लब’ बनाएको छ । जिल्ला, प्रदेश तथा राष्ट्रियस्तरको प्रतियोगितामा ‘चन्द्रागिरि नगरपालिका न्युडायमण्ड महिला भलिबल टिम’को नामसहित न्युडायमण्डले सहभागिता जनाउने नगरप्रमुख गिरीले जानकारी दिनुभयो ।
‘न्युडायमण्ड महिलाहरूको युनिक टोली हो । पहिला पनि सानो-सानो सहयोग गरेका थियौँ । तर, अहिले अफिसियल टिमका रूपमा विकास गरौँ भनी छुट्टै बजेट व्यवस्थापन गरेका छौँ,’ उहाँले भन्नुभयो, ‘यसबाट नगरपालिकाको पहिचान बढाएको छ, खेल जगत्लाई पनि सहयोग पुगेको छ ।’
नगरपालिकाले प्रतियोगितामा खेलाडीका लागि आवश्यक खेलकुद सामग्री तथा प्रतियोगिताको व्यवस्थापन खर्च सबै बेहोर्नेछ । यसका लागि चालु आर्थिक वर्षमा १५ लाख बजेट विनियोजन गरिएको छ । नगरप्रमुख गिरीले राष्ट्रिय तथा अन्तर्राष्ट्रियरूपमा स्थापित तथा महिला भलिबल खेलाडी उत्पादन गरेर राष्ट्रलाई योगदान गरेको क्लबसँग नगरपालिका जोडिन पाउँदा खुसी लागेको बताउनुभयो । अन्य स्थानीय सरकारले पनि खेलकुद विकासका लागि सहयोग गर्नुपर्ने भनाइ गिरीको छ ।
चन्द्रागिरिले महिला भलिबलबाहेक फुटबल, ब्याडमिन्टन, बक्सिङलगायतका प्रतिस्पर्धात्मक खेलहरूको विकासका लागि मात्र बर्सेनि दुई करोडमाथि खर्च गर्दै आएको नगरप्रमुख गिरीले जानकारी दिनुभयो । ‘नगरपालिकाले खेलकुद विकासलाई उच्च प्राथमिकता दिएर काम गर्दै आएको छ,’ प्रमुख प्रशासकीय अधिकृत हेमराज अर्यालले भन्नुभयो ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच