केपी ओली कप टी-२० क्रिकेट : गत वर्षको च्याम्पियन मधेसलाई हरायो कर्णालीले

पोखरा । पोखरामा जारी दोस्रो संस्करणको केपी ओली कप टी-२० राष्ट्रिय क्रिकेट प्रतियोगितामा डिफेन्डिङ च्याम्पियन मधेस प्रदेश कर्णालीसामु निरीह बनेको छ । मदन भण्डारी स्पोट्र्स एकेडेमीको आयोजनामा पोखरा रंगशाला क्रिकेट मैदानमा जारी प्रतियोगिताको समूह ‘सी’ तर्फको पहिलो खेलमा कर्णाली एकेडेमीले मधेस प्रदेश क्रिकेटलाई १५ रनले हराएको हो । प्रतिकूल मौसमका कारण ओभर घटाएर १७ मा झारिएको थियो ।

१४६ रनको विजयी लक्ष्य पछ्याएको मधेस प्रदेशले कुल १७ ओभरमा ६ विकेट गुमाउँदै १३० रनमा समेटियो । मधेसका लागि दिपेश दासले सर्वाधिक ४५ रनको योगदान दिए पनि जित दिलाउन भने सक्नुभएन । उहाँले ३६ बलमा तीन चौका र तीन छक्का प्रहार गर्नुभएको थियो । अभिषेक कार्की २२ रनमा अविजित रहनुभयो उहाँले १४ बलमा दुई चौका र एक छक्का प्रहार गर्नुभएको थियोे ।

विशाल पटेल पाँच रनमा अविजित रहँदा रूपेश सिंहले १७, हरिशंकर साह सात, विशाल शुस्लिङ १२, अरनिको यादव १४ रनमा आउट हुनुभएको थियो । ओपनर रोहन विक शून्यमै पेभेलियन फर्किनुभएको थियो । कर्णालीका लागि सुवास भण्डारी र दीपेन्द्र यादवले दुई-दुई, कृष्ण कार्कीले एक मेडनसहित एक र अरुण ऐरिले एक विकेट लिनुभयो ।

टस जितेर ब्याटिङ थालेको कर्णाली एकेडेमीले १७ ओभरमा १४५ रन बनाउँदै अलआउट हुनपुग्यो । कर्णालीका लागि हिमांशु शाहिले सर्वाधिक ३८ रनको योगदान दिनुभयो । उहाँले ३१ बलमा दुई चौका र तीन छक्का प्रहार गर्नुभएको थियो । यस्तै विपिन साहिले २४ रन जोडनुभयो । १६ बलमा उहाँले दुई चौका र एक छक्का प्रहार गर्नुभएको थियो । राजप्रसाद साहले १६, अरुण ऐरी १३, कृष्ण कार्की सात, रविन्द्रजंग शाही चार रनमा आउट हुनुभयो । सुवास भण्डारी दुई र ओपनर अदित्य विक्रम शाह शून्यमा आउट हुनुभएको थियो ।

मधेसका लागि रूपेश सिंहले चार ओभरमा २५ रन खर्चेर सर्वाधिक चार विकेट लिनुभएको थियो । अभिषेक कार्कीले तीन तथा विशाल पटेलले दुई विकेट लिनुभयो भने प्रदीप पासवानले चार ओभरमा एक मेडनसहित एक विकेट लिनुभएको थियो । खेलको प्लेयर अफ दि म्याच कर्णालीका हिमांशु शाह घोषित हुनुभयो ।

मौसमकै कारण शुक्रबारको दोस्रो खेल रोकिदा हिमाल फ्रेन्ड्स क्रिकेट क्लबले लुम्बिनी खुकुरी क्रिकेटलाई डकवर्थ–लुइस नियम (डीएल) मेथड अनुसार १३ रनले हराएको छ । वर्षाका कारण खेल हुन नसकेपछि डीएल मेथडबाट हिमाल फ्रेन्ड्सले जित हासिल गरेको हो ।

त्यसअघि टस जितेर ब्याटिङ थालेको हिमाल फ्रेन्ड्सले ११ ओभरमा पाँच विकेट गुमाउँदै १०६ रन बनाएको थियो । ओपनर सुवोध ऐरी ४० रन बनाउँदै आउट हुनुभयो । उहाँले २१ बलमा चार चौका र तीन छक्का प्रहार गर्नुभएको थियो । अभिनाष सिंह ५१ रनको अर्धशतकीय उत्कृष्ट पारी खेल्दै आउट हुनुभयो । उहाँले ३१ बलमा सात चौका, दुई छक्का प्रहार गर्नुभएको थियो । आयुव चन्द तीन, दीपक रोकाया तीन, सन्दीप भण्डारी पाँच रनमा आउट हुनुभयो भने सुनम बुढाथोकी एक रनमा नटआउट रहनुभयो । त्यसपछि वर्षाका कारण खेल रोकिएको थियो ।

उता लुम्बिनीका लागि रञ्जित चौधरी सार्वधिक ३६ रनको अविजित पारी खेल्नुभएको थियो । उहाँले २२ बलमा तीन चौका र दुई छक्का प्रहार गर्नुभएको थियो । सन्देश थापा १८, प्रज्वल थापा १०, ओपनर देव खनाल तीन, तुलबहादुर थापा एक मोहम्मद हुसेन चार र अभिषेस गौतम सात रनमा आउट हुनुभयो ।

अजयकुमार चौहान शून्यमा नटआउट रहनुभयो । यो खेलसमेत वर्षाका कारण रोकिन पुगेको थियो । हिमाल फ्रेन्ड्सका लागि सुशील रावल, मनसुन सिंह र अभिनाष बस्यालले समान दुई-दुई विकेट लिदा दीपक रोकायाले एक विकेट लिनुभएको थियो । प्रतियोगिताको आठौं दिन अकर्णाली र हिमाल फ्रेन्ड्सबीच पहिलो तथा मधेस र लुम्बिनीबीच दोस्रो खेल आयोजकले जनाएको छ ।