महिला नेतृत्व कृषि सम्मेलन

चितवन । कृषिको रूपान्तरणकारी भविष्यः कृषिमा आधारित व्यवसायमा नवप्रवद्र्धन, दिगोपन र उद्यमशीलताको प्रवद्र्धन भन्ने नाराका साथ चितवनमा महिला नेतृत्व कृषि सम्मेलन सुरु भएको छ । नेपाल उद्योग परिसंघअन्तर्गत महिला नेतृत्व फोरम (सिएनआइडब्लुएलएफ) को आयोजनामा शनिबारदेखि महिला नेतृत्व कृषि सम्मेलन-२०२४ सुरु भएको छ ।

चितवन प्रदर्शनी केन्द्रमा आयोजित सम्मेलन उद्घाटन गर्दै कृषि तथा पशुपन्छी विकासमन्त्री ज्वालाकुमारी साहले सरकारले कृषिलाई प्राथमिकतामा राखेको बताउनुभयो । कृषि क्षेत्रको विकास, कृषि पेशाको सम्मान एवं कृषकलाई प्रोत्साहन गर्न आफू प्रतिबद्ध रहेको उहाँको भनाइ थियो । मन्त्री साहले आत्मनिर्भर अर्थतन्त्र निर्माणका लागि कृषिको आधुनिकीकरणमा जोड दिँदै त्यसका लागि नीतिगतरूपमा सहजीकरण गर्न मन्त्रालय तयार रहेको बताउनुभयो ।

नेपाल उद्योग परिसंघका अध्यक्ष राजेशकुमार अग्रवालले उच्च परिमाणमा कृषि उपज आयात भइरहेको भन्दै कृषिको आधुनिकीकरण गर्दै बजारीकरणमा ध्यान दिनुपर्ने बताउनुभयो । उहाँले भन्नुभयो, ‘कृषि वस्तुमा समेत हाम्रो परनिर्भरता बढेको छ । परनिर्भरता घटाउँदै लैजान आन्तरिक उत्पादन र त्यसको खपतमा ध्यान दिन आवश्यक छ । आगामी बजेटले आन्तरिक उत्पादन र प्रयोगमा प्रोत्साहन गर्ने नीति अवलम्बन गर्नुपर्छ । कृषिलाई आधुनिकीकरण गर्दै उत्पादन र खपत बढाउन आवश्यक छ ।’

उहाँले कृषि पेशालाई सम्मान गर्न, कृषकलाई प्रोत्साहित गर्दै उत्पादन र उत्पादकत्व बढाउने नीति अवलम्बन गरिनुपर्नेमा जोड दिँदै अध्यक्ष अग्रवालले आगामी बजेट स्वदेशी उद्योग प्रवद्र्धन गर्ने रणनीतिमा केन्द्रित हुने विश्वास व्यक्त गर्नुभयो ।

परिसंघका उपाध्यक्ष वीरेन्द्रराज पाण्डेले कृषि क्षेत्रको व्यावसायीकरणमा जोड दिँदै कृषकले दुःख गरेर उत्पादन गरेका कृषि उपजको बजारीकरणका लागि सहयोग गर्नुपर्ने बताउनुभयो । परिसंघ महिला नेतृत्व फोरम सभापति छायाँ शर्माले सम्मेलनमा महिलामुखी कृषि यान्त्रीकरण, नेपालको माटो सुहाउँदो कृषि विकास, दिगो कृषि विकासका लागि कृषक महिलाका सवाल, महिलाको कृषिमा संलग्नताको सम्मान र उद्यमशीलताका लागि लिइनुपर्ने आवश्यक कदमका विषयमा गहन छलफल हुने बताउनुभयो । कृषिको महत्व बुझाउन र दिगो भएर लाग्न यो सम्मेलनले उत्प्रेरित गर्ने उहाँको भनाइ थियो ।

शर्माले भन्नुभयो, ‘अहिले कृषि सरकारको प्राथमिकतामा नपरेको र कृषकलाई पनि हीनताबोध हुने क्षेत्र परेको छ । कृषकलाई प्रोत्साहन गर्न यो सम्मेलन गरेका हौँ ।’ कृषिका विद्यमान समस्या, चुनौती तथा अवसर पहिल्याउँदै कृषिमा महिला कृषकलाई अघि बढाउन लिइनुपर्ने नीतिगत व्यवस्थाका विषयमा सरकारलाई सुझाव पेश गरिने उहाँले जानकारी गराउनुभयो ।

चितवन उद्योग संघका अध्यक्ष सूर्यप्रसाद न्यौपानेले चितवनको पर्यटन र कृषि उद्यमशीलतामा संघले काम गरिरहेको बताउनुभयो । ठूलोमात्रामा कृषकको संख्या चितवनमा रहेको र भरतपुर पर्यटन वर्ष पनि भएकाले कृषि सम्मेलन महŒवपूर्ण भएको उहाँको भनाइ थियो । जिल्ला समन्वय समिति प्रमुख नारायणप्रसाद अधिकारीले कृषि पेशा घाटाको पेशा रहेको भन्दै विश्वको कृषि उत्पादनको औसत उत्पादन पनि नेपालले नभेटेको बताउनुभयो । नीति निर्माताहरूले कृषि क्षेत्रलाई उच्च प्राथमिकता दिए नेपालको कृषिले फड्को मार्न सक्ने उहाँको भनाइ थियो ।

सम्मेलनकी प्रमुख वक्ता डा. शोभा पौडेलले सम्मेलन कृषिलाई लक्षित गरेर गरिएको पहिलो सम्मेलन बताउँदै कृषिलाई नै केन्द्रित गरी कमै कार्यक्रम हुने गरेको बताउनुभयो । सम्मेलनको मुख्य नारा कृषिको रूपान्तरणकारी भविष्यः कृषिमा आधारित व्यवसायमा नवप्रवद्र्धन, दिगोपन र उद्यमशीलताको प्रवद्र्धन रहेको छ । आइतबारसम्म चल्ने सम्मेलनमा कृषि प्रदर्शनीसमेत गरिएको छ ।