काठमाडौं । अन्तर्राष्ट्रिय नेपाली साहित्य समाज (अनेसास)को आठौं अन्तर्राष्ट्रिय साहित्य सम्मेलन सम्पन्न भएको छ । अनेसासका अध्यक्ष गोवद्र्धन पूजाको सभापतित्वमा पोर्चुगलको राजधानी लिस्बनमा सम्मेलनसम्पन्न भएको हो । सम्मेलनले आठबुँदे लिस्बन घोषणापत्रसमेत जारी गरेको छ ।
सम्मेलनले विश्वभर नेपाली भाषा र साहित्यको संरक्षण र संवद्र्धन गर्नुपर्नेमा जोड दिएको छ । यस्तै नेपाली भाषा र साहित्यको प्रचार-प्रसार तथा प्रवासमा नेपाली भाषा पाठशाला सञ्चालनका लागि पहल गरिनेबारे सम्मेलनमा छलफल भएको जनाइएको छ ।
यस अन्तर्राष्ट्रिय साहित्य सम्मेलनमा विश्वभर छरिएर रहेका नेपाली भाषा, साहित्य-संस्कृतिका अध्येता, लेखक, भाषाविद्, कलाकर्मी, संस्कृतिविद्, सर्जक, स्रष्टा र साहित्यकर्मी भेला भएका थिए । सम्मेलनमा नेपाल, भारतसहित विश्वभरका ४० च्याप्टर गरी एक सय बढी प्रतिनिधिको सहभागिता रहेको थियो जसमा नेपालीसहित विभिन्न भाषा, कला, साहित्य-संस्कृतिका विषयमा विज्ञहरूबाट कार्यपत्र प्रस्तुति र छलफल भएको थियो ।
उक्त अवसरमा २५० अमेरिकी डलर राशिको नवरत्न पुरस्कार बेलायतनिवासी साहित्यकार माया गुरुङ र डा.संगीता स्वेच्छालाई प्रदान गरिएको थियो । त्यसैगरी सम्मेलनका अवसरमा अनेसासको प्रकाशन रहेको ‘अन्तर्दृष्टि’को स्वर्ण अंक सार्वजनिक गरिएको थियो । सन् १९९१ देखि प्रकाशन सुरु भएको अन्तर्दृष्टिका प्रथम प्रधान सम्पादक अनेसासका सल्लाहकार तथा पूर्वअध्यक्ष पुरु सुवेदी हुनुहुन्छ । हालसम्म १४ जनाले अन्तर्दृष्टिको प्रधान सम्पादकत्वको भूमिका निर्वाह गरिसकेका छन् । यस अंकका प्रधान सम्पादक लालगोपाल सुवेदी हुनुहुन्छ भने कार्यकारी सम्पादक रमेश दाहाल रहनुभएको छ ।
दाहालका अनुसार यस स्वर्ण अंकमा अनेसास र अन्तर्दृष्टिका अनुभूतिहरूप्रधान लेख, कथा, संस्मरण नियात्रा, कविता गजल गीत मुक्तकलगायत समावेश रहेको छ । यसै अवसरमा अनेसासकी संस्थापक सदस्य स्व.नन्दादेवी सुवेदी स्मृतिग्रन्थ, पुरु सुवेदीको ‘पुरोधा’ कवितासंग्रह, संगीता स्वेच्छाको ‘सेतो सिउँदो’ अनेसासको ‘प्रवासी बालसिर्जना’, यात्रामा देश, सर्वज्ञ वाग्लेको ‘नेता बन छोरा नेता बन’ खुशी खनालका आठ पुस्तक सुरेन उप्रेतिका बालसिर्जना प्रतिमा केसीको ‘प्रवासी मन’, रत्न सुब्बाको बालसिर्जना, बालतरंग, ललितश्री सिक्किमबाट बालकवितासंग्रह सिक्किम च्याप्टर स्मारिका- ‘विश्व सेतु’, पूर्ण योन्जन, सिक्किम तामाङ जातीय चिनारी, विमल गिरीको ‘अजम्बरी रसुनाखरी’ हाइकुसंग्रह, लतिका जोशीको ‘जीवन अदृश्य पलहरू’, ‘संवाद संजाल’ पत्रिकालगायत कृतिहरूको लोकार्पण गरिएको थियो ।
आठौं सम्मेलनका अवसरमा अन्तर्दृष्टिका प्रथम प्रधान सम्पादक पुरु सुवेदीलाई ‘अन्तर्दृष्टि स्वर्ण सम्मान’ले सम्मानित गरिएको थियो भने ‘अनेसास हिरो २०२४’ अनेसास न्युहृयामसायर च्याप्टरका प्रधान सम्पादक तथा पुरस्कार समितिका सदस्य ईश्वरी भट्टलाई प्रदान गरिएको थियो । अनेसास पोर्चुगल च्याप्टरको संयोजकत्वमा भएको यस सम्मेलनमा प्रवासमा बसेर नेपाली भाषा साहित्य कला संस्कृतिका सम्वद्र्धनमा योगदान पुर्याएबापत दर्जनौंलाई सम्मानित गरिएको संयोजक च्याप्टरका महासचिव एनबी अञ्जानले जानकारी गराउनुभयो ।
महासचिव अञ्जानले सम्मेलनको व्यवस्थापनमा कुनै कसर बाँकी नराखिएको र सम्मेलन सफल पार्न स्थानीय नेपाली रेष्टुरेन्टका सञ्चालक, व्यापारी तथा यहाँका स्थानीय निकायहरूले गरेको सहयोगप्रति खुलेर प्रशंसा गर्दै उनीहरूलाई हार्दिक आभारसमेत व्यक्त गर्नु भएको थियो ।
कार्यक्रममा अनेसासका अध्यक्ष गोवद्र्धन पूजा, बिओटी सभापति पदम विश्वकर्मा, सल्लाहकार रोहिणी शर्मा, पूर्वअध्यक्षहरू मोहन सिटौला, पुरु सुवेदी, उपाध्यक्ष राजेन्द्र श्रेष्ठ, महासचिव विमला निरौला, एनआरएनए आइसिसी सचिव भीम केसी, आइसिसी सदस्य राजकुमार थापा, अनेसास पोर्चुगलका संस्थापक अध्यक्ष केजीन राई, एनआरएनए पोर्चुगलका अध्यक्ष उमेश खड्का, समाजका केन्द्रीय सदस्य यादव देवकोटा, पोर्चुगल च्याप्टरका अध्यक्ष सवी श्रेष्ठलगायतले नेपाली भाषा र साहित्यका विविध विषयमा धारणा राख्नुभएको थियो ।
नेपाली भाषा र साहित्यलाई विश्वव्यापी बनाउन सम्मेलनले ठूलो भूमिका निर्वाह गरेको अध्यक्ष गोवद्र्धन पूजाले बताउनुभयो । सम्मेलनले नेपाली भाषा र साहित्यको थप प्रचार-प्रसारका साथै संरक्षण र संवद्धर्न गर्नुपर्ने सन्देश दिएको उहाँको भनाइ छ ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच