काठमाडौं । सेब र हिमरश्मीले सातौँ ओप्स खेलकुद महोत्सवअन्तर्गत बास्केटबल प्रतियोगिताको उपाधि जितेका छन् । सेब ब्वाइज तथा हिमरश्मी गल्र्समा च्याम्पियन बने । डाँडागाउँस्थित हिमरश्मीको कोर्टमा भएको ब्वाइज फाइनलमा सेबले एञ्जल्स हार्टलाई ४७-२३ ले पराजित गर्यो । सेबको जितमा विप्लव गुरुङले १८ अंकको योगदान गर्नुभयो ।
अर्गनाइजेसन अफ प्राइभेट स्कुल (ओप्स) द्वारा आयोजित प्रतियोगिताको गल्र्सको रोमाञ्चक उपाधि भिडन्तमा खुसी अधिकारीको ६ अंकको सहयोगमा हिमरश्मीले फेरिल्याण्डलाई १४-१० ले हरायो । हिमरश्मीले ८-० ले पछि परेको स्थितिलाई उल्ट्याउँदै उपाधि जित्न सफल भएको हो । चौथो क्वाटरको कुनै समय खेल १०-१० को बराबरी स्थितिमा थियो । त्यसबेला सिर्जना तामाङले २ स्कोर गर्दै हिमरश्मीलाई १२-१० ले अग्रता दिलाउनुभयो । सिर्जनापछि निमा तामाङले दुई अंक जोड्दै हिमरश्मीका लागि उपाधि सुनिश्चित गर्नुभयो । ब्वाइजमा १३ तथा गल्र्समा नौ टिम सहभागी थिए ।
हिमरश्मीले सातौँ ओप्स खेलकुद महोत्सवअन्तर्गत ब्याडमिन्टनको स्वर्णमा क्लिन स्विप गरेको छ । तीन स्पर्धा समावेश ब्याडमिन्टनमा हिमरश्मीले तीनै स्वर्णमाथि कब्जा जमायो । मनमैजुस्थित जी-४ स्पोर्ट्स एकेडेमीमा भएको ब्वाइज सिंगल्स फाइनलमा सिद्धान्तराज लम्सालले कौशलका गगन घलेलाई २१-१३ र २१-१४ को सोझो सेटमा पराजित गर्नुभयो । विभूतिका संविधान चौधरी र सिर्जना ज्ञान सागरका कल्याण तामाङ तेस्रो हुनुभयो ।
गल्र्स सिंगल्सको फाइनलमा उपासना बोहराले ज्ञान मन्दिरकी विविशा शाह ठकुरीलाई सिधा सेटमा २१-१ र २१-४ ले सहजै हराउनुभयो । कौशलकी सृष्टि बुढाथोकी र पुष्पकुञ्जकी मनिका गुरुङ तेस्रो बन्नुभयो । मिक्स डबल्समा कुशल गौतम र प्रतीक्षा गौतमको जोडी विजेता बन्नुभयो । उक्त जोडीले फाइनलमा न्युटनका विवेक भण्डारी र फुरा मिङ्मा शेर्पाको जोडीमाथि २१-१२ र २१-१५ को जित दर्ता गर्नुभयो । कौशलका विपुल थापा र युनिशा मल्ल तथा ज्ञान मन्दिरका आयुब मोक्तान र तनुश्री ओलीको जोडी तेस्रो स्थानमा रहनुभयो । विभिन्न नौ विद्यालयका ३६ खेलाडी सहभागी भए ।
सिर्जना ज्ञान सागरले सातौँ ओप्स खेलकुद महोत्सवअन्तर्गत टेबलटेनिस प्रतियोगितामा समावेश तीनै स्पर्धाको स्वर्ण जितेको छ । शेषमति सानो पुलस्थित सिर्जना ज्ञान सागरमा भएको प्रतियोगिताको ब्वाइज सिंगल्स फाइनलमा सन्तोष थापाले प्रगतिका उदिप तामाङलाई ११-६, ११-६ र ११-१ को सोझो सेटमा पराजित गर्नुभयो । कौशलका निशान बुढाथोकी र सेबका रोशन पौडेल तेस्रो हुनुभयो । गल्र्स सिंगल्सको फाइनलमा विपिना थापाले हिमरश्मीकी अञ्जली गुरुङलाई सिधा सेटमा ११-३, ११-४ र ११-५ ले हराउनुभयो । सेबकी रचेल थापा मगर र प्रगतिकी गंगा मगर तेस्रो बन्नुभयो ।
मिक्स डबल्समा सुप्रिया बोगटी र आकाश सिलवालको जोडी पहिलो, प्रगतिका युजिना गुरुङ र सुप्रिम सिलवालको जोडी दोस्रो तथा कौशलका तारा तामाङ र अतीत श्रेष्ठ/हिमरश्मीका अञ्जली बानियाँ र आदर्श थिङको जोडी तेस्रो हुनुभयो । सिर्जना ज्ञान सागरका प्रिन्सिपल राजेन्द्रप्रसाद फुयाँलका अनुसार टेबलटेनिसमा १३ विद्यालयका ४२ खेलाडीले प्रतिस्पर्धा गरेका थिए ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच