निर्माण व्यवसायीलाई भुक्तानी दिन नचाहेको भन्ने कुरा गलत : अर्थमन्त्री महत

काठमाडौं । अर्थमन्त्री डा. प्रकाशशरण महतले अर्थ मन्त्रालयले निर्माण व्यवसायीहरुलाई भुक्तानी दिन नचाहेको भन्ने कुरा गलत भएको बताउनुभएको छ ।

सोमवार आन्दोलनरत निर्माण व्यवसायीहरुसँग छलफल गर्दै अर्थमन्त्री महतले अर्थ मन्त्रालयले निर्माण व्यवसायीहरुले पाउनुपर्ने भुक्तानी नरोकेको बताउनुभएको हो । उहाँले सरकारले गत आर्थिक वर्षमा नै धेरै निर्माण व्यवसायीहरुले पाउनुपर्ने रकमको भुक्तानी गरेको भन्दै अर्थ मन्त्रालय र अर्थमन्त्रीले भुक्तानी दिन नचाहेको भन्ने कुरा गलत भएकोे बताउनु भयो।

अर्थमन्त्री महतले आर्थिक वर्ष २०८०÷०८१ को विनियोजित बजेटमार्फत पनि भुक्तानी गर्न नसक्ने भए सम्बन्धित मन्त्रालयले वितरण पेस गरे सबै भुक्तानी गर्ने बताउनु भयो । उहाँले सरकारले व्यवसायीहरुलाई गर्नुपर्ने भुक्तानीको दायित्व पूरा गर्न तयार रहेको बताउनु भयो । उहाँले सम्बन्धित मन्त्रालयले कुन आयोजनाको कति भुक्तानी बाँकी रहेको विवरण आय पेस गरेसँगै सबै भुक्तानी हुने बताउनु भयो ।

उहाँले सरकारले तिर्नुपर्ने दायित्व पूरा गर्छु भनेको कुरा समाचारहरुमा नआएर भुक्तानी गर्न सकिँदैन भनेको कुरा प्राथमिकतामा राखेर आएको बताउनु भयो। अर्थमन्त्री महतले निर्माण व्यवसायीहरुका भुक्तानी बाहेकका अन्य मागहरु जटिल रहेको भन्दै वार्ता कमिटिले व्यवसायीहरुसँग वार्ताको माध्यमबाट समाधान खोज्ने बताउनु भयो । उहाँले व्यवसायीहरुको अधिकांश रकम भुक्तानी भइसकेको भन्दै केही बाँकी रहेको भुक्तानी पनि चाँडै गर्ने बताउनु भयो।

उहाँले भन्नुभयो,‘राज्यको तर्फबाट गर्नसक्ने कुरा र निर्माण व्यवसायीलाई पनि यति भएपनि ठिकै हो भनेर जाऔं । धेरै विषय वस्तुलाई लम्ब्याएर काम छैन । निर्माण व्यवसायीहरुको आन्दोलनको विषयमा प्रधानमन्त्री तहमा छलफल गरेका छौं । व्यवसायीहरुले काम गरेको रकम अर्थमन्त्राले भुक्तानी नदिएको भन्दै बाहिर आइरहेको छ । आन्दोलनको क्रममा पनि यस्ता कुराहरु आएका छन् । २०७९÷०८० मा हेर्नुभयो भने पनि हुन्छ सरकारले कति रकम भुक्तानी भएको छ । कतिपय भुक्तानी गर्दा गर्दा समय सकिएको कारण इन्ट्रि नभएर समयमा नै सम्बन्धित मन्त्रालयले नल्याएको कारण भुक्तानी हुन सकिएको हो । आर्थिक वर्ष २०८०/०८१ को विनियोजित बजेटमार्फत पनि भुक्तानी गर्न नसक्ने भए सम्बन्धित मन्त्रालयले वितरण पेस गर्नुस् काम गरेको सबैले पाउनुपर्छ । सरकारले त्यसको दायित्व पूरा र रकम भुक्तानी गर्छौं भन्नेकुरा स्पष्ट पारेका छौं । सम्बन्धित मन्त्रालयले कुन आयोजनाको कति भुक्तानी बाँकी रहेको विवरण आएपछि सबै भुक्तानी हुन्छ । निर्माण व्यवसायीहरुले पाउनुपर्ने भुक्तानीको विषयमा स्पष्ट पार्न चाहन्छु । व्यवसायीहरु अर्थमन्त्रालय र अर्थमन्त्रीले भुक्तानी दिन चाहेको छैन भन्ने सन्देश गलत हो । यसअधि सरकारले तिर्नुपर्ने दायित्व पूरा गर्छु भनेको कुरा बाहिर नआएर भुक्तानी गर्न सकिँदैन भनेको कुरा प्राथमिकतामा राखियो । निर्माण व्यवसायीहरुका भुक्तानी बाहेकका अन्य मागहरु जटिल छन् । वार्ता गर्ने कमिटी छ । उहाँहरुले छलफल गर्नुहोला । बाँकी सम्भव हुने कुराहरु सम्बोधन हुन्छ । अर्थ मन्त्रालयले काम गरेको रकम पनि दिइरहेको छैन भन्नेकुरा होइन । अधिकांश रकम भुक्तानी भइसकेको छ । केही थोरै बाँकी छ । बाँकी पनि भुक्तानी हुन्छ ।’

अर्थमन्त्री महतले राज्यको तर्फबाट गर्नसक्ने माग सम्बोधन गर्ने भन्दै निर्माण व्यवसायीलाई आन्दोलन छोडेर वार्तामा आउन आग्रह गर्नुभयो । उहाँले विषय वस्तुलाई लम्ब्याएर भन्दै पनि वार्ता र छलफलको माध्यमबाट समाधान खोज्न आवश्यक रहेको बताउनु भयो । उहाँले निर्माण व्यवसायीहरुको आन्दोलनको विषयमा प्रधानमन्त्री तहमा समेत छलफल भएको बताउनु भयो ।