यतिखेर चर्चाको मथिल्लो श्रेणीमा पुग्नु भएको छ नेपाल कम्युनिष्ट पार्टी समाजवादीका नेता मेटमणि चौधरी । लिम्पियाधुरा लिपुलेकबारे धुरा पस्दा उहाँलाई विवादको माथिल्लो चुचुरो पुग्न सहज भएको हुनुपर्छ । रास्वपाका सांसद अत्यन्त प्रतिभाशाली बौद्धिक डा.स्वर्णिम वाग्ले पनि मुनरो डम्ट्रिनको सिद्धान्तसँग दक्षिण एसियाका सन्दर्भमा बोल्दा विवादको सगरमाथा छोइरहनु भएको छ । मुनरो डक्ट्रिन अमेरिकी नीतिको एक पहलु हो । भारतीय जनता र सरकारसँग नेपालीहरूको सम्बन्ध विश्वास र अविश्वास, प्रेम र घृणा नेक तहमा हुने गरेको हुनाले कहिले सरिता गिरीको, कहिले स्वर्णिमहरूको त कहिले मेटमणिहरूको पातलो जिब्रो चिप्लिरहेको हुन्छ । यसपटक मेटमणिको जिब्रो भने उठ्नै नसक्ने गरी चिप्लिएको वा गहिरो घाउ पार्ने गरी चिप्लिएको छ ।
फरक प्रसंग र फरक समयमा राजनीकर्मीहरूका अभिव्यक्ति उहाँहरूकै लागि गलपासो बन्ने गरेका प्रशस्त उदाहरण छन् । त्यसैले समाजमा पनि उखानहरू बन्ने गरेका छन् । बोल्यो कि पोल्यो, गोली र बोली फिर्ता आउँदैनन्, थुतुनु र अर्को तलको जोगाउनुपर्छ भन्ने जस्ता भनाइहरू यस्तै नसोची बोल्नेहरूका बोलीलाई हेरेर बनाइएका हुन् । आफू लोकप्रिय बन्नका लागि बेला बेलामा अरूको भन्दा फरक धारणा राख्ने, बौद्धिकताको कृत्रिम बुजु्रक्याइँ देखाउने मानिसहरूको कमी छैन । तर कुन विषय कति संवेदनशील हो र त्यस बारेमा टिप्पणी गर्दा कतिसम्म बोल्नुहुन्छ र कति यसको सीमा हो भन्ने सम्बन्धमा नेताहरूले सोच्नैपर्छ । संसद् र सांसद् धेरै नै गरिमामय स्थान र पद हुन् र त्यस्ता पदमा कतिसम्मको सामथ्र्य, क्षमता र योग्यता भएको मानिसलाई पुर्याउनुपर्ने हो भन्ने कुरा सबैले विर्सिएका छन् ।
सबैको सहभागिता र समावेशीता हुनुपर्छ भन्दैमा जस्ता मानिसहरूलाई पनि संसद्सम्म पुर्याइयो तिनका अनेकौं हर्कत र चर्तिकला त्यसबेला देखिएकै हो । त्यस बेलादेखि नै संसद्को र सांसदको गरिमामा आँच पुग्यो । डा.स्वर्णिम, मेटमणि चौधरी र सरिता गिरीहरू विद्वान हुनुहुन्छ । उहाँहरूका सन्दर्भमा त्यो लागू नहोला तर उहाँहरूको बोलीको लगाम खुस्केका कारण अप्ठ्यारोमा पर्नुभएको छ । सरिता गिरी तत्कालीन नेपाल सद्भावना पार्टी र त्यसपछि विभाजित भएका मधेसवादी पार्टीहरूको प्रभावशाली सांसद हुनुहुन्थ्यो तर उहाँले त्यसबेला हाल मेटमणिले दिएकै जस्तो अभिव्यक्ति दिनुभएका कारण उहाँले सांसद पदका साथै पार्टीबाट समेत बिदा हुनुपर्यो । सांसद जस्तो गरिमामय पदको मूल्य मान्यता र महत्व नबुझेर पनि होइन होला तर कहिलेकाहीँ बोलीको लगाम नियन्त्रण गर्न नसक्दा यस्तो अवस्थाको सिर्जना हुन पुग्ने गर्छ ।
हामी एउटा आस्था र मान्यताबाट डोहोरिँदै आएका छौं । त्यस अनुसार बोलीमा सरस्वती बस्ने गर्छिन् भनिन्छ र कहिलेकाहीँ त्यसबेला उनको अनुपस्थितिका कारण वा अरू कोही खराब तत्व वाणीमा आएर बसिदिनाले मानिसले घातक अभिव्यक्ति दिने गर्छ । सरिता गिरीको तत्कालीन अभिव्यक्ति, डा.वाग्लेको तर्क र मेटमणिको हालैको अभिव्यक्तिलाई यसैको परिणाम मान्नुपर्ने हुन्छ । नत्र यस्ता अभिव्यक्तिहरू उहाँहरूबाट आउनु आफैंमा आश्चर्यको विषय हो । चार वर्षअधिको आफ्नो अभिव्यक्तिले सरिता गिरीलाई सांसद पदबाट मात्र होइन नेपालको राजनीतिबाट समेत हराउन बाध्य पार्यो । उहाँको वर्तमान उपस्थिति नेपाली राजनीतिक रंगमञ्चमा हुन सकिरहेको छैन । उहाँको राजनीतिक सक्रियता वास्तवमा विस्मृत बनिसकेको छ ।
