इच्छाराजको सम्पत्ति जफत हुँदा १५ सय पीडितले न्याय पाउने

काठमाडौं । विशेष अदालतले आइतबार सम्पत्ति शुद्धीकरणसम्बन्धी मुद्दामा सिभिल सहकारीको बचत रकम अपचलन गरेका इच्छाराज तामाङलगायत आरोपितहरूको सम्पत्ति जफत गर्ने निर्णय गर्‍यो । अदालतको यस फैसलाबमोजिम उनीहरूको सम्पत्ति जफत भएमा त्यो सम्पत्ति १५ सयभन्दा बढी सहकारीपीडित बचतकर्ताको रकम फिर्ता हुनेछ । बचतकर्ताहरूको रकम सिभिल सहकारी तथा इच्छाराज तामाङ समूहहरूले ठगी गरेको आरोपमा जिल्ला अदालतमा मुद्दा विचाराधीन छ । सो मुद्दामा पीडितलाई बचत रकम फिर्ता गर्नुपर्ने फैसला भएमा इच्छाराज लगायतको जफत सम्पत्ति त्यसमा प्रयोग हुने हुनेछ ।

विशेष अदालतको फैसलाअनुसार तामाङ परिवारको गैरकानुनी ठहरिएको सम्पत्ति जफत हुनेछ । जसअनुसार, इच्छाराज तामाङको एक अर्ब ७२ करोड ४४ लाख ५९० रुपैयाँ जफत हुनेछ । तामाङकी श्रीमती सृजना शाक्यको एक अर्ब तीन करोड ५४ लाख ४३ हजार ४७८ रुपैयाँ बराबरको सम्पत्ति जफत हुने भनिएको छ । साथै, उनीहरूबाट यही बिगो बराबरको जरिवाना पनि असुल गर्नुपर्ने अदालतको ठहर छ । उनीहरू दुवै जनालाई कैद सजाय पनि तोकिएको छ । इच्छाराज तीन वर्ष र सृजना डेढ वर्ष कैद बस्नुपर्ने फैसला अदालतले गरेको छ । यस्तै, तामाङ दम्पतीकै दुई छोरीहरू प्रतीक्षा र प्रतिष्ठाका नाममा रहेको सम्पत्ति पनि जफत हुने विशेषको फैसला छ ।

सम्पत्ति शुद्धीकरण अनुसन्धान विभागले प्रतीक्षाका नाममा घरजग्गा र विभिन्न कम्पनीको सेयरसमेत गरी ६ करोड ४७ लाख ४६ हजार रुपैयाँ बराबरको सम्पत्ति रहेको दाबी गरेको थियो । त्यस्तै, प्रतिष्ठाका नाममा एक करोड ८९ लाख १८ हजार रुपैयाँ बराबरको सम्पत्ति विभागको तत्कालीन मूल्यांकनले देखाएको थियो । तर, छोरीहरूको जफत हुने बिगो बुवा इच्छाराजकै बिगोभित्र गाभिएकाले फैसलामा बेग्लै अंक नदेखिएको अदालतले जनाएको छ । छोरीहरूलाई जरिवाना पनि गरिएको छैन । यस हिसाबले हेर्दा बिगो र जरिवाना गरी पाँच अर्ब ५२ करोड रुपैयाँ तामाङ परिवारले बुझाउनुपर्ने भएको छ । यही मुद्दामा इच्छाराजकै आफन्त पर्ने केशवलाल श्रेष्ठबाट २५ करोड ६५ लाख ८६ हजार रुपैयाँ बराबरको सम्पत्ति जफत हुनेछ भने यति नै जरिवाना पनि तिर्नुपर्ने छ । उनलाई पनि डेढ वर्ष कैद हुनेछ । उनकी श्रीमती मीनाकुमारी श्रेष्ठले भने सफाइ पाइन ।

के छ ठगी मुद्दामा ?
इच्छाराज तामाङसहित ४२ जनाविरुद्ध काठमाडौं जिल्ला अदालतमा ठगी मुद्दा विचाराधीन छ । सिभिल सहकारीका बचतकर्ताको अर्बौं रुपैैयाँ घोटालाको अभियोगमा तानिएका तत्कालीन र वर्तमान सञ्चालक तथा कर्मचारीविरुद्ध ठगी मुद्दा चलाइएको थियो । सहकारीको सम्पत्ति अपचलन गरी अन्यत्रै लगानी गरिएको कसुरमा जिल्ला सरकारी वकिलको कार्यालय, काठमाडौंले सम्पत्ति शुद्धीकरणमा समेत अनुसन्धान गर्न सम्पत्ति शुद्धीकरण अनुसन्धान विभागलाई पत्राचार गरेको थियो । विभागले २०७९ भदौमा तामाङविरुद्ध तीन अर्ब ३१ करोड ८५ लाख र उनकी श्रीमती सृजनाविरुद्ध एक अर्ब तीन करोड बढी बिगो मागदाबीसहित मुद्दा दायर गरेको थियो । अदालतले जरिवाना असुलका लागि दोषी ठहरिएका व्यक्ति तथा मीना श्रेष्ठ, प्रतिष्ठा तामाङ र प्रतीक्षा तामाङका नाममा रहेको सम्पत्तिसमेत जफत गर्ने फैसला गरेको छ । दोषी ठहर भएका व्यक्तिविरुद्ध काठमाडौं जिल्ला अदालतमा विचाराधीन ठगी मुद्दामा प्रतिवादीउपर कसुर ठहर भएमा पीडितको बिगो भरिभराउ गर्ने कार्यले नै प्राथमिकता पाउने आदेश पनि गरेको छ ।

प्रहरीको केन्द्रीय अनुसन्धान ब्युरोले सिभिल सहकारीको ठगीको अनुसन्धान गरेको थियो । त्यसकै आधारमा सरकारी वकिल कार्यालयले ठगी र संगठित अपराधमा दफा लगाएर अदालतमा मुद्दा दायर गरेको थियो । पाँच अर्ब ७७ करोड ८० लाख ९० हजार रुपैयाँ बिगोसहित २०७८ मंसिरमा मुद्दा दायर गरेको थियो । तामाङले २०५५ मा सिभिल सहकारी खोलेर अध्यक्ष बनेका थिए । त्यही बीचमा उनले सिभिल गु्रपमार्फत हाउजिङ र जग्गा कारोबारमा हात हालेका थिए । उनले आफ्नै सहकारीमार्फत ऋण लिएका थिए । धितो राखेकै जग्गामा कानुनविपरीत घर बनाएर बेचेको आरोप पनि उनीमाथि छ । सिभिल सहकारीबाटै ऋण लिएर सिभिल होम्सअन्तर्गत करिब एक हजार एक सय घर बनाएर बेचेको तर सहकारीको ऋण तिर्न नमानेको आरोप छ । २०६७ मा सिभिल बैंक स्थापना भएपछि उनी त्यसको अध्यक्ष बनेका थिए ।