आजभन्दा २७ वर्ष पहिले विकासको विशिष्ट सपना देख्दै नेपाली प्रेस जगतमा अवतरित हिमालय टाइम्स राष्ट्रिय दैनिकले आफ्नो जीवनको अनगिन्ती आरोह अवरो पार गरी २८ वर्षको खुड्किलोमा चढ्न लागेको छ । जीवनको २८औं खुड्किलोमा चढ्दै गर्दा यसको अघिल्लो खुड्किलोको आरोहण झन् कठिन हुनसक्छ । विगतको कष्टकर यात्राले आउँदो यात्राको जग बनाइरहेको हुन्छ । हिमालय टाइम्स पनि कठिन जगमा उभिएको हुनाले भोलिको दिनमा जे-जस्ता कठिनाई आए पनि अर्को खुड्किलोमा पुग्ने आँट, परिश्रम र धैर्य यथावत् छ । यसैकारण विगतलाई भन्दा आगतप्रति हामी कढी आस्वस्त र विश्वस्तसमेत छौं ।
नेपाली प्रेसले अत्यन्त ठूलो संघर्षको चरण पार गरेर यहाँसम्म आए पनि अझै त्यो चरण यथावत् छ । संघर्षको लामो शृंखला सामुन्ने देखिँदै छन् । खासगरी छापा माध्यमहरूका लागि दुईटा चुनौती छन् । पहिलो आर्थिक नै हो । बजार घट्तै गएको छ । बजारको प्रतिस्पर्धा हिजोभन्दा आज बढी जटिल छ । पहिले यातायातको असुविधा थियो । तर अधिकांश शहरमा छापा माध्यम ढिलै भए पनि पुग्न सक्थ्यो । अहिले यातायातको विकास र संचारको तीव्रता रहेको छ तर छापा माध्यमलाई बजारसम्म पुग्न कठिनाई छ । छापा माध्यमका दुइटा मुख्य आर्थिक स्रोतहरू नै हुन् । पहिलो पाठक र दोस्रो विज्ञापन । पाठक असाध्य बढेका छन् तर बिक्री घटिरहेको अवस्था छ । विज्ञापनको अवस्थाबारे खोतल्नु नै निरर्थक छ ।
दोस्रो चुनौती हो विद्युतीय माध्यम । अहिले सूचना प्रविधिले संसारलाई बन्दी बनाएको छ । नेपाली छापा माध्यमलाई मात्रै होइन सबै सूचना र सञ्चारका माध्यमलाई सूचना प्रविधिले आफ्नो नियन्त्रणमा राखेको छ । कागज विस्तारै अभ्यासविहीन हुने स्थिति छ । मानिसहरूका हातहातमा रहेको मोबाइलमा सिंगो पृथ्वी अटाएको छ । पृथ्वीमात्रै होइन सम्पूर्ण ग्रह, उपग्रह, आविष्कार त्यही सानो भाँडोमा बन्द छ र जुनबेला पनि मानिसहरूले मोबाइलको ताला खोलेर संसारलाई चियाउन सक्छन् । यस्तो समयमा सानो लगानीकासाथ निष्ठाले पूर्ण छापा माध्यम सञ्चालन गर्नु अत्यन्त कठिन कार्य हुँदै गएको छ ।
प्रेस जहिले पनि समाजप्रति उत्तरदायी हुन्छ, सरकारले बनाएका कानुन नियमको सम्मान गर्दै सूचनाको भारी समाजमा नै बिसाउने गर्छ । यद्यपि प्रेस निष्पक्ष र स्वतनत्र हुन कठिन छ । राज्यका कानुन र समाजको अनुशासनमा वेष्ठित प्रेस स्वतनत्र र निष्पक्ष हुन्छ भन्नु भ्रम छर्नु सिवाय केही हुने छैन । तर प्रेस सत्यको नजिक पुगेर समाचार, विचार र सूचना प्रदान गर्ने स्वाभाविक माध्यम हो । प्रेसले निरन्तर समाजलाई सचेत गराइरहेको हुन्छ र जिम्मेदारीमा बसेका हरेक क्षेत्रलाई खबरदारी गरिरहेको हुन्छ । मुख्य रूपमा राज्य विषय हो । राज्यमा बसेर नेतृत्व गर्नेहरू, उनीहरूका काम, उनीहरूका निर्णयले पार्ने असर, सबै पक्षमा प्रेसको खबरदारी हुने गरेको छ । हिमालय टाइम्स त्यसमा कतै पनि चुकेको छैनभन्दा हामीलाई खुशी लागेको छ ।
२७औं वर्ष पूरा गरी २८औं वर्षमा प्रवेश गर्दै गर्दा हामीले विचार आधार बनायौं : पुराना समस्या नयाँ सरकार । यो साल नेपालको संघीय लोकतान्त्रिक गणतन्त्रको अर्को चरणको अभ्यासअन्तर्गत तीनवटै तहमा नयाँ सरकार गठन भएको छ । सार्वभौम नेपाली जनताको विवकेलाई जुनसुकै रूपमा परिभाषित र परिचालित गरिए पनि मतदानबाटै तीनवटा सरकार बनेका छन् । तीमध्ये स्थानीय सरकार सबैभन्दा महत्वपूर्ण रहेको छ । प्रदेश सरकारको भूमिका त्यति महत्वपूर्ण र प्रभावकारी हुनसकेको छैन । तर संघीय सरकारले स्थानीय र प्रदेश दुवै तहको सरकारभन्दा बढी भूमिका पाएको छ । जुन स्वाभाविक हो । अनेक राजनीतिक संघर्षको परिणाम यस युगको सबैभन्दा राम्रो मानिएको राजनीतिक प्रणाली संघीय लोकतान्त्रिक प्रणाली नै हो । यसमा दुई तहको वा तीन तहको भन्ने विवाद छ । नेपालको आर्थिक सामाजिक अवस्थादेखि राजनीतिक सोचका आधारमा दुई तहका पक्षमा जनमत पर्याप्त छ । तै पनि तीन तहको सरकारको अभ्यास सुरु भइसकेको हुनाले यसले देखाउने जनमुखी परिणामलाई पर्खनै पर्ने हुन्छ ।
नेपालमा अनगिन्ती समस्या छन् । आर्थिक विपन्नता, बेरोजगारी, अविकास, बौद्धिक पलायन, भ्रष्टाचार, पुराना रोगहरू हुन् । सामाजिक रूपले छुवाछूत, दाइजो प्रथा, छाउपडी प्रथा, बोक्सा-बोक्सी प्रथाले समाज ग्रस्त छ । अनेक अन्धविश्वासले जरो गाडेको छ । मानिसहरू आज पनि खानेपानी, औषधि र राम्रो शिक्षा नपाएर पीडित छन् । मानव अधिकारको क्षेत्र लथालिंग छ । संक्रमणकालीन न्यायको विषय पसारो परिरहेको छ । विगतको हिंसाले पीडित, यातना र आफन्तको हत्याले आहत, विस्थापितहरूको अवस्था प्रतिदिन बढिरहेको छ । अन्तर्राष्ट्रिय क्षेत्रमा विकसित तनाव, युद्ध, अशान्ति, शक्ति संघर्षको छाया नेपालले समेत भोग्नु परिरहेको छ । आर्थिक अवस्था भयावह हुँदै गएको विज्ञहरूको विश्लेषण छ । अव्यस्थित र अनि योजित ग्रामीण सडक, अव्यवस्थत शहरीकरण, कृषिमा क्षयीकरण, अनेक समस्या छन् । विकासको आरम्भ कहाँबाट गर्ने हो ? यो प्रश्न हिजोदेखि आज पनि यथावत् छ । यस अर्थमा हिमालय टाइम्सले यो पटकलाई पुराना समस्या नयाँ सरकारमा हबस केन्द्रित गर्ने प्रयास गरेको छ ।
अनेक पुराना समस्या छन् । राज्य र समाजका सामु आँ..मुखवाएर बसेका छन् । तीमध्ये केही क्षेत्रका समस्यालाई लिएर प्रतिकात्मक रुपले यहाँ विभिन्न विद्वानहरूका विचार प्रस्तुत गर्ने जमर्को गरेका छौं । हामीलाई आशा छ सरकारमा बस्ने, नीति निर्णयमा बस्ने र समाजका विभिन्न तहमा रहेका जिम्मेदारहरूले पुराना समस्यालाई नयाँ सरकारले कसरी सामना गर्ने छन्, गर्नुपर्ने हो मन्थन गर्नु हुनेछ । वादेवादे जायते तत्वबोध : अर्थात् प्रतिक्षणको विमर्शले विस्तारै निष्कर्षमा पुग्न सकिन्छ । तत्वबोधलाई हामीले यहाँ निष्कर्ष बुझेका छौं ।
हाम्रो यस प्रयासमा आफ्ना अमूल्य रचना र विचारकासाथ सहयोग गर्नु हुने सम्पूर्ण लेखकप्रति हामी आभारी छौं । आगामी दिनमा समेत यहाँहरूको अमूल्य सहयोगको अपेक्षा गर्दछौं । आजको यस सुखद् अवसरमा सम्पादकीय सहकर्मीहरू, पाठक, ग्राहक, शुभेच्छुक, सहयोगी, व्यवस्थापनमा संलग्न र विज्ञापनदाताहरू सबैमा सम्पादकीयका तर्फबाट आभार प्रकट गर्दछौं र आगामी यात्रा सहज गराउन यहाँहरूको सदासयता यसरी नै हुनेछ भन्नेमा विश्वास प्रकट गर्दछौं । शुभास्ते पन्थानः सन्तु ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच