काठमाडौं । नेपाली प्रतिभा प्रतिष्ठान, बेलायतले यस वर्षका लागि प्रसिद्ध साहित्य तथा संगीतसाधक गणेश रसिकलाई प्रतिभा सम्मान अर्पण गर्ने निर्णय गरेको छ । यसैगरी प्रतिभा पुरस्कार मुन्धुमी कवि, कथाकार तथा पत्रकार प्रदीप मेन्याङ्बोलाई अर्पण गर्ने निर्णय गरेको छ । हालै बेलायतमा बसेको संस्थाको बैठकले उक्त निर्णय गरेको हो ।
लगभग पाँच दशकअघि ‘लेकाली’ समूहबाट गायनमा उदाउनुभएका गीतकार, संगीतकार तथा गायक गणेश रसिकले नेपाली गीतसंगीतका साथै कथा, कविता, उपन्यास, संस्मरण र निबन्ध विधाका दर्जनभन्दा बढी कृति प्रकाशित गरी नेपाली साहित्यको श्रीवृद्धिमा दिएको अतुलनीय योगदानको कदर गर्दै प्रतिभा सम्मान अर्पण गर्ने निर्णय गरिएको प्रतिष्ठानका नवनिर्वाचित अध्यक्ष टंक वनेमले जानकारी गराउनुभयो ।
रसिकका ‘क्षितिजलाई छुन खोज्दा’ (कथासंग्रह, २०२४), ‘एउटा सारंगी छुन खोज्दा’ (कथासंग्रह, २०२७), ‘रसिकका गीतहरू’ (गीतसंग्रह, २०४५), ‘आकाशगंगाको ओतमुनि’ (उपन्यास, २०४८), ‘जब सिस्नुहरू टेक्दै हिँडे’ (संस्मरण, २०५५), ‘बिलाउँदै गएका गीत’ (कथासंग्र्रह, २०५८), ‘दशगजामा उभिएर हेर्दा’ (उपन्यास, २०६३), ‘स्वाधिनताको पीडा’ (गीतसंग्रह, २०६८), ‘पेरुंगो संस्करण’ (पाँच कृति, २०७३) लगायत ‘मेरो अतीत’ (अडियो क्यासेट), ‘अन्तराल’ (अडियो क्यासेट भाग १ र २), ‘ओ ! शून्यता’ (सी.डी.)लगायत प्रकाशित छन् ।
यसैगरी लामो समयदेखि पत्रकारितामा संलग्न रहँदै आउनुभएका मेन्याङ्बोको ‘पुरुषगन्ध’ (कथाकृति, २०६०) प्रकाशित छ भने फुटकर रूपमा उहाँका विभिन्न पत्रपत्रिकामा मुन्धुमी कविताहरू प्रकाशित छन् । हाल उहाँ मुन्धुमी ज्ञानको खोज–अन्वेषण कार्यमा संलग्न हुनुहुन्छ । सम्मान तथा पुरस्कारको राशि नगद एक लाख रुपैयाँ छ । प्रतिष्ठानका महासचिव चोक गुरुङका अनुसार सम्मान तथा पुरस्कार चैत महिनाको अन्तिम साता काठमाडौंमा एक समारोहको आयोजना गरी अर्पण गर्नेे कार्यक्रम छ ।
सन् २००८ मा बेलायतमा स्थापित यस प्रतिष्ठानबाट हालसम्म ईश्वर मानन्धर, अम्बर गुरुङ, जीवी लुगुन, भक्तराज आचार्य, प्रा.डा.गोविन्दराज भट्टराई, बुँद राना, टेकवीर मुखिया, प्रद्युम्न श्रेष्ठ (सिक्किम), भागीरथी श्रेष्ठ, वेणु आचार्य, दावा ग्याल्मो (दार्जिलिङ), गोपाल पराजुली, डा.राजेन्द्र विमल, डा.कृष्णहरि बराल र दीप श्रेष्ठ सम्मानित भइसक्नुभएको छ भने गतवर्ष वरिष्ठ कवि बैरागी काइँलालाई धरानमा बृहत् नागरिक अभिनन्दन गरिएको थियो ।
यसैगरी प्रतिभा पुरस्कारबाट नवीन विभास, कुवेर राई, उपेन्द्र सुब्बा, श्रवण मुकारुङ, मोमिला जोशी, राजकुमार दिक्पाल, भूपाल राई, बिबी अनुरागी, टीका चाम्लिङ, फूलमान वल, बलराम अधिकारी, शुभ मुकारूङ, विमला तुम्खेवा, गणेश गुरुङ र सुदीप पाख्रिन पुरस्कृत भइसक्नुभएको छ ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच