काठमाडौं । एसिसी प्रिमियर कपअन्तर्गत तेस्रो स्थानका लागि भएको खेलमा नेपाल हङकङसँग चार विकेटले पराजित भएको छ । प्रतियोगितामा नेपालको यो लगातार दोस्रो हार हो । यसअघि नेपाल सेमिफाइनलमा युएईसँग पराजित भएको थियो । नेपालले प्रस्तुत गरेको १४० रनको लक्ष्य हङकङले अन्तिम ओभरमा ६ विकेटको क्षतिमा भेट्टायो । हङकङका लागि अन्सुमन राथले नटआउट रहँदै सर्वाधिक ६५ रन बनाउनुभयो ।
त्यस्तै, बाबर हायातले २६ तथा एजाज खानले १२ रन बनाउनुभयो । नेपालका लागि सोमपाल कामीले तीन तथा दीपेन्द्रसिंह ऐरीले दुई विकेट लिनुभयो ।
टस जितेर पहिले ब्याटिङ रोजेको नेपालले निर्धारित २० ओभरमा आठ विकेटको क्षतिमा १३९ रन बनाएको थियो । नेपालका लागि फेरि एकपटक दीपेन्द्रसिंह ऐरीले सर्वाधिक ४४ रन बनाउनुभयो । उहाँले यस क्रममा चार चौका र तीन छक्का हिर्काउनुभयो ।
नेपालले खेलमा खराब सुरुवात गरेको थियो । कुशल भुर्तेल फेरि एकपटक शून्य रनमा आउट हुनुभयो । तेस्रो ओभरमा सोमपाल कामी १६ रन बनाएर आउट हुनुभयो । लगत्तै पाँच रन बनाएर आशिफ शेख पनि पभेलियन फर्किनुभएको थियो ।
त्यसपछि कप्तान रोहित पौडेल र सन्दीप जोराले नेपालको इनिङ्स सम्हाल्ने प्रयास गर्नुभएको थियो । जोराले २३ बलमा २२ रन बनाउनुभयो भने कप्तान पौडेलले १९ बलमा २१ रन जोड्नुभयो ।
कुशल मल्ल १३ रन बनाएर आउट हुँदा अन्य ब्याट्सम्यानले दोहोरो अंकमा रन जोड्न सकेनन् । हङकङका आयुश शुक्लाले तीन तथा अतिक इक्वाल, यासिम मुर्तजा र इशान खानले एक-एक विकेट लिनुभएको थियो ।
योसँगै नेपालले आगामी नोभेम्बर र डिसेम्बरमा श्रीलंकामा हुने एसिसी इमर्जिङ टिम्स टी-२० एसिया कप पनि गुमाएको छ । हङकङसँगै फाइनलमा पुगेका युएई र ओमान उक्त प्रतियोगिताका लागि छनोट भएका छन् । भारत, पाकिस्तान, बंगलादेश, श्रीलंका र अफगानिस्तानको ‘ए’ टोलीसँग खेल्नेछन् ।
नेपालले पहिलो सेमिफाइनल खेलमा युएईसँग ६ विकेटले पराजित हुँदै एसिया कप खेल्ने अवसर गुमाएको थियो । हङकङ सेमिफाइनल खेलमा ओमानसँग पाँच विकेटले पराजित हुँदै बाहिरिएको थियो । नेपाल समूह ‘ए’ मा सबै चार खेलमा जितका साथ समूह विजेताका रूपमा सेमिफाइनल खेलेको थियो । हङकङले समूह ‘ए’ बाट नै दुई खेलमा जितका साथ नेटरनरेटमा कतारलाई पछि पारेर खेलेको थियो ।
एसिया कपमा पुग्न आइतबार फाइनलमा युएई र ओमानबीच प्रतिस्पर्धा हुनेछ । नेपालले भने अब घरेलु मैदानमा वेस्टइण्डिज ‘ए’सँग पाँच टी–२० खेल खेल्नेछ । पहिलो खेल अर्को शनिबार हुनेछ ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच