खोज तथा उद्धार टोली पठाउन नेपाल सरकारसँग अनुमति माग

काठमाडौं । छिमेकी भारत र चीनले नेपालको भूकम्प प्रभावित क्षेत्रमा खोज तथा उद्धार टोली पठाउन नेपाल सरकारसँग अनुमति मागेका छन् । भारत र चीनले अनुमति मागे पनि नेपाल सरकारले भने तत्काल खोज तथा उद्धार टोली आवश्यक नभएको जवाफ दिएको छ । ‘भारत र चीन दुवैले खोज तथा उद्धारका लागि तत्काल टोली पठाउन तयार छौँ, यसका लागि टोली तयारी अवस्थामा छ भनी अनुमति मागेका थिए’, उपप्रधान तथा गृहमन्त्री नारायणकाजी श्रेष्ठले भन्नुभयो, ‘हामीले दुवै देशलाई धन्यवाद दिँदै, अहिले खोज तथा उद्धार टोली आवश्यक नरहेको जानकारी दिएका छौँ ।’ नेपालमा भूकम्पले पु¥याएको क्षतिप्रति अन्तर्राष्ट्रिय विभिन्न संघ संस्था र व्यक्तित्वहरूले दुःख व्यक्त गर्दै आवश्यक सहयोगका लागि तयार भएको बताएका छन् ।

नेपाललाई आवश्यक पर्ने सबै सहयोग गर्न भारत तयार : प्रधानमन्त्री मोदी
भारतीय प्रधानमन्त्री नरेन्द्र मोदीले नेपालमा भूकम्पले पुर्‍याएको क्षतिप्रति दुःख व्यक्त गर्दै आवश्यक सहयोग गर्न तयार रहेको बताउनुभएको छ । उहाँले सामाजिक सञ्जाल ट्वीटरमार्फत नेपालमा गएको भूकम्पबाट भएको जनधनको क्षतिप्रति गहिरो दुःख व्यक्त गर्नुभएको छ । उहाँले नेपाललाई परिररहेको दुःखको यस घडीमा भारत नेपाली जनताको साथमा रहेको उल्लेख गर्दै सम्भव भएका सबै सहयोग गर्न तयार रहेकोसमेत प्रतिबद्धता जनाउनुभएको छ ।

यस्तै, सिक्किमका पूर्वमुख्यमन्त्री पवन चाम्लिङले नेपालमा गएको भूकम्पप्रति गहिरो चिन्ता प्रकट गर्नुभएको छ । भारतीय हिमालयन क्षेत्र भूकम्पीय क्षेत्र आइभी र भी मा पर्ने, जसले यस क्षेत्रलाई भूकम्पको उच्च जोखिममा रहँदै आएको उहाँको भनाइ छ । ‘भूकम्पको यो प्राकृतिक घटनालाई हामीले हाम्रा विपद् योजनाहरूमा ध्यान दिनुपर्ने कुरा हो । म प्रभावितहरूप्रति मेरो ऐक्यबद्धता व्यक्त गर्दछु र सरकारले जनतालाई छिट्टै राहत प्रदान गर्न सक्षम हुनेछ भन्ने आशा गर्दछु,’ उहाँले सामाजिक सञ्जालमा लेख्नुभएको छ ।

नेपाललाई आवश्यक सहयोग गर्न अमेरिका तत्पर छ : अमेरिकी दूतावास
नेपालस्थित अमेरिकी दूतावासले जाजरकोट भूकम्पप्रति दुःख व्यक्त गर्दै आवश्यक सहयोग गर्ने जनाएको छ । शुक्रबार राति गएको भूकम्पमा जनधनको क्षतिपछि सामाजिक सञ्जालमा लेख्दै अमेरिकी दूतावासले ज्यान गुमाएकाप्रति दुःख व्यक्त गर्दै प्रभावित प्रभावितलाई सहयोग गर्न तत्पर रहेको भनेको छ । नेपालले भोग्नुपरेको यो भयानक घटनामा आफूहरू तत्पर रहेको दूतावासको भनाइ छ । सहयोग चाहिने कोही अमेरिकी नागरिक भए सम्पर्कमा आउन पनि दूतावासले भनेको छ ।

एनआरएनएद्वारा दुःख व्यक्त, २१ लाख राहत कोषमा जम्मा गर्ने
गैरआवासीय नेपाली संघ (एनआरएनए)ले पश्चिम नेपालमा भूकम्पबाट भएको क्षतिप्रति दुःख व्यक्त गरेको छ । एनआरएनएका अध्यक्ष आरके शर्मा र महासचिव बुद्धिसागर सुवेदीले शनिबार एक विज्ञप्ति जारी गर्दै भूकम्पपछि भएको जनधनको क्षतिप्रति दुःख व्यक्त गरेका छन् । सरकारले सुरु गरेको राहत कोषमा एनआरएनए अभियन्ताबाट संकलन गरेर २१ लाख रुपैयाँ जम्मा गरिने पनि अध्यक्ष शर्माले जानकारी दिनुभयो । ‘एनआरएनको आपत्कालीन कोष भए पनि हामीले उक्त कोषबाट एक पैसा पनि नचलाई सबै अभियान्ताबाट संकलन गरेर यो रकम जम्मा गर्नेछौँ’, उहाँले भन्नुभएको छ । थप राहत तथा उद्धारका निम्ति एनआरएनए तयार रहेको अध्यक्ष शर्माले उल्लेख गर्नुभएको छ । घटनास्थलमै पुगेर एनआरएनएले उद्धारमा सहभागिता जनाउने उहाँको भनाइ छ ।