मेटमणिको अभिव्यक्ति ताजा छ । बेलाबेलामा साहसी भएर निडर अभिव्यक्ति र खरो टिप्पणी दिने गर्नुभएका नेपाल एकीकृत समाजवादीका सांसद चौधरीले दिएको कालापानी, लिपुलेक र लिम्पियाधुरासम्बन्धी त्यो अभिव्यक्ति आश्चर्यजनक छ । अझै आश्चर्यजनक कुरा के छ भने उहाँले राष्ट्र र राष्ट्रियताका बारेमा दिएको अभिव्यक्तिलाई अझै बढी तर्कले पुष्टि गर्ने प्रयास गर्नुभयो । सामान्य चेतना भएको जो कोही मानिसले समेत आफ्नो राष्ट्र र राष्ट्रियताविरुद्ध कुनै प्रकारको अभिव्यक्ति दिन सक्दैन । उहाँजस्तो मानिसलाई त्यस प्रकारको अभिव्यक्ति दिन कुन तत्वले प्रेरित गर्यो त्यो गम्भीर र मननीय छ । कि त्यही धार्मिक मान्यता जस्तो त्यसबेला उहाँको वाणीमा सरस्वती माता होइन अन्य कुनै दानवीय तत्व बसेको थियो भनेर मान्नुपर्ने हुन्छ ।
विभिन्न अवस्थामा निकै बाठा अभिव्यक्ति दिने, सांसद जस्तो गरिमामय स्थानमा आसीन, पार्टीको उपल्लो स्तरको जिम्मेवारीमा रहेका व्यक्तिबाट यस्तो अभिव्यक्ति आउने कल्पनासमेत गर्न सकिने अवस्था थिएन । उहाँले बोलीलाई नियन्त्रण गर्न सक्नुभएन । त्यसबेला बोलेको कुराले उहाँलाई निश्चय पनि अहिले पश्चाताप भइरहेकै हुनुपर्छ । मेटमणिको बोलीका कारण एकीकृत समाजवादी पार्टीलाई पनि निकै अप्ठ्यारो परेको हुनुपर्छ । सानो पार्टी त्यसमाथि केही नेताहरू मातृपार्टीतर्फ फर्किरहेको अवस्था छ । थोरै संख्यामा रहेका बौद्धिक नेताहरूमध्येकै व्यक्तिबाट यस्तो अभिव्यक्ति आउनाले नेताहरूलाई तनाव भएको होला । पार्टी र सांसदबाट हटाउँदा हटाइएको व्यक्तिलाई मात्र होइन पार्टीलाई पनि क्षति हुने निश्चित छ ।
कारबाही नगर्दा पनि सो पार्टीप्रतिको जनआस्था अझै कम हुने भय रहन्छ । पार्टीले उहाँलाई स्पष्टीकरण सोधेको छ । पार्टीका महासचिव घनश्याम भुसालले उपमहासचिव चौधरीको विवादास्पद अभिव्यक्तिलाई लिएर यस्तो स्पष्टीकरण सोध्नुभएको छ । चौधरीले जस्तो स्पष्टीकरण दिए पनि त्यो क्षम्य हुने प्रकृतिको छैन । त्यसै भएर पार्टीका वरिष्ठ नेता झलनाथ खनालले चौधरी सम्बन्धमा राख्नुभएको विचार निकै कडा खालको छ । उहाँले चौधरीको अभिव्यक्तिलाई आपत्तिजनक भन्नुभएको छ । उहाँले आफ्नो पार्टीको सामान्य समर्थकले समेत बोल्न नमिल्ने कुरा नेता चौधरीले बोलेको विचार व्यक्त गर्नुभएको छ । खनालले चौधरीको भनाइलाई अत्यन्त आपत्तिजनक भन्दै उहाँलाई कारबाही हुने बताउनुभएको छ ।
देशको स्वार्थविरुद्ध यस्ता अभिव्यक्ति मेटमणिबाट कसरी आयो भन्नेमा आश्चर्य मान्दै खनालले यस कुरालाई गम्भीरतापूर्वक लिने बताउनुभएको छ । यसबाट मेटमणि चौधरीले दिएको अभिव्यक्तिले पार्टीभित्र र पार्टीबाहिर समेत ठूलो तरंग मच्चाएको छ भन्ने बुझिन्छ । राष्ट्र, राष्ट्रियता, देशको अखण्डता, सार्वभौमसत्ताका विरुद्धमा बोल्ने अधिकार कसैलाई पनि छैन । चौधरीको स्पष्टीकरण भुलसुधार र माफीको याचनाका साथ आयो भने पनि उहाँले बोलेको कुरा अक्षम्य छ । पार्टीले भोलिका दिनमा यसलाई जसरी हेर्ला त्यो पार्टीको कुरा हो तर समग्र देशभक्त नेपालीले मेटमणिको अभिव्यक्तिलाई गम्भीरतापूर्वक लिएका छन् ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच