काठमाडौं । विन्ध्यवासिनी म्युजिक अवार्डको १४औँ संस्करण सम्पन्न भएको छ । विभिन्न ३१ विधामा सम्मान र अवार्ड प्रदान गर्दै अवार्ड सम्पन्न भएको हो । समारोहमा सुगम संगीततर्फ निशान भट्टराई र काव्य आचार्यले सर्वोत्कृष्ट गायक-गायिकाको अवार्ड चुम्नुभयो । त्यसैगरी यही विधामा बिबी अनुरागी संगीतकार, सत्यराज चौलागाईं रचनाकार र सुदीप सागर संगीत संयोजकको अवार्ड विजेता हुनुभयो । सर्वोत्कृष्ट गीतको अवार्ड विष्णु भण्डारीले आफ्नो पोल्टामा पार्नुभयो ।
समारोहमा नेपालकै पहिलो क्याब्रे गीतकी ख्यातिप्राप्त गायिका मिरा राणालाई एक लाख रुपैयाँसहित विन्ध्यवासिनी लाइफटाइम अचिभमेन्ट अवार्ड २०८० बाट सम्मान गरिएको थियो । त्यस्तै, संगीतकार भूपेन्द्र रायमाझीलाई ५० हजार रुपैयाँसहित विन्ध्यवासिनी साधना सम्मान, जनही नगद २५ हजार रुपैयाँसहित पत्रकार शान्तिप्रियलाई विन्ध्यवासिनी कला पत्रकारिता सम्मान, गायक रूपक डोटेललाई प्रेमध्वज संगीत रत्न सम्मान र लोकगायक राजु परियारलाई झलकमान लोकसंगीत सम्मानबाट सम्मानित गरिएको थियो । पूर्वमिस नेपाल सुगरिका केसीद्वारा सञ्चालित कार्यक्रममा गायिका लक्ष्मी सुवेदीलाई १५ हजार रुपैयाँसहित अनवरत लोकदोहोरी स्रष्टा सम्मानबाट सम्मान गरिएको थियो ।
विन्ध्यवासिनी लाइफटाइम अचिभमेन्ट अवार्डबाट सम्मानित गायिका मिरा राणाको सम्मानमा गायिका बेनिसा पौडेलले उहाँद्वारा स्वरबद्ध ‘मखमली चोली चाहिँदैन’ बोलको गीत गाउनुभएको थियो । त्यस्तै, सम्मानित संगीतकार भूपेन्द्र रायमाझीको सम्मानमा गायक सुमनकुमार श्रेष्ठले ‘बिरही माया र फूल भए जिन्दगी’ बोलको गीत प्रस्तुत गर्नुभएको थियो ।
कार्यक्रममा सम्मानित गायक रूपक डोटेलले आफ्नै गीत सपनी राम्रो देख्दिनँ, मेरो बोली सुन्दा, ए माइली, चोखो माया लाकै हो, मुस्कानमा अल्झिएँ कि, वनकी चरी’ जस्ता गीत गाउनुभएको थियो । त्यसैगरी अर्का सम्मानित गायक राजु परियारले आफ्नो लोकप्रिय सामाजिक जागरणको गीत ‘सुनपानीले छर्क मायालु’ प्रस्तुत गर्नुभएको थियो ।
गायक शिरिष देवकोटा र देवी घर्ती, सुनिता बुढा क्षेत्रीले ‘बैना हजुर, नजरैको भर, म त आउने थिइनँ’ जस्ता गीत प्रस्तुत गर्नुभएको थियो । गायिका समीक्षा अधिकारीले ‘नबोली नबोली’ बोलको गीत प्रस्तुत गर्नुभएको थियो । नायक पल शाह र एलिना रायमाझी, काजिश श्रेष्ठ, मौसम हिमाली, विजय पुनलगायतले विभिन्न गीतमा नृत्य प्रस्तुत गर्नुभएको थियो । लामो समयपछि नायक शाह र गायिका अधिकारी एउटै मञ्चमा देखिनुभएको हो ।
अवार्डको आयोजक संस्था विन्ध्यवासिनी फाउण्डेसनकी अध्यक्ष लिना शर्मा रेग्मीको स्वागत मन्तव्यबाट सुरु भएको कार्यक्रममा मनिष गन्धर्व र उहाँको सारंगी स्कुलका विद्यार्थीले सारंगीमार्फत् विभिन्न धुन प्रस्तुत गर्नुभएको थियो । समारोहमा मस्ट पपुलर आर्टिस्ट अवार्ड पल शाह र पब्लिक च्वाइस अवार्ड एलिना रायमाझीलाई प्रदान गरिएको थियो ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच