काठमाडौं । निबन्ध शिरोमणि शंकर लामिछानेको ४९औं स्मृति दिवसको अवसरमा विशेष कार्यक्रमको आयोजना गरी लामिछानेको योगदानको चर्चा गरिएको छ । निबन्धकार शंकर लामिछानेको नेपाली निबन्धमा विशिष्ट स्थान रहेको, उहाँको निबन्धहरूलाई अनुवाद गरेर विश्व साहित्यमा पुर्याउनुपर्ने धारणा कार्यक्रमका वक्ताहरूले राखेका थिए । वर्तमान नेपाली निबन्धमा लामिछानेको जस्तो लेखनको उचाइ नदेखिएकोमा चिन्ता पनि कार्यक्रममा व्यक्त गरिएको थियो ।
शंकर लामिछाने प्रतिष्ठानका अध्यक्ष राधेश्याम लेकालीको अध्यक्षतामा आयोजित कार्यक्रमका प्रमुख अतिथि वरिष्ठ कलाकार मदनदास श्रेष्ठले लामिछानेको योगदानको चर्चा गर्नुभएको थियो । कार्यक्रममा नेपाल स्रष्टा समाजका अध्यक्ष निबन्धकार श्रीओम श्रेष्ठ रोदनले शंकर लामिछानेबारे निबन्ध वाचन गर्नुभएको थियो ।
कार्यक्रममा प्रमुख वक्ताका रूपमा समालोचक प्रमोद प्रधानले लामिछानेका निबन्धमा पाइने दर्शन, विचार, संरचना, शैली र प्रयोग अद्वितीय भएको जिकिर गर्नुभयो । कार्यक्रममा पूर्वमन्त्री एवं निबन्धकार दिनानाथ शर्मा र युवराज नयाँघरेले लामिछानेका लेखनका विशेषताबारे चर्चा गर्नुभएको थियो ।
सभापतिको आसनबाट प्रतिष्ठानका अध्यक्ष लेकालीले संस्थाको गतिविधिबारे प्रकाश पार्दै शंकर लामिछाने ग्रन्थ प्रकाशनको काम अन्तिम चरणमा रहेको जानकारी गराउनुभयो । साथै लामिछानेको एब्स्ट्रयाक्ट चिन्तन प्याजको अंग्र्रेजी अनुवादका लागि प्रयास भइरहेको र नयाँ पुस्तामा उहाँलाई चिनाउन पनि कार्य भइरहेको सुनाउनुभयो ।
कार्यक्रममा साहित्यकारहरु मुरारि सिग्देल, मञ्जिला अनिल र डा.दामोदर पुडासैनीले लामिछानेका निबन्धहरूका अंश वाचन गर्नुभएको थियो । कार्यक्रममा फ्लोरिडा, अमेरिकाबाट आउनुभएका साहित्यकार सुन्दर जोशीलाई स्वागत सम्मान पनि गरिएको थियो । संस्थाकी कोषाध्यक्ष कथाकार पद्मावती सिंहले स्वागत गरेको उक्त कार्यक्रमको निबन्धकार श्रीबाबु कार्कीले सञ्चालन गर्नुभएको थियो ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच