काठमाडौं । सत्ता समीकरण फेरबदल भएको एक महिना पनि नबित्दै फेरि अर्को उथलपुथलको चर्चा सुरु भएको छ । नयाँ गठबन्धन बनेको एक महिना नपुग्दै फेरि समीकरण फेरबदलको विषयमा चर्चा हुन थालको हो । गत फागुन २१ गते नेपाली कांग्रेससहितको गठबन्धन टुटेर एमालेसहित नयाँ गठबन्धन बनेको थियो । प्रधानमन्त्री तथा माओवादी केन्द्रका अध्यक्ष पुष्पकमल दाहाल ‘प्रचण्ड’ र कांग्रेस सभापति शेरबहादुर देउवाको तारन्तारको भेटले फेरि नयाँ समीकरण बन्ने चर्चालाई बल पुर्याएको छ । सभापति देउवाले एक सातामा प्रचण्डसँग दुईपटक भेटवार्ता गर्नुभएको छ । भेटमा समसामयिक विषयमा कुराकानी भएको सार्वजनिक भए पनि त्यसपछि आएको प्रधानमन्त्री प्रचण्डको अभिव्यक्तिलाई अर्थपूर्ण रूपमा हेरिएको छ ।
प्रधानमन्त्री प्रचण्डले नयाँ गठबन्धन बनाएको महिना दिन नबित्दै बिहीबार ‘फेरि उथलपुथल गर्न बेर नलाग्ने’ बताउनुभएको थियो । सोचेजस्तो काम हुन नसके फेरि पनि उथलपुथल गर्न बेर नलाग्ने उहाँको भनाइ थियो । यसअघि कांग्रेससँगको गठबन्धनमा काम गर्न सहज नभएको भन्दै गठबन्धन तोड्नुपरेको उहाँको जिकिर थियो । कांग्रेससँगको गठबन्धन तोडेर नयाँ बनाउँदा पनि उहाँले ‘आफू बाँचुञ्जेल देशमा उथलपुथल भइरहने’ बताउनुभएको थियो । कांग्रेस सभापति देउवालाई भेटेकै दिन प्रचण्डले फेरि उथलपुथल हुन बेर नलाग्ने बताउनुभएको हो ।
कांग्रेसका नेताहरूले अहिलेको गठबन्धन धेरै समय नटिक्ने दाबी गर्दै आएका छन् । त्यसले पनि यो भेटघाटमा राजनीतिक विषयमा समेत कुरा भएको हुनसक्ने बुझाइ नेताहरूको छ । यति मात्रै होइन कांग्रेस महामन्त्री गगनकुमार थापाले पनि फेरि समीकरण फेरबदल हुनसक्ने संकेत गर्नुभएको छ । शुक्रबार एक सार्वजनिक कार्यक्रममै उहाँले कांग्रेस फेरि चाँडै सरकारमा पुग्नसक्ने बताउनुभएको हो । प्रचण्डले फेरि उथलपुथल हुनसक्ने बताइरहेको बेला आएको गगनको यो अभिव्यक्तिलाई पनि अर्थपूर्ण रूपमा हेरिएको छ ।
सत्ता गठबन्धनमा खटपटको संकेत
नयाँ सत्ता गठबन्धनमा रहेका दलहरूबीच एक महिना नपुग्दै खटपटको संकेत देखिएको छ । इलाम-२ र बझाङ प्रदेश सभामा हुने उपनिर्वाचनलाई लिएर पनि दलहरूमा एकमत छैन । गठबन्धनमा रहेका दलहरू हालसम्म एक्लाएक्लै चुनाव लड्ने मुडमा देखिएका छन् । गठबन्धनमा रहेको राष्ट्रिय स्वतन्त्र पार्टी (रास्वपा)को एक्लै चुनाव लड्ने योजनालाई स्वाभाविक रूपमा लिइए पनि माओवादी केन्द्र र नेकपा (एकीकृत समाजवादी)को समेत उपचुनावमा एक्लै भिड्ने तयारीलाई गठबन्धनमा खटपटको संकेतका रूपमा हेरिएको छ । इलाममा माओवादी र एकीकृत समाजवादीले पनि आफ्नो उम्मेदवार उठाउने निर्णय गरेका छन् । एकीकृत समाजवादीले उम्मेदवारसमेत तय गरिसकेको छ । माओवादीको भने बाँकी छ । गठबन्धनमै रहेको एमालेले यसअघि नै उम्मेदवार तय गरेको थियो ।
उपनिर्वाचनमा मात्रै होइन दलहरूबीच प्रदेश सरकारको भागबण्डामा समेत कुरा मिलेको छैन । सत्ता समीकरण बदलिएको एक महिना पुग्न लाग्दासमेत प्रदेश सरकारको भागबण्डामा गठबन्धन दलहरूबीच सहमति जुटेको छैन । सत्ता घटक एमाले, माओवादी र एकीकृत समाजवादीका आ-आफ्ना अडानले सहमति जुट्न नसकेको हो । उनीहरूबीच पटक-पटक छलफल भए पनि सहमति हुन सकेको छैन ।
