फागुन ९ गतेबाट सडक संर्घष गर्दै राप्रपा

काठमाडौं । राजसंस्थावादी प्रमुख राजनीतिक शक्ति राष्ट्रिय प्रजातन्त्र पार्टी राजा फर्काउने एजेण्डासहित फागुन ९ गते सडक संघर्षमा होमिने भएको छ । पार्टी केन्द्रीय कार्यालय धुम्बाराहीमा बुधबार बसेको बैठकले फागुन ९ गते काठमाडौंसहित ७४ जिल्लामा प्रदर्शनसहित प्रमुख जिल्ला अधिकारीमार्फत नेपाल सरकारलाई माग पत्र पेस गर्ने निर्णय गरेको हो । राष्ट्रियता, विकास, सुशासन, सेवाप्रवाहलगायत जनजीविकासँग सम्बन्धित माग राखेर फागुन ९ गते नै प्रधानमन्त्री पुष्पकमल दाहाल ‘प्रचण्ड’लाई माग पत्र बुझाउने निर्णय गरेको प्रवक्ता मोहन श्रेष्ठले जानकारी दिनुभयो ।

बुधबारको बैठकमा आन्दोलन मूलसमिति संयोजकसमेत रहेका अध्यक्ष राजेन्द्र लिङ्देन, निर्देशन समिति अध्यक्ष प्रकाशचन्द्र लोहनी, आन्दोलन परिचालन समिति संयोजक धवलशमशेर राणा, पदाधिकारीहरू, केन्द्रीय सदस्यहरू, उपत्यकाभित्रका जिल्ला अध्यक्षलगायत सहभागी हुनुहुन्थ्यो । राप्रपाले गत पुस ३ गते केन्द्रीय समितिबाट आन्दोलनमा जाने निर्णय गरेको थियो । राजसंस्था, पूर्ण धार्मिक स्वतन्त्रतासहित वैदिक सनातन धर्मसापेक्ष हिन्दूराष्ट्र पुनःस्थापना र प्रदेश तहको खारेजीको लागि जनदबाब सिर्जना गर्न बृहत् आन्दोलन गर्ने राप्रपाको निर्णय थियो ।

राप्रपामा भित्रिने त के उनीहरूसँग अब वार्ता पनि हुँदैन : प्रसाईं
राष्ट्र, राष्ट्रियता, धर्म, संस्कृति र नागरिक बचाऊ महाअभियानका नाममा कार्यक्रम गर्दै आउनुभएका मेडिकल व्यवसायी दुर्गा प्रसाईंले राष्ट्रिय प्रजातन्त्र पार्टी (राप्रपा) सँग वार्ता नहुने घोषणा गर्नुभएको छ । बुधबार पत्रकार सम्मेलन गर्दै प्रसाईंले राप्रपासँग अब वार्ता नहुने बताउनुभएको हो । ‘दुर्गा प्रसाईं राप्रपामा भित्रिन्छ भन्ने कुरा यो कल्पनादेखि बाहिरको हो,’ प्रसाईंले भन्नुभयो, ‘म एमालेको केन्द्रीय सदस्य छँदै छ नि । राप्रपाभन्दा अलिकति गतिलो पार्टी हो नि त ।’

उहाँले आफूले अभियानमा राप्रपाका मानिससमेत नल्याउने बताउनुभयो । ‘राप्रपाका मानिस त म ल्याउँदिनँ, राप्रपामा भित्रने कुरै छाडिदिनुस्,’ प्रसाईंले भन्नुभयोे, ‘रोटी साँधेर खानेहरूको के कुरा गर्नुहुन्छ ? हिजो बिहान आएर हात मिलाए, दिउँसो आउँछु भने, आएनन् । उनीहरूको के कुरा गर्ने ?’ प्रसाईंले मंगलबार भृकुटीमण्डपमा कार्यक्रम गर्नुअघि भक्तपुरस्थित एक रिसोर्टमा राप्रपा महामन्त्री राणालगायतसँग छलफल गर्नुभएको थियो । सोमबार पनि प्रसाईंले सोही रिसोर्टमा अध्यक्ष राजेन्द्र लिङ्देनसँग छलफल गर्नुभएको थियो ।
छलफलपछि राप्रपा महामन्त्री राणाले आफूहरू एक ठाउँमा उभिएकाले राप्रपा कार्यकर्ताहरूलाई भृकुटीमण्डपको कार्यक्रममा सहभागी हुन अपिल गर्नुभएको छ । तर, मंगलबार भृकुटीमण्डपको कार्यक्रममा राप्रपाको साथ नपाएको गुनासो प्रसाईंको छ । ‘अघि बिहान वार्ता गर्ने कुरा गर्दै थिए, अब वार्ता नै हुँदैन,’ प्रसाईंले राप्रपालाई लक्षित गर्दै भन्नुभयोे, ‘तिनीहरूसँग के छ र वार्ता गर्नु ? उनीहरूले त यो आन्दोलन बिथोल्न खोजेका रहेछन् ।’

प्रसाईंले राप्रपा, केपी ओली, पुष्पकमल दाहाल ‘प्रचण्ड’सँग के छ र वार्ता गर्ने ? भन्दै प्रश्नसमेत गर्नुभएको थियो । ‘दुर्गा प्रसाईं राप्रपामा जान्छ ? त्योभन्दा त पार्टी खोल्नै परे राम्रो पार्टी बनाउँछु नि’ उहाँले भन्नुभयोे, ‘तर पार्टी मेरा लागि आवश्यक होइन, नागरिकको मुक्ति हो ।’
प्रसाईंले पनि राजसंस्थाका मुद्दा उठाएकाले राप्रपाले ‘राजवादीलाई समेट्न’ खोजेको थियो । त्यसका लागि राप्रपा अध्यक्ष लिङ्देनले उपाध्यक्ष हेमजंग गुरुङ र महामन्त्री धवलशमशेर राणा रहेको वार्ता समिति गठन गर्नुभएको थियो । उक्त समितिले मंगलबार भक्तपुरमा प्रसाईंसँग पहिलो चरणको वार्ता गरेको थियो ।