साफ महिला च्याम्पियनसिप : भुटानसँग बराबरीमा रोकियो नेपाल

काठमाडौं । साफ महिला फुटबल च्याम्पियनसिपको आफ्नो पहिलो खेलमा घरेलु टोली नेपाल भुटानसँग गोलरहित बराबरीमा रोकिएको छ । दशरथ रंगशालामा शुक्रबार साँझ भएको खेलमा नेपाली टोलीले थुप्रै अवसर सिर्जना गरे पनि सदुपयोग गर्न नसक्दा भुटनसँग बराबरीमा रोकिएको हो ।

घरेलु मैदानमा जारी साफ महिला च्याम्पियनसिपअन्तर्गत समूह ‘बी’ को दोस्रो खेलमा नेपाल भुटानसँग गोलरहित बराबरीमा रोकिन पुगेको हो । अघिल्ला संस्करणमा भुटानमाथि हावी हुँदै आएको नेपाल शुक्रबारको खेलमा भने गोलका लागि निकै संर्घष गरेपनि सफलता पाउन सकेन ।

नेपाललाई बराबरीमा रोकेको भुटानले घरेलु टोलीसँग अंक खोस्न सफल भएको छ । बराबरीसँगै नेपाल र भुटानले समान एक-एक अंक बाँडेका छन् । साफ च्याम्पियनसिपमा नेपाल पहिलो पटक भुटानसँग गोलरहित बराबरीमा रोकिएको हो । साफ वुमन्स च्याम्पियनसिप इतिहासमा नेपाल पहिलो पटक भुटानलाई हराउन असफल रहृयो । साफमा कुनै पनि टिमसँग नेपालको यो पहिलो बराबरी हो ।

सन् २०१४ बाट भुटान र नेपाल एकै समूहमा पर्दै आएका छन् । पछिल्लो पटक घरेलु मैदानमा नै भएको भेटमा नेपालले भुटानमाथि चार-शून्यको फराकिलो जित दर्ता गरेको थियो । यस्तै २०१९ मा नेपालले भुटानमाथि तीन-शून्यको जित निकालेको थियो भने सन् २०१६ र २०१४ मा नेपालले आठ-शून्यको फराकिलो जित निकालेको थियो ।

शुक्रबारको खेलमा नेपालले सुरुवातदेखि नै भुटानलाई दबाबमा राखे पनि फिनिसिङ लाइन भने कमजोर देखियो । नेपालले दोस्रो खेलमा सोमबार माल्दिभ्ससँग खेल्नेछ ।

माल्दिभ्समाथि श्रीलंकाको साँघुरो जित
श्रीलंकाले शुक्रबार माल्दिभ्समाथि साँघुरो जित निकाल्दै साफ महिला च्याम्पियनसिपमा सुखद् सुरुवात गरेको छ । त्रिपुरेश्वरस्थित दशरथ रंगशालामा भएको समूह ‘बी’ को खेलमा श्रीलंकाले माल्दिभ्समाथि एक-शून्यको जित निकालेको हो । एकपक्षीय बनेको श्रीलंकाले लगातार दबाब बनाएको थियो । पछिल्ला दुई संस्करणमा गोलविहीन माल्दिभ्सले श्रीलंकाविरूद्ध गोल गर्ने लक्ष्यमा थियो । साफका पछिल्ला पाँच खेलमा गोलविहीन माल्दिभ्सले सातौं संस्करणको आफ्नो पहिलो खेलमा पनि असफल भयो । यससँगै माल्दिभ्स साफमा गोलविहीन भएको छैटौं खेल भएको छ ।

खेलको आठौं मिनेटमा श्रीलंकाको गोल प्रयासमा बार बाधक भयो । सिभानेश्वरन थर्मिकाले माल्दिभ्सकी गोलकिपर अमिना लिजा अगाडि बढेको अवस्थामा खाली पोष्टमा गरेको प्रहार दोस्रो बारमा लागेर फर्कियो । अमिनाले नै क्लियर गर्न नसकेको नियन्त्रणमा लिँदै थर्मिकाले गरेको प्रहार सफल हुन सकेन ।

एकपछि अर्को आक्रमण बुनेको श्रीलंकाले १८औं मिनेटमा अग्रता लियो । कोश्वाथ थागेले दिएको क्रस बललाई इमिसा अनुराधिनीले हेडरमार्फत गोल गर्नुभयो । सन् २०१९ मा विरानटनगरमा भएको साफपछि श्रीलंकाले पहिलो गोल गर्‍यो । काठमाडौंमा सम्पन्न पहिल्लो छैटौं संस्करणमा श्रीलंका गोलविहीन भएर घर फर्किएको थियो ।

३३औं मिनेटमा श्रीलंकाको काउन्टर प्रयासमा माल्दिभ्सकी गोलकिपर अमिनाले उत्कृष्ट बचाउ गर्नुभयो । श्रीलंकाकी इमिसाको लगातार दुई प्रहार असफल बनाएकी हुन् । ३६औं मिनेटमा थर्मिकाले पेनाल्टी बक्स बाहिरबाट गरेको सशक्त प्रहार पनि माल्दिभ्सकी गोलकिपर अमिनाले पञ्च गर्दै बचाउनुभयो । त्यसपछि पहिलो हाफमा केही प्रयास भएपनि गोल सम्भव भएन र श्रीलंकाले १-० को अग्रता बनायो । दोस्रो हाफ पनि श्रीलंकाले गोल प्रयास गरिरहृयो । ८७औं मिनेटमा इमिसाले करिब आठ यार्डबाट गरेको प्रहार माल्दिभ्सकी गोलकिपर अमिनाले पञ्च गर्दै बचाउ गर्नुभयो । यो जितसँगै चार राष्ट्र रहेको समूहमा श्रीलंकाले तीन अंक बटुल्यो ।