कर्णाली प्रदेशमा एमाले र माओवादी दुवैले दाबी गरिरहेका छन् । प्रतिनिधि सभामा १० सिट रहेको एकीकृत समाजवादीले मधेश र बागमतीमध्ये एउटा प्रदेशमा नेतृत्वको दाबी गरेको छ । यस्तै, सुदूरपश्चिममा सरकार बनाउन निर्णायक शक्ति रहेको नाउपाले पनि मुख्यमन्त्री दाबी गरेको छ । लामो समयसम्म प्रदेश सरकारको भागबण्डा नमिल्नुले पनि गठबन्धनमा खटपटको संकेतलाई थप बल पुर्याउँछ ।
केही समयपछि कांग्रेस फेरि सरकारमा आउँछ : महामन्त्री थापा
नेपाली कांग्रेसका महामन्त्री गगन थापाले कांग्रेस पुनः सरकारमा पुग्ने दाबी गर्नुभएको छ । शुक्रबार संवाद यात्राका क्रममा कपिलवस्तुमा आयोजित कार्यक्रममा थापाले पार्टी फेरि सरकारमा पुग्ने दाबी गर्नुभएको हो । ‘भर्खर त गएको हो । एकडेढ हप्ता भयो,’ उहाँले भन्नुभयो, ‘फेरि आइहाल्छ । धेरै पनि छैन । केही समयपछि फेरि आउँछ । सरकारले त कांग्रेसलाई पछ्याइहाल्छ ।’
देशलाई सम्हालेर निराशाबाट बाहिर निकाल्न सक्ने कांग्रेस मात्रै भएको उहाँले बताउनुभयो । एमाले, माओवादी, नयाँ दलसँग निराशाबाट देशलाई बाहिर निकाल्ने चरित्र नभएको महामन्त्री थापाले बताउनुभयो । ‘नेकपा एमालेसँग आन्दोलन गर्ने क्षमता छ । मधेसी पार्टीहरूसँग नागरिकलाई उद्वेलित बनाउने क्षमता छ । नयाँ पार्टीसँग हल्ला गर्ने क्षमता होला,’ थापाले भन्नुभयो, ‘तर, मुलुकलाई निराशाबाट बाहिर निकाल्ने क्षमता र चरित्र भएको पार्टी कांग्रेस नै हो ।’
‘म एकातिर र प्रकाशशरणजी अर्कोतिर दौडिँदा तालमेल मिलेन’
प्रधानमन्त्री प्रचण्डले यसअघिको सरकारमा अर्थमन्त्रीसँग तालमेल नमिल्दा देशको अर्थतन्त्रले सही दिशा समात्न नसकेको बताउनुभएको छ । निर्माण व्यवसायी महासंघको २५औँ साधारणसभालाई हेटौँडामा उद्घाटन गर्दै प्रधानमन्त्री प्रचण्डले सरकारले एउटा बाटो लिएको अवस्थामा तत्कालीन अर्थमन्त्री प्रकाशशरण महतले सहयोग नगरेको बताउनुभयो । आफू देशमा अर्थतन्त्र खस्किएको अवस्थामा नेतृत्वमा आएको तर आफ्नो अर्थतन्त्रलाई दबाबमुक्त बनाउन आफू र तत्कालीन अर्थमन्त्रीको ट्युनिङ नमिलेको कारण अप्ठ्यारोमा परेको बताउनुभयो । ‘अघिल्लो सरकारमा प्रधानमन्त्री एकातिर कुद्ने अर्थमन्त्री अर्कोतिर कुद्ने कामले काम हुन सकेको थिएन, तर योपटक कुरा मिलेको छ अब निर्माण व्यवसायीको बक्यौता रकम रोकिन्न,’ उहाँले भन्नुभयो ।
कांग्रेसले जनताका मुद्दालाई केन्द्रमा राखेर काम गर्छ : देउवा
कांग्रेस सभापति शेरबहादुर देउवाले कांग्रेसले संसद्मा सशक्त र रचनात्मक प्रतिपक्षीको भूमिका निभाउने बताउनुभएको छ । नेपालगञ्ज विमानस्थलमा शुक्रबार स्वागतका लागि पुगेका अगुवा नेता कार्यकर्तालाई सभापति देउवाले कांग्रेसले जनताका मुद्दालाई केन्द्रमा राखेर काम गर्ने बताउनुभयो । उहाँले संसद्मा सशक्त र रचनात्मक प्रतिपक्षीको भूमिका निभाउने स्पष्ट पार्नुभयो । पार्टी संगठन मजबुत बनाउन गाउँगाउँमा केन्द्रित हुन नेता कार्यकर्तालाई उहाँले निर्देशन दिनुभयो ